[ام الدنيا]

طبعا انا شاكرة لكل الاعضاء اللى وافقوا على اختيارى وكل الحب للغالية سقيط الزهراء لترشيحها لى
واول شىء باقة ورد لعيونكم

بسم الله الرحمن الرحيم

انا اليوم عزماكم على شوربة سى فود وسمك وارز يارب تنال اعجابكم
والحلو كيكة الليمون ان شاء الله
اولا هنبدا بشوربة السى فود بالكريمة
مقاديرها هى
نصف كيلو جندوفلى _ربع كيلو جمبرى صغير
ربع كيلو كاليمارى _ربع كيلو سمك مخلى
نصف كوب فريش كريم _ كوب حليب
كرفس مقطع صغير وبصلة مبشورة وملعقة ثوم مفروم
ملح وفلفل وكمون وكزبرة جافة وزنجبيل مبشور وورق لاورا وحبهان ومسنكة
اولا الجندوفلى
هنجيب اناء ونضع بة زيت وثوم وكمون وكزبرة وفصين مستكة ونقلب واول ما يصفروا نضيفلهم الجندوفلى المغسول ونقلب وبعدين نغطى الاناء كويس ونتركهم لحد ما كل الجندوفلى بتفتح واللى متتفتحش تبقة غير صالحة وهنستبعدها خالص
بعد كدة هنجيب اناء اخر ونضع بة البصل المبشور والثوم والتوابل المذكورة كلها وزيت واول ما لونها يبقى ذهبى فاتح نضيف الكاليمارى ونتركة عشر دقائق وبعدين نضيف اربع اكواب مياة ونتركهم عشر دقائق حتى الغليان وبعدين نضيف الكابوريا والكرفس ولما تغلى عشر دقائق كمان نضيف الجمبرى ونتركة عشر دقائق وبعدين نضيف الجندوفلى واخر حاجة هنضيفها هى السمك ونتركة عشر دقائق وبعدين نضيف كوب من الحليب ونقلب ونسيبها تغلى دقيقتين كدة كل المكونات نضجت نضيف نصف كوب من الفريش كريم ونقلب كويس واول ما تغلى نغلق النار مباشرتا وبعدين نجيب طبق التقديم وناخد قطع السى فود فقط بدون الشوربة ونضعها بالطبق ونصفى فوقها الشوربة بالمصفاة

دلوقتى دور السمك انا قررت اقدملكم سمك بورى مشوى
وطريقة هى
حوالى 2 كيلو سمك بورى منظف جيدا
والحشوة بتاعتة هتكون عبارة عن ملعقتين ثوم مفروم مع بصلة مقطعة مكعبات صغيرة جدا مع كرفس وروز مارى وملح وفلفل وطماطم مقطعة مكعبات صغيرة جدا
والغلاف ردة
بنجيب السمك ونضع الحشوة بداخلة ونغلق البطن باعواد خشب وبالنسبة للى هيتبقى من الحشوة مش هنرمية لاننا هنصفية وهناخد المياة دى وهنخليها دلوقتى وهقولكم هنعمل اية بيها
بعدين بعد ما كل السمك خلص بنبطنة بالردة وبعدين نشوية عادى جدا وبعد ما نخلص من شواءة وهو لسة ساخن نضع علية الماء اللى صفيناة من الحشوة هيعمل اية قولوا معايا هيعمل تشششش ههههه

وجاء دور الارز كالاتى كيلو ارز مصرى مغسول ومصفى وجاف وملح وفلفل اسود وزيت وزبد وبصلة مبشورة
هنجيب اناء وهنضع بة البصلة المبشورة ومعها نصف ملعقة زبد وحوالى ملعقتين زيت ونقلب كويس لحد ما الارز يبقى بنى اللون
وبعدين نضيف الارز والفلفل الاسود ونقلب كويس وبعدين نضيف خمس اكواب من الماء المغلى لان كوب الارز المصرى بيحتاج كوب وربع ماء مغلى وبعد ما نضيف الماء نضع مكعب مرق سمك وملح ونتركة يغلى واول ما يتشرب المياة نهدى النار تماما ونغطى ونتركة ينضج

نيجى للحلو وهو كيكة الليمون
2 كوب دقيق _واحد كوب سكر_2بيضة _نصف كوب زبد غير مالح
ملقة ص بيكنج بودر_6ملاعق حليب _عصير ليمونة وبشر قشرها _مبعقة عسل نحل
يخلط الزبد والسكر جيدا ويضاف البيض ويخلط جيدا ويضاف البيكنج بودر المضاف الية الدقيق تدريجيا وييخلط جيداويضاف عصير وبشر الليمون ويخلط جيدا وبعدين ندهن صينية الفرن بالزبد ونرشها بالدقيق ونصب فيها الخليط ونضعها بالفرن على حرارة متوسطة لحد النضج وطبعا الفرن يكون شغال من قبلها وبالهنا