[حب حسين جنني]

ألا ياللي تعذبني بهجرك والجفـاء وش فيـك
وش المصلوح يوم أنـك تعذبنـي وتجفانـي
تجازيني بصداتك وانا مـدري وش أجازيـك
ترى مالك جزاء إلا الحب مني لـو تناسانـي
ما دام أنك ملكت القلب لو تبي العيون أعطيك
أنا مجنونك اللي منك طـول الليـل سهرانـي
اسلي خاطري في وحشت الغربه على طاريـك
خيالك كل ما جيـت اهتنـي بالنـوم صحانـي
يجيني طيفك الساري وأشوفك لو أنا ما اجيـك
مغير اعبر احساس الشعـور بنظـم قيفانـي
أجامل واضحك مع الناس وأنا مانـي بناسيـك
بدونك كني اللي عايشن في سجـن وحدانـي
رميت القلب بسهوم العيون وما حصل يكفيـك
وش الباقي من أنواع العذاب اليوم مـا جانـي
علامك ليش ما ترحم تغليني مثل مـا أغليـك
ترى ذوق المحبه لا صفاء واحد مـع الثانـي
أنا اللي ما قطعت الياس من دونك تراي ارجيك
ولا صدقت فيك النـاس حسدانـك وحسدانـي
ولكن لا يصيبك في المـوده والغـلا تشكيـك
ولا تاخـذ ولا تسمـع كـلام افـلان وفلانـي
تراك الواحد اللي في عيوني ما أحدِ إيساويـك
عطاك الله ملح وزين وزود الزيـن طغيانـي