[ام الدنيا]

الطريقة دى هى الاصل فى عمل البط
لا تقوليلى برتقال ولا تقولولى غيرة
لان دة الاصل فى عمل البط اما البط بالبرتقال فدة طريقة دخيلة
المهم
بنجيب بطة طبعا تتغسل كويس جدا بالماء والملح والدقيق اللى هو الطحين والخل
بعد كدة بنجففها
بعد كدة بنجيب اناء به ماء وكرات وجزر وبصل وكرفس وبهار وفلفل اسود وفصين ثوم وحبهان واول ما الماء يغلى انزل البطة تاخد ربع سواء بس مش نصف سواء لا ربع سواء بس
ونطلعها ونجففها كويس جدا
بعد كدة نعمل فيها شقوق فى اماكن مختلفة بالسكين علشان الخليط يدخل جواهل كلها
فى اناء تانى بنبشر بصلة كبيرة معاها فصين ثوم معاها فلفل اسود وبهار وحبهان وملح ونخلطهم كويس جدا بعد كدة بنزوعهم جوا قلب البطة ومن برة وفى الاخر نجيب ملعقة صلصة ونمشيها على البطة كلها من برة
بعد كدة بنجيب صينية الفرن ونحط فيها شرائح بصل وفوقها البطة
ونسيبها فى الفرن لحد ما تستوى وبالف هنا ودى طريقتى وطريقة والدتى فيها ... وفى الاخر بنجيب فحمة متوهجة نضعها فى طبق صغير فى وسط الصينية ونسخن ملعقتين سمن ونطفى بية الفحم ونغطى الصينية علطول
فى ناس بقة بتسلق البطة وبعد كدة تقطعها وتحمرها فى زبد
كل واحد ولة طريقتة
وطبعا قولتكم نسلقها ربع سواء عشان لما تدخل الفرن تستوى
والصراحة بستعجب جدا لما اتفرج على برنامج تليفزيونى والاقى شيف يقول ان البطة هتستوى اول ما يدخلها الفرن بدون اى سلق
طبعا كلام غلط جدا عمرها ما هتستوى لو دخلت كدة مرة واحدة الفرن لا لازم تاخد ربع او ثلث سواء الاول
وفى غلط شائع جدا فى ناس بتحشى البط بالفريك او الارز الكلام دة غلط جدا
فى اصول اكل البط مفيش حاجة اسمها بط محشى
اسيبكم بقة مع البطة الجميلة دى