[جابر النجفي]

بسم الله الرحمن الرحيم
اللهم صل على محمد وآل محمد وعجل فرجهم

الحامـــــــــــــــــي جــــــــــــــــــــاره
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ
زور المُرتضه وإكصدها داره == عنّك مو بعيد الحامي جاره
ــــــــــــــــــــــــــــــــــــــــــــــــــ ـــ
إذا عندك طلب للمُرتضه روح == وذا إنتَ بعيد إرسلها للروح
خلّيها إبضريح الوالي إتنوح == طبيب المرتضه وإيداوي الجروح
واليكصد إلَــــه يِطْفيها ناره == عنّك مو بعيد الحامي جاره
ـــــــ
نادي ياعلي مولاي منّك == رايد طلبتي ماروح عنّك
مَيْخَيّب علي الحمّاي ظنّك == ترد مسرور ينهي نار ونّك
تاخذ من علي الكرار شاره == عنّك مو بعيد الحامي جاره
ــــــ
روحك من تحل يمّه إو تزوره == تصير إبنص بهاءه إو فيض نوره
ياخذها العشق وإبأحلى صوره == تظل يمّه إو أبد مَتْعيف سوره
حب المرتضه أعظم تجاره == عنّك مو بعيد الحامي جاره
ــــــــ
إذا عندك قضيّه إو ضاع حَلْها == غير المرتضه محّد يِحِلْها
إطلب حاجتك والروح سَلْها == شِتْريد إو إجَتْ ممسوح ظلها
تاخذ من علي أحلى بشاره == عنّك مو بعيد الحامي جاره
ــــــــ
إذا إنتَ نخيته إو دمعه بالعين == يغطّي النور روحك ينتهي البين
ترتاح النفس والمعجزه إتحين == تزول إهموم منّك والضُوَه إيبين
نور المرتضه يرسم مساره == عنّك مو بعيد الحامي جاره
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ
مع تحيات شاعر اهل البيت / جابر النجفي
إسمعوا القصيده على هذا الرابط
http://www.wlidk.net/dldqsz47546.mp3.html