[رحيم الحسناوي]

اجينه وياك..تحت لواك..ياعباس حامينه

اجتنه الكَوم..كلهه تحوم..يم حسين والينه
ـــــــــــــــــــــــ
يخويه الدنيه جيش رماح مسلوله وتريد النه..على حسينك تدور الخيل شيل الهم يصل عنّه
يجافل زينب الهه اليوم كوم وهوّن المحنه..ابوك ينضرك الكرار شَد بزنودك الضنّه
يمين شمال..الف خيال..تكَصدنه وتصد لينه
جثيره رجال..ياجفّال..كَر لبن الطهرعينه


اجتنه اهل الحقد هاليوم ثار وتطلب لعتبه..اميه الدم على الصوبين همهه من اخوتي تسجبه
تضن تاريح لابن الزور وابن الباطل تكتبه..ترد ثارات بدر الفات وحده بوحده وتحسبه
الك ناديت .. وترجّيت..يابو الغيره والنوماس
شيل لواك..صدّ عداك..حامي حسينك ودينه


شماته النه يروح حسين نار بكَلبي تتفجر..على الجفنين دمع العين يبن المرتضى توجر
اشوف الناس يا عباس مابيهم شهم ينغر..اريد الماي خويه جلاي نار وبالّلهب تسعر
كَضانه النوح..هاي جروح..عاين وانضر لحالي
دمع مسفوح..بيهه الروح..بارض الغربه تاذينه


انه ام اطهر خدر زينب انه اخت ابن الفحل كرار..بنت الدك قلع خيبر على اوغاد الدنى الاشرار
اشوف جيوش اجت يمي كصدهه تشب علينه النار..اشوفن ما خدر يبكه واشوفن هالعلل تندار
انه الحره..انه الدره..عقيله ومن نسل هاشم
الف حسره..على الغدره..يوم تولّو علينه


شحيح الناصر بهاليوم هيمه وغايب الوالي..اصد لبن الفحل عباس لو انضر على عيالي
حسافه وغايب الكرارردته يصد على احوالي..يصد غربة ضناه حسين وانه العبرة تبرالي
يسدهه احضر..تَكوم انغر..كَوم الحك على حسينك
الك كبر..حصن خيبر..ما صدّك تجافينه



على سروج المنيه هناك عباس الدنا تحوفه..تكَنطرعالشريعه بغيض يوم انبترن جفوفه
صرخ يحسين اردّ الديَن ابن الزهره ماعوفه..يضل كعبتنه ابو السجاد دنيا واَخره نطوفه
وكع عباس..ابو النوماس..طاح وطاحت حمولي
بكَت هالناس..والارجاس..بحبال وتجر بينه
رحيم الحسيني الحسناوي