[انه شيعيه]

محاورة بين اخوين احدهم بالعراق والاخر بالسويد

ولك ارجع

ماعندي جرح يتحمل اللجمات
ولا ظل حيل عندي وللملامة احمل

صرت جتال خلك ليش يالمحبوب
وليش بلا ذنب لليوفي الك تجتل

مو عشرة شمع راح اشعل العشرين
بس كونك تجينه وبأرضنه اتحل

آخر مرة شفتك جنت مامرتاح
كلامك بيه عبرة وتضحك اتمثل

شبيك آنه اسألت كتلي طبيعي الحال
وحالك موطبيعي وجنت متبدل

اعرفك مثل روحي واكثر من الروح
كلي شبيك واحجي ومني لاتخجل

لجن واكف عفتني ورحت عني بعيد
اذا زعلان كلي بيا سبب تزعل

مثل واحد لأمه جنت احن اعليك
وجنت بنياط كلبي هواي تتمعجل

ابعدت عني وبقيت متاني ترجع يوم
ومثل مهرة احلامي اتنطرك تصهل

عسه بعيني العمة لو انته مو بالعين
وكون من البواجي ادموعها اتوشل

بفراكك حبيبي مالفاني العيد
وصدك يوم عيدي يوم بيه اتهل

نهاري صار ظلمة وبردي اصبح كيض
والعسل علكم صبح والعز تبدل ذل

ونسيت اسم الفرح ومن الضحك محروم
واتسله بهمومي وبالحزن اشتل

واليشتل حزن مايحصد الا الضيم
والضيم اللفاني ماجره اعلى الكل

ليالي سود مرن ماتبعهن نور
لانجمة التلالي ولا ضوة الينزل

ولا لحظة نسيتك يانظر هالعين
ولساني مايملك بأسمك يرتل

مثل هلة العيد اتنطرك ظليت
وبيك افرح طفل يوم اللي بيه اتطل

وجن فرحة يتيم بلعبة يوم العيد
كلبي بيك يفرح لو علي تجبل

وافرش روحي سجادة اعلى دربك دوم
واظل طول العمر بعيونك اتغزل

ولك ارجع اليه وخلي افرح يوم
كافي من الزغر بهمومي متمشكل

فأجابه
تريد أرجع

تريد أرجع وارد للدار *** أظن عالفركه ماتكدر
واظن شوكك طفح يفلان *** فيضه ومابعد تصبر
وأدري النوم صعب اعليه *** العنده أحباب بالمهجر
يحسب للملاكه حساب *** يعد أسنين جنهه أدهر
عينه أعله الدرب تربي *** ويظل طول العمر ينطر
يكضيهه بونين ونوح *** وريكه من البجي يمرمر
أكلك صادك انته بهاي *** أدريبك وفي وأكثر
تحركك روح خوتنه *** وحليبك زاجي لمن در
أحسك كبل ما تحجي *** وكبل ما ينطق الأصغر
يلنه الماي متساوي *** وكل احنه لمسنه الضر
هسه أنته كلت وحجيت *** وشرحت أحوالك بأسطر
أريد النوب تسمعني *** أجه دورك يبن جعفر
أريد أشكيلك أهمومي ** ولو همك يجوز أكبر
وأخبرك بالجره أعليه *** وعله أكليبي الغده مبعثر
عكبكم ما لفاني النوم *** وعيني أتعودت تسهر
روحي أتلوب بالغربه *** وغدت عالملكه تتحسر
انجوت بالبعد واحتركت *** جبدتي وكلبي أتفطر
انهدم حيلي احترك دمي *** وناري موجره وتسعر
هزل جسمي انكسر ظهري *** كسر ماأظن يتجبر
ولاأظن جاره ليه اتصير *** صرت للموت انه موزر
يلن مابيه شي صاحي *** كلي مرضرض مكسر
شحسبلك شعد جروح *** عدد ماأظن يتقدر
جرح منجرح فوك جروح *** تظن هيجي جرح ينزر
تريد أرجع تود العين *** بيه أتسرك بمنظر
أريد أرجع لأرض ذي قار *** دنيتي وأدري بيهه أنسر
تظن للسمجه يحله العيش *** لوانهه أتحولت للبر
بس حسبة وكت هيه *** وغيمه مدلهمه وتعبر
ولابد للظلام يزول *** ويرد الفجر ينطر
وأذا مكتوب نتلاكه *** وأمر من ربك مقدر
أكيد أيصير هالمحتوم *** وبشوفة بعض هاي العيون أتقر
وأذا باللوح ما مكتوب *** ملكه ارواحنه يصير بحياة الذر

