[منذر الساعدي]

ليش؟؟؟؟


كلها شِياب اَصبحت مات الشباب
والطفل يطلع الشيب اَبروحه


اَترَضعه الأيام بأنواع العذاب
اتسوي اَكماطه العَليه مَرجوحه


ليش دنيانا اَمتلت بس بالذياب
وليش رايات الوفاء مطروحه


قبل ناخذ فِكرة من أسم الكتاب
هسه شو كل الفِكَر ممسوحه


الزاد كان ايغزر ابملح التراب
هسه حتى الملح راد املوحه


قبل كان الينجرح يلكَه الصحاب
عنده ويشيلون كل اَجروحه


هسه وحده ايحير بجراح المصاب
ايسَكن اجروحه ابدمعته اَونوحه


واليتيم الكان ميشوف الصعاب
هسه يا صعبه التمر اَتلوحه


والارحام اتقطعت ويه الانساب
للمصالح هسه جَيه وروحه


والصدق راح اويه اهلنه وعنه غاب
اندفن ويه اقبورهم طم روحه


شافنه انحب الكذب والأغتياب
أوعدنه كلمة صدق ما مسموحه


للأسف صار البعضنه بس عقاب
والمودة البينه مَذبوحه


من ادينه الارض حل بيها الخراب
والثمر تزوير صار اَبفوحه


ليش دنيانا الوفه فيها سراب
ولغدر مبتهج تعلى اصروحه


وين كَف الرحمه وين أهل الثواب
التمسح اَدموع البقت مسفوحه


كافي مَلينه شعارات الخِطاب
اَنريد اَفعال الزلم للوحه


لا تعاتب ترى ميفيد العتاب
صارت الرحمة شُبه مفضوحه


وكافي تسأل ترى ما تلكه جواب
كلمن اَبهَل زمن حار ابروحه
للأسف كلمن احتار ابروحه


ليش؟؟؟؟؟؟؟


بقلم
حسين الساعدي




منقول