[حسين طالب السماوي]

يـــــــاعلي بهاي المسية .... تدفن أشلون الزجية
ماهجر روحك صبرهــا .... وانت شايلها الكبــرها
_____________________________
انا ادريــــــك واعرفـــــك ... ياعلي اتهز النوايب
لحظه ما يرجف دليلـــك ... لو تصب صب المصايب
اشعجب هليله تبجـــي ... وكلبك بـــاهاته ذايــــب
هــا يحيدر جنها صعبه ... ليلة افـــــراك الحبايب
هــا يحماي الحميــــــة .... شو وكعت اعلى الوطية
وشكبر حسره التجرها . .. وانت شايلها الكبـــرها
_____________________________
باب خيبر انت وحدك ... ياعلي إبجفك تشيـــــله
ولو جبل صار بطريقك ... والله هم تكدر تزيــله
ليش جا هسه الحبيبه ... عليك شيلتهه ثكيلـــله
مات حيلك يلصميــــده ... من هجر كلبك خليــله
ياعلي اليهجر حبيـــبه ...بكل وكت يسعر لهيبه
راحت الروحك تسرها ... وانت شايلها الكبــرها
_____________________________
انا ادري اتصد عليهـــا ... ياعلي إبســـاعة دفنها
لكن اصبر يلصميـــــده ... من تكرب انت منهــــا
خدها مسطور اعلطوله ... ياعلي اوارم جفنهــــا
وبالك وتوصل ظلعـــها ... لا تهيج بيها ونهــــــــا
الهسبب تركت وصية ... خلي ثوبي ايظل عليـــة
بهيده لاتلجم صدرها ... وانت شايلها الكبـــــرها
_____________________________
حتى الاملاك إبسماهـــا ... ياعلي صابتها حيــره
هي مو ميتــه الزجيـــة ... الوجه ليش وتـــديره
للحسن وحسين جنهــا ... تنظر النظره الاخيـــره
وجنها صاحت يمه زينب .. عالحزن بعدج زغيره
ميته والدمعـــه اعلخدهـا .. عينك اشلون وتصدها
زهرتك خـّلص عمرهـــا ... وانت شايلها الكبـــرها
_______________________________
من شلت بيدك زهرتك .... والكصد تمشي الكبرها
ما شفت خلفك سواده .... وما شغل بالك آمـــــرها
جنها زينب يلصمــيده .... خطوتك تبعت آثــــــرها
مو كصدها اتودع امها ... ياعلي اتـــّودع عمـرها
صاحت ابــلوعه وآذية ... بوية رد امي اليـــــة
ورادت اتلوذ بكترها ... وانت شايلها الكبـــــرها
_______________________________
قبل من تحزن يحيــــدر ... لو تحس انت ابمصيبه
هاية كلها اتروح والله ... ابشوفة الزهـره الحبيبه
هسه وين اتروح كلي ... ياعلي وروحك غريبــــه
وكلي جرحك من يضمده .. ياعلي وسافر طبيـــــبه
ام الحسين الوفيــــة ... منك اخذتهــا المنيــــــة
تقبل اشلون ابهجرها ... وانت شايلها الكبـــــرها
_____________________________






أهدي ثواب هذة القصيدة الى تلك الارواح الزكية
الى أصحاب النهج الحسيني أخوتي وأحبابي شهداء البحرين






ناصر الزهراء (ع)

حسين طالب السماوي