فأجاب الاخر ...
هسه أرجع
أسألت شيطان شعري وردته عود اليوم .... يدبرلي جواب لهاي ، ما دبر
كلتله روح وأبعد لا ترد النوب .... وخليني بكلام السيد أتفكر
صح همك جبير وثكله ثكل جبال .... وما ألومك إذا من عنده تتعثر
لجن لوشفت همي همومك أنته تهون .... لأن همي يخلي جبال تتكسر
صرت لجف زماني وجنه للصفعات .... وصرت للضيم آنه السجة والمعبر
وأتحمل زماني شما يذب لوعات .... بس لوعة فراكك إلها ما أكدر
جنت أتأملك ترجع وأشوفك يوم .... وأقنع روحي جنت بهاي وأتصبر
وأكول لروحي سهلة وهالسنين تهون .... إذا فد يوم ( شوقي ) بدنيتج يظهر
وأنته تكلي يمكن هذا مامكتوب .... وأظن روحي ويه روحك يلتقن بالذر
خل نفرض ( جدالا ) أرضى آنه بهاي .... وأروح لموتي بيدي وهالعمر يكصر
وبالذر نلتقي؟ ( شنهو الضمان لهاي ) .... مو خاف أنتظر وهناك ماتحضر
ما أريدن هذني أرجعلي هسه بساع .... لأن كلبي بغيابك كلش أتفطر
وظل وشلة عكل ألحك علي يفلان .... يطير العكل وأنجن كون تتأخر
إذا مشتاقلك من كاعد آنه وياك ... هسه شلون حالي وأنته بالمهجر
تكول الفركه صعبة ويكتل التفكير .... ومامرك النوم وصرت بس تسهر
إذا أكلك تصدك آنه بيه شصار .... شنهو النوم يعني ؟ نسيت ما أذكر
وكل زاد الأضوكة بحلكي مر يصير .... وحتى الماي نار تكول ظل يسعر
وما أشرب خمر تدريني عنه بعيد .... لجن لومرني أسمك أثمل وأسكر
آنه أدري الوكت هم شد عداوة وياك .... وخلاك أتركت أرض الوطن مجبر
بس الوكت ضكني وأنته عني بعيد .... وجنت رايد وجودك ماردت أكثر
ما أريدن أتعبك والجروح هواي .... وأنا جروحي ويه عمري تخضر وتكبر
وإذا جرحك بكلبك وأنته منه تلوب .... أنا جرحي إعلى طولي وما أظن يعمر
إذا جسمك مكسر والرضوض هواي .... أنا جسمي أنطحن من فركتك يا أسمر
وكون أتوزرت للموت .... لأن جسمك هزل وأنضر
آنه معارك ويه الموت .... وأموت ويه الفجر لوطر
ألف موته متت بفراك .... أخوي الطيب المعشر
هسه أرجع إليه بساع .... خلي بعمري مره أنسر

منقول للامانة

[الروح الفاطمية]

اللهم صل على محمد و آل محمد .
أحسنتم الطرح

[صادق العارضي]

اللهم صل على محمد وآل محمد
قصائد رائعة سلمت يداك

[كريم السعبري]

نقل رائع وفكره جميله
وهذا حال العراقي والغربه
اتمنى لكم التوفيق

السعبري

[القلب الاسير]

الله الله الله
صور ميلة وحوار دافئ
مو عشرة شمع راح اشعل العشرين
كل ما قرأت جميل ولكن هذا البيت له ابعاد .... لافكار تناغمت على الواح الابداع
وتضاربت مع موج التالق
الاخت الفاضلة
موفقة ان شاء الله
الاقل
احمد رفيش

[لبيك]

السلام عليكم ورحمة الله وبركاته::::::::::::شكرا لكم اختي الكريمة ( انه شيعية)احسنتي وابدعتي واكرر الف الف شكر على هذا النقل الرائع وسلمت يداك ويدا من كتبها آصلا وهذا هو القليل عما يعانيه المغترب في المهاجر وآهلنا في الوطن الجريح اللهم فرج عن كل مكروب ورد كل غريب بشفاعة محمدا وآله الاطهار امين رب العالمين وليحفظكم الله وسدد خطاكم :::::: وابد والله يازهراء لن ننسى حسينا ... اخوكم سيد علي الموسوي ( آهات غريب )

[لبيك]

السلام عليكم ورحمة الله وبركاته::::: الله ..... الله . مااجملها حقا . صميمية الواقع . اللهم فرج عن كل مكروب .شكري وتقديري لصاحب القصيدة ولناقلها الكريم ورمضان كريم وتقبل الله طاعاتكم وعباداتكم واعمالكم وكل عام وانتم بخير . اخوكم سيد علي الموسوي