[المؤرخ]

بسم الله الرحمن الرحيم

السلام عليكم ورحمة الله وبركاته

لستُ ممن يحب الشعر الشعبي بقدر ما أميل الى الشعر الفصيح ولكنني مُجبرٌ على ذكرِ أمي في تلك الكلمات التي
سطرتها بعد سماعي للشاعر عبد الكريم الرائع الذي يقول في أحدى أبوذياته :
فوك الطم بعد بالك تحط طم ، وانة كلبي بفكد امي تحطم ، اعلى الكبر لالا تحط طم بعد ما ترد لا لو تحط مية ،

فقلت له :

اسئلك يا دهر ليش انتتة ظالم ،، تفرق كل هلي وكل الاجاويد
لان حبهم يتيم وما الة جناح ،، يطير وية الحمام بليلة العيد
ولان حبي سفينة وانت ربان ،، تتحكم بكلبي بلية تحديد
جذب كلمن زعم خوتنا ماتت ،، جا عاشت طيور بلية تغريد
ولا بيت الاخلاق انهدم بالخوف ،، ترى عينك تشوف الضمة تشديد
أنة من احجي اخلي بذاني حراس ،، اخافنك تكول الحجي بس كيد
لا تكتب علي وتكول انت انهار ،، ترى ماي البحر بالموزمة يميد
أنة طبعي مثل طبع النخل لو طال ،، يرجع للاصول وينحني أبئيد
عرفتك ذهب لامع وسط بركان،، وأخاف على الذهب من المساديد
أنة أمي تكلي نام وسط الليل ،، أخاف على الجفن من عينك يبيد
كلب امي كلب مذكور بالقرآن ،، سرة الفاتحة والحمد والتوحيد
باء البسملة بيمن بدت يا ناس ،، بسم حيدر علي راعي الشداد حيد
وألف امي بدت طيب ومحنة وشوك ،، وتاريخ الذكرهة بحمدة والتمجيد
وتمر بينة السنين ايام بعد ايام ،، واسم امي بمكابر ينحتة التجعيد
حضنت آنة الكبر وسط البجي والنوح ،، ولا اسمع جواب من الحبيبة يفيد
شكيت الهة اليتم من راحت من البيت ،، مثل كيد السلاسل بيدي ظل الكيد
حضنت انة الكبر ما بيه لا مفتاح ،، لا شباك لا باب وامد الايد
ذكرت آنة الحنان وشفتج يمة ،، من اتناغي لوجهي بليلة عيد
جنت آنة ملك والملك مو بس جاه ،، من اضحك احس الملك بية يشيد
وهسة انة فقير وعازتي عازة ،، ادور على الكلب لا جن هجرني بعيد
انة كلبي انطفة اكلوبة بفقد امي ،، ولا ضن كهرباء تعيدة من اجديد
كبرج يا عزيزة ريتة وسط الروح ،، حتى انة اوصي الدم يهفي بأيد
سلام الله على امي مثل ما كالوا ،، الجنة تحت اقدامج مشت بالعيد
الجنة تحت اقدامج مشت بالعيد .. والسلام عليكم

الله يحفظ أمي وكل امهاتكم ان شاء الله ..