[جعفر المندلاوي]

بسم الله الرحمن الرحيم
السبط المسموم
بقلمي : جعفر ملا عبد المندلاوي
22آب 2012 م الموافق 4شوال 1433هـ

كم مصيبة الزهرة شافت بالعمر ========= شافت ألوان المحن متعددة
مرة ابوها وعليّ مرة ومرة هي ========= تشوف ظلم الامة الهم قاصدة
والمصيبة الجرت على السبط الحسن ====== كلفة كلش على البتول الساجدة
من بعد غدر الصلح والي جرى======== نكث ذاك بكل عهود العاهدة
تكتمل بيه قالوا تلاثين عام ============= تنختم بيه الخلافة الراشدة
وگالوا الخامس هو من الخلفاء ======= وبعده ملك الجور ينشئ قاعدة
ويبتدي الارهاب وتهديم البيوت ======= وقتل وتشريد وصلب للساندَه
وشِطَب من ديوان كلمن شايعه ======= بالقمع والجور ، وكلمن ساعده
رجعوها الجاهلية بكل عناد ========= وتركوا السنة الشريفة الرائدة
وبظلمهم سمَّوا السبط الحليم ======== هو لحم النبي ودمه وساعده
يعني هُمه حاربوا دين الآله ======= وبالݘذب صوم وصلاة تردده
فوق هذا السم يحطوله بطعام ====== من زوجته الجعدة هاي الجاحدة
ينزل السم ويگطع جبدته ========== يتلوى ابن النبي الله يساعده
يصبر ويتحمل الضيم وظلم ===== وحُبه عالغايب فرض والشاهده
لان حب الحسن ميزان العمل ====== والما يحبه بسقر ربي واعده
وللبقيع اليوم شديت الرحال ======== ارد اشم تراب گبره بغرقده
وصّى گال الدفنه يم جدي الرسول ====== بس هذيج المرة لا لا تردده
اهناك من دفنوه عن جده بعيد ======= ونعرف الي منع دفنه بمسجده
ونعرف الي اجت عالبغله وتصيح === هذا ابن فاطمة وقبره انبعده
قال ابو السجاد ،، اوصاني الحسن === نرجعه لو منها أي مانع بده
وندفنه بصف جدته عند البقيع ===== ونشكي لله من ظلم هالملحدة
إنتفض عباس والموقف رهيب ======= نادى لبيك او سيفه مجردة
سيدي المجتبى ونعشك بالسهام === صار مرمى من النفوس الحاقدة
ويلهم من غضب سبع القنطرة ====== لو يجرد السيف صعبه يغّمده
شاف ابو السجاد عباس اقتحم ======== وشايل البتار يهزّه بساعده
اشلون نعش الحسن يُضرب بالسهام === ماني صابر سيدي على هالعده
انت صبرك لو يوزنونه بجبال ===== رجح صبرك عالجبال الراكدة
قال ضم السيف مذخور الوقت ====== بيوم انادي للنصير وافقده
هذا بيه الماي لسكينه تجيب ======= هذا بيه ارفع لوائي ويسنده
هناك من رجعوا بنعشك يا امام ===== ولا رعوا حق النبي والوالده
مجتف حسين بوصيتك ما يحيد === وصعب كلش ما يطبق مقصده
هذا حال الامة من بعد الرسول ===== تحارب بآل النبي وتشرده
لكن الشيعة تظل عبر العصور ===== عالمحبة الدم تضحي وترفده
لان حب النبي بدمانا يسير ===== وحب علي وآله ذخرنا الننشده
واحنه من ابعيد نبعثلك سلام ====== يلي بيكم شفنه ايمان وهدى
يا امام الناس يا اصل الكرم ====== ونور حبكم بالشفاعة نشاهده

ونسالكم الدعاء لوالديّ