[سفينة البحار]

الى اخي وجميع شهداء المقابر الجماعيةالذين دفنوا احياء فروت دماؤهم ارض الوطن لتزهر الحرية

في ذكراهم العطرة

اللوحة الاولى :

خليني على بالك صرخة آ يحسين مازالت محت من راد يمحيهه

وخليني على خدك دمعه من محزون كضه العمر كله يريد يبجيهه

وارسم مرة بيدك لوحة ام مفكود تتنطر ابنهه وحس معانيهه

ما ضحكت ابد من راح حد ما يوم جنح الامل رفرف رد رجع ليهه

طاح الصنم صاحوا هلهلت في خوف هم ترجع الدنيه ويرد واليهه

وانتظرت تعد ما كملت عالراح من اول بدت وتريد تاليهه

ومن كشفوا مكابر بيهه بس عظام قصتهه بالم للناس ترويهه

ردت عالقديم الثوب الاسود ذاك يا ثوب الحزن يمفصل عليهه

اللوحة الثانية :

وارسم خد يتيم من الدمع شبعان وارسم شفته اللفرح عطشانه

وحسس فوك راسه بجف عطف واحسان وابد لتكله بابه وتلجم احزانه

لمن راح ابوه لليوم ما مرتاح سد عنه الفرح الواح بيبانه

زغير وعالمتن شال الالم والآه ضيم البعث كله وضيم دنيانه

على زغره ابو لامه وخواته يصير لاوه جفوف غول بذيج ذرعانه

عاف المدرسة لا .. همه ما قبلو ابو صفحة غدر من ناس خوانه

يشكك كلبه ثوبه مشكك من ازمان لو صاحت اخيته بليل جوعانه

يكوم يبيع عمرة البيت ما ينباع تسجل للرفاق وخذو عنوانه

والاصعب عليه لو لعب ويه اطفال يعرفونه ابن بس ابن لفلانه

اللوحة الثالثة : الى المسؤولين

هسه الامر بيدك عوض اللي راح رجع للبطل هيبته المسلوبه

هاي الكاع تشهد عالحدث من صار كل جبده اعتقد تلكاهه مصيوبه

لعب بيهه البعث بعثي ويدور افرار لعب بيهه البعث يا سامعي طوبه

واحدنه يهم من يطلع من البيت وعليه حتما اذا رد غير ادروبه

منكوبة اصبحت بالواحد وتسعين ولحد اليوم هاي (( الحيرة )) منكوبه

نريد اعلان منكم وانتو ملتمين ونريد الحك عليكم يفرض اسلوبه

الى كلمن وكع للوطن لجل الدين وصار الدين ابو والوطن محبوبه

نريد انشوف لوحه تظل تعرف الجاي في هذا المكان انريد منصوبه

لان حكهم علينه وهذا منهم صوت .. للدوم الحكوك تصير مغصوبه

للدوم الحلوك تصير مغصوبه

الحيرة : ناحية من نواحي قضاء المناذرة في محافظة النجف الاشرف

قدمت في يوم واحد (( 31 / 3 / 1991 )) اكثر من (( 500 )) شهيد

دفنوا احياء ليكونوا النواة لشجرة الحرية