[مازن الشطري]

ابفيض الدموع يمختار تنادي بضعتك
تدري بجفاك يمرسول ولتني امتك
من عفتني **** أ ودعتني

بعدك اشلون عفتـــــني يطه للألم
سجّر النار يبويه العدو بابي ضرَم

قرر ايشب الضى *** خصمي ضد المرتضى
تلهب النار يمختار تجوي اوديعتك
وأحركتني **** من عفتني

من ورهه الباب يبويه العدو صوتي سمع
ابكَيد الأحقاد عصــــرني لمّن بابي دفع

دمعي وي دمي اختلط *** بويه والمحسن سكَط
وعلي الكرار يمختار تجتفه اوصيتك
ماشفتني **** من عفتني

بويه بجفاك ولتني تره اشباه البشر
ضلعي بالباب يبـــويه تهشم وانكسر

صوبوا مني الضلع **** وأجروا انهار الدمع
كَوم الأشرار يمختار غدرها جازتك
ألمتني **** من عفتني

بــــــــــويه لليلي ابغيابك تظّلَم واحتلّك
من نحلتي امنعوني احرموني من فدك

ابكل اساليب الخبث **** حرموا عني الورث
تدري اشصار يمختار خذوها نحلتك
وحرمتني **** من عفتني

بويه خصمك سطرني وجفن عيني دمع
وصوت الاطفال لحالي تفــــــطر وانفجع

من الحسين وحسن *** ادموع بالخد احفرن
تهمل انظار يمختار مدامع عترتك
مرمرتني *** من عفتني



مازن الشطري