[جابر النجفي]

بسم الله الرحمن الرحيم
اللهم صل على محمد وآل محمد وعجل فرجهم

العباس قمر العشيره
ـــــــــــــــــــــــــــــــــــــــــــــــــ
جودك وكع فوق الثرى يامنبع الجود == ياهو إنتَ يارايه إو هُوَتْ مليانه بالزود
شردت أعاديك = جودك يناديك = إنهض يمهموم
ــــــــــــــــــــــــــــــــــــــــــ
ياهو إنتَ يامثل القمر من يفقد إضواه == ما ينطفي بس مَحّد إيشوفه إو يحن آه
ينطي الضوه للعالم إو ما يبتغي الجاه == خَبّرني يافارس تره عقلي مضه إو تاه
صابغ للترب دمك جره يرسملك الفوز
دمك منتصر يافارس إو للغانمه إيحوز
عباس == عباس == عباس == عباس
خَبّرني يافارس شفت جودك نزف ماي == يبكي عليك إو ما ركد وبقلبه الداي
مايك مضه إو راح = سيفك بجه إو ناح = نورك طُفه اليوم
شردت أعاديك = جودك يناديك = إنهض يمهموم
ــــــــــــ
ياهو إنتَ شفتك ياشهم ذَبّيته للماي == عباس آني يانهر يتلاهب إحشاي
بس ما رضت روحي إعلى شربه إو ظلت إبداي == من ذكرت آلام العطش بحسين مولاي
لاهب قلبه إو عطشان من كثر الظمه ذاب
وإختي الواعدتها الماي اجيبه والامل خاب
عباس == عباس == عباس == عباس
كفي رمه الماي إطْلَعت وبأيدي الجود == كل من يواجهني شرد ما يرجع إردود
طيب الوفه بان = ياعالي الشان = بفعالك اليوم
شردت اعاديك = جودك يناديك = إنهض يمهموم
ـــــــــــــــــ
عباس آني يانهر وصّاني حيدر == بختي العقيله ما يمر بيها رده إو شر
واني صحت امرك يبو إحسين إو تِبَشّر == إيد العقيله إبأيدي ياحيدر يَأطهر
ياحيدر أبد ما أنسه إختي إو ما يمر ضيم
يم زينب وزيلن كل اسى بمرادف الغيم
عباس == عباس == عباس == عباس
وَصّتني أمي بالسبط وإخته العقيله == صرت آني كافلها إو نلت هاي الفضيله
ما غُمْضَتْ العين = عن إختي وإحسين = بس ويني هاليوم
شردت أعاديك = جودك يناديك = إنهض يمهموم
ـــــــــــــــــ
عباس آني يانهر للهاشميه == أحميها واسمع كل طلب بنت الزجيه
تِنْدِبْني أسقي إمن العطش بالغاضريه == أطفال ما خذها الظمه يابو الحميه
ياعباس جودك ياشهم منبع كرم صار
يسقي إبلا ثمن من كل عطش وإيْطَفّي النار
عباس == عباس == عباس == عباس
واني إحْمَلت جودي إو قصدتك رايد الماي == كل الصفوف إطّشرت ما ثِبْتَت إعداي
سيفي الرده صار = والواجها إنهار = من سيفي هاليوم
شردت أعاديك = جودك يناديك = إنهض يمهموم
ــــــــــــــــ
عباس آني يانهر رضعتني حبهم == أم البنين البلوفه وافتها أمهم
نالت شفاعة فاطمه والهادي جدهم == والحب مله قلبي إو نبض بس الذكرهم
اولاد النبي حبهم ملك قلبي إو مله الروح
أهواهم أظل وافدي النفس فدوه إلهم إتروح
عباس == عباس == عباس == عباس
ظليت آني عالوفه ما خَيّبتها == أم البنين الطاهره ما خالفتها
وإفديت الحسين = وَفّيته للدين = وبعمري هاليوم
شردت أعاديك = جودك يناديك = إنهض يمهموم
ـــــــــــــــــــ
عباس آني يانهر فوق الوطيه == غدروني اصحاب الغدر اهل الرديه
قطعوا يميني إو يسرتي صرت الرميه == والراس صوبوه إبعمد هاي الرزيه
من نار السهم عيني بعد ما تقدر إتشوف
والدم هالنزف يسقي الثرى وينادي يكفوف
عباس == عباس == عباس == عباس
ماي الأخذته يانهر بالسهم صوبوه == والرايه وكعت والأمل بالكاع صلبوه
بمخالف البين = ناديته يحسين = إلحقني هاليوم
شردت أعاديك = جودك يناديك = إنهض يمهموم
ــــــــــــــــــــــــــــــــــــــــــــــــــ ـــــــــــــــــــــ
يمكنكم سماع القصيده بصوت الرادود السعودي منتظر الصويلح
على الرابط التالي

http://www.wlidk.net/dldD7L76507.mp3.html