[رحيم الحسناوي]

تعت بيّه المصيبه ... ومصابي الشح طبيبه
ابن عمي شيجيبه

ــــــــــــــــــــــــــــــــــــ
حرت يايمّه منهو الينضر لحالي ... شفت بس النوايب يمّه تبرالي
وحيده وكل فرح ماشافت عيالي ... حزن صار الحزن كل ساعه موالي
بعد عينج ولوني ... بنتكم مارعوني
صفت بنتج غريبه
انه دموع اليتامه وحسرة الحره ... وانه الجسم الحمل بالطف الف طبره
وانه اجساد البكَت تنزف على الغبره ... وانه جفوف وعلم طاحت وانه العَبره
انه خدور وسبيه ... وحرم بالغاضريه
وشموس اضحت تريبه
رحت عنّي يبويه ومن تخليني ... يطول وما امل بغيابك ونيني
بسامير وهضايم واندمت عيني ... ولا شفت العلى مصابي يواسيني
علي بسجن الضلاله ... بعلم رب الجلاله
الضلم اصبح نصيبه
انه المحسن انه الما رحمته جروحه ... وانه مصاب الجفيل الما غلت روحه
انه رماد الخيم والفاكد ونوحه ... انه دموم البكت بالغربه مسفوحه
وانه الضعن وجفيله ... وانه الحره العقيله
وانه الشيبه الخضيبه
بجيت بلا دمع جيفن خلص دمعي ... واحس روس الرماح انزرعت بضلعي
على اشباه الرجال البخبخت شادعي ... ولوني وما رحم ذاك النذل وضعي
سطر باليمنه عيني ... ورفسني وذب جنيني
الفلا طاهر حليبه
رحيم الحسيني الحسناوي