[زكي الياسري]

ابيات للامام المجتبى كريم اهل البيت صلوات الله وسلامه عليه .. اهدي ثوابها لاموات القراء الكرام واموات شيعة امير المؤمنين من لا ذاكر لهم يذكرهم ... واسالكم الدعاء

ليلة رحمه ياشيعه ليلة حب سماويه
بيهه الباري واهبنه الطافه اِلأهـــيه
بسم الحسن مكتوبه
بيهه يقبل التوبه
رب العالمين اليوم للشيعه الاماميه
++1++
يا شيعة علي الكرار .... هالليله الفرح واجب
بسم ابن النبي المختار .... واليهه وبدر غالب
بيهه انولد للزهراء .... سبط المصطفه الراهب
بيهه كل نبي ومرسول .... كَلبه امن الفرح ذايب
بيهه الشيعه فرحانه
واهل الحقد حزنانه
بيهه اكتملت الانوار للكسوه اليمانيه
ليلة رحمه ياشيعه ليلة حب سماويه

++2++

ليلة مغفره وايمان .... بيهه التوبه مقبوله
واملاك السمه بأفراح .... يم العرش مشغوله
وحور العين مبتشرات .... كل حوريه هلهوله
واهل الجنه والولدان .... بالفرحه يغنوله
سبط المصطفه المختار
شبل المرتضى الكرار
امه فاطمه الزهراء حوره ابثوب انسيه
ليلة رحمه ياشيعه ليلة حب سماويه

++3++

بسم الحسن هلّيله .... للصبحيه نحييهه
نور الزهره والكرار .... شعشع كل مبانيهه
ريحانة رسول الله .... ثاني وصي راعيهه
هذا المجتبى ياناس .... جود وكرم ماليهه
ماصالح جُبنْ لا لا
ماراد الفتن والله
مهَّد بالصلح يا ناس للثوره الحسينيه
ليلة رحمه يا شيعه ليلة حب سماويه

++4++

من كَبل الخلق يا ناس .... الله خالق انواره
يم عرش الله آدم شاف .... خمس انور دواره
ناشد عنهه رب الكون .... والله انطاه اسراره
الله من اجل هالناس .... خالق جنته وناره
الزهره وحيدر الكرار
والهادي النبي المختار
وحسين وحسن ياناس هالانوار قدسيه
ليلة رحمه يا شيعه ليلة حب سماويه

++5++

اهل الكرم واهل الجود .... معروفه ابأساميهه
حاتم مضرب الامثال .... كالو هوه راعيهه
مايوصل عُشر معشار .... لبن الزهره واليهه
جوده والكرم والزود .... غطه كل نواحيهه
بمضيفه استجار الجود
ومثيله فلا موجود
اصبح باب للحاجات كلهه ابّابه مكَضيه
ليلة رحمه يا شيعه ليلة حب سماويه

++6++

يهل العقل والالباب .... عمر ابلا هدف رايح
بين الجنه والنيران .... خط للينضره واضح
خـــط ابن النبي والله .... كلـــمن يتبعه رابح
اعذب من زلال الماي .... خط الخالفه مالح
كوثرهم يرَوّينه
ومنهجهم يدلّينه
ونطب جنة الاحلام غصباً علوهابيه
ليلة رحمه ياشيعه ليلة حب سماويه

تمت بحمد الله
زكي الياسري في ثاني ليالي رمضان 1430
24/08/2009