[الشاعر حسن خليفه]

كلمه عذراء



تآخر ماوصل يم زينب الصوت

ودري الصوت يم آذنـج تشضه

الكلام بآذن زينب مادخل ليش ؟؟

قبل لايدخل يروح ايتوضه

اشك بكل كلام البيـج كَالوه

وآذا شكيت عندي اهوايه اسباب

الكلمه العلى السانـج كلمه عذراء

على السانـج بعدهي ولابسه احجاب

ومنهو الشاف طولـج يخت الحسين

ومنهو الكَال ضلـج شافته اجناب

بمجرد ماوكَـع ضلـج على الكَاع

عبايه يصير ويغطيه التراب

شافو زينب الكَالاهه جذاب

وجذب كل من ايئيد الروايه

تكَولي شلون يازينب يشوفوج

وضلـج لو طلع يلبس عبايه

حتى بروحتج من رحتي للشام

عندي اشكال بيها من البدايه

مو آنتي السبيه وهمه يسبوج

انتي السابيه وهمه السبايه

بدلتي الادوار آوياهم اهناك

وخذتي الدور الاكبر للنهايه

بحيث الانثى انتي وصرتي رجال

وهمه ارجال بس صارو نثايه

ماطاح الحجاب بكل الاحوال

ولا من راسـج نجرت عبايه

لبستي العفه ثـوب بيوم الطفوف

بس ضلت ظمائرهم عرايه

يامعصومه انتي وعصمتـج بيـج

لان ايمام ابوج واخت الايمام

وآذا جدج محمد وامـج النور

آذا آنتي القيامه وانتي الاسلام

لذلك كل شطر من ينكتب بيـج

آكتبه آعلى الورق بس لابس آحرام

الفرق مابينهم والبينـج آهواي

فرق بعد الحقائق عن الاوهام

تنعدين انتي بمية الف سيف

وينعدون همه بحفنه اقزام

كسرتي اعيونهم من صحتي هيهات

لان صوتج حجر وعيونهم جام

لان صوتج حجر وعيونهم جام ...



مع احترامي لكم

الشاعر

حسن خليفه