[زكي الياسري]

عهد مع الحسين عليه السلام ... بأن تبقى الدمعه ... رايه في ساحة الكرامه ... و سيف في وجه الطغاة يهز مضاجعهم حتى تسقط
بأيدي الشيعه الرافضه للظلم و الطغيان
ثوابها الى كل من يقرأها و الى شيعة امير المؤمنين عليه السلام المنسيين و خاصة خدمة الحسين و الشهداء الكرام
زكي الياسري النجفي
2/11/2010
يبو سكينه .... تشهـد الدمعه علينه
يبو سكينه .... لجلك الطمه و بجينه
دمعنه الجاري ... لهيبه الناري ... يهز كل ظالم .. شهيد الباري
1
احنه شيعه و جعفريه احنه انصار الفخر
احنه بركان المدامع بسم الحسين انفجر
هالدموع السايله ... جالسيوف القاتله
تشهد اعروش الطغات اعليهه .. تشهد اعروش الطغاة اعليهه
ثورة اصحاب الضماير كل وكت قِدناهه
ما نِمِل من الكفاح المسأله اعلناهه
احنه اكبر ملحمه ... للقيامه قائمه
راية الله بكل فخر شلناهه.. راية الله بكل فخر شلناهه
يبو سكينه .... عل النهج لا ما نسينه
يبو سكينه .... و انته ربان السفينه
دمعنه الجاري ... لهيبه الناري ... يهز كل ظالم .. شهيد الباري
2
للابد احنه سلام الكل عَدول انطيعه
هذا مبدأنه الرشيد وللابد منبيعه
لكن اعله المارقه ... جن صواعق حارقه
هذي معروفه بطباع الشيعه ... هذي معروفه (بصفات) الشيعه
من ابو اليمه عرفنه ما نذل للظالم
لهل السبب دين الله لسه بينه باقي و قائم
ما نسينه كربله ... و القيم متواصله
الله سبحانه و تعالى العالم .. الله سبحانه و تعالى العالم
يبو سكينه .. علعهد لا ما نبايع
يبو سكينه .. للظلم لا ما نشايع
دمعنه الجاري ... لهيبه الناري ... يهز كل ظالم .. شهيد الباري
3
يبو الاكبر وحك دمك يبكَه خالد بينه
كل عرش ظالم يزول شما تطول اسنينه
تبكَه شعلة كربله ... لليحبك بوصله
مثل شعلة حيدر ابصفينه .... مثل شعله حيدر ابصفينه
هالضماير و السراير علعشكَـ مفطوره
كل فدائي بينه اصبح من شعاعك نوره
يبن طه المصطفه ... قسم نقسم علوفه
للأبد ثورتنه علمعموره ... للأبد ثورتنه علمعموره
يبو سكينه .... ثورة الحكَـ عالميه
يبو سكينه .... اي وحكَـ ضلع الزجيه
ودمعنه الجاري ... لهيبه الناري ... يهز كل ظالم .. شهيد الباري
4
دمعة الشيعي الجريه قنبله موقوته
و الطواغيت ابرعبهه دائماً مبهوته
ترتجف من تستمع ... تخاف من هذا الدمع
دمع صح .. لكن يلعلع صوته ... دمع صح لكن يلعلع صوته
مهدويه بالبقاء الثوره يهل الشيمه
اخرويه بالعطاء و بالخلود القيمه
ثورة انقاذ الفكر ... بالمدامع تنتشر
و الحسين القائد ابتنضيمه ... و الحسين القائد ابتنضيمه
يبو سكينه ... رايتك ترفل زهيه
يبو سكينه ... يا شهيد الغاضريه
ودمعنه الجاري ... لهيبه الناري ... يهز كل ظالم .. شهيد الباري
5
الشهاده بهلطريقه و الله يا محلاهه
و الله يحسين ابمحبتك حكَنه من نتباهه
انته ناموس الفخر ... منك ادروس و عبر
و الكرامه بثورتك عشناهه .... و الكرامه بثورتك عشناهه
بسمك الدين استقام و كربلاء الايه
والسيوف الرتِلتهه و الدماء الرايه
رفرفت طول الزمن .... و اصبحت النه وطن
وين ما ذبنه الزمن بــَنّايه .. وين ما ذبنه الزمن بــَنّايه
يبو سكينه ... كل زمن اصبح زمانك
يبو سكينه ... و كل ارض صارت مكانك
ودمعنه الجاري ... لهيبه الناري ... يهز كل ظالم .. شهيد الباري
زكي الياسري النجفي
2/12/2010 كيل

</b></i>