[ابو ياسر الكعبي]

عندما اعشق ... الى الامام الجواد عليه السلام


عندما اعشقُ

عسل كوس العشگ عند اليعشگون

........وآنـه الكـوس كـلهـا مـا أبـيـهـا

لأن أختِـلف عـن كـل اليحبـون

........ بعت روحي وقبـضهـا المشتريهـا

طبع باهل العشك كلهُـم يغـارون

........ الشَـك اگلـوبهُـم سيطـر عـليهـا

بعضهم عالبعض كلمـا يكذبون

........لَـواعجهـم مـلامـه امـبـطّـنيهـا

ولِذالك تشاهـد كـل الـعيـون

........مـا تِـقـبِـل الحـاجب يعتليـهـا

أخْـتِـلِف وياهم وكلهم يسمعون

........ لأن الروح روحي وأدره بـيـهـا

تريد الگلب بالحب كون مفتون

........ وهيَّـه تشيل نعشه ابيـن اديـهـا

بالحُب علِّمتني افنـون وفنـون

........ ومحّد بالحچـي يشبه حجيها

ولِهـاذه الهـوه امجنني بجنون

........اوّين تريد روحي امشي ابمشيها

بـأسم محبوبهـا يتشـرّف الكون

........ اُويِشَرف البشر عن بكرة ابيهـا

تِحبه ابكُبر حجم القلـم والنـون

........ ابحجم عالم الذر اليحِن ليهـا

تِحِب ابهالحجم لتگلّـي شلـون

........وَفيّه وربها للحُـب مصطفيها

إهِـي إتْنفِّذ وسادتها اليـأمرون

........وبالحُـب طايعه الربها اوّليها

لأن محبوبهـا ويّـه الينـزلـون

........ نـور إمن السمه ونازل عليها

إنولد تاسع فجر من اليِـنـورون

........بـنـور الرُسـل وبخاتم نبيها

الجَواد ابن الرضا هزّاز الحصون

........ جَواد اليمّه ابن حيـدر عليها

عله مَهده الرُسـل كلهم يطوفون

........روحه الخالـق الرب مرتضيهـا

عله روحه يصلّي خالـق الكون

........ ومَلائِـكْـة السمه صلّوا عليهـا

ابو ياسر الكعبي