[الصكر]

بعد ما ريد فيزه ولا لجوء انسان
عمت عين الاقامه الدنست صيتي
واشكر كل صديق وكل خوي وكل جار
قفل بابه ورفض يقبل عراقيتي
خلف الله عليكم والوكت دولاب
لا بد يوم ينزل بيكم ارضيتي
لان اول امس كل البشر خـدام
جانوا للعراق واكلوا ابيتي
جان الضيف عندي مكرم ومهـيوب
فوگ الراس اشـيله وهاي تربيتي
ما داعي اسولف وانه ابو النـهرين
ياهو الــما سمع اخـبار حنيتي
بعد بصمات اديهم والطبع موجود
من جانوا جياع بوســط صيـنيتي
يــا دنــيه حرام ومــنكر ومكروه
اذا ابـن العراق اليوم وطيتي
معـــقوله نسيتي اسم الـــعراق بساع
لــــــو مثل الــــبشر همّن تــــناسيتي
مــيفيد الحچي ولا تـــنفع الـچـلـمات
راجـع يـا وطـن لـترابــك الزيـــــتي
راجـــع يــا حـبـيبة گــلبي يــا بغداد
وادرى بكـــثر ما ونـــيت ونيـــتي
وادري لوحّدج عفناج صار سنين
وادرى من الحزن تابوت سويتي
جيب الاغتراب وحـــطه بالـــتابوت
يا غربه العراق شكثر اذيتي
ما اعيــش ابّحر مالح طـــعم يا ناس
انه بسجن الـــــفرات وفقط حريتي
وترابي ذهـــب والگاع من ياقــوت
ومن ثوب الكرامه البسهه بيريتي
واذا گالوا لترجع والوضع مو زين
اگول اني الوضع والزين تاليــــتي
وميهمني بعد ليصير خلي يصير
طعم الموت اشرف من هجر بيتي
اموت بوسط خوتي ويا حلاة الموت
من اجمع اهلـنه واكتب وصيتي
وصيتي لو متت لتچفنوني چفان
لفوني بعلمنه وهاي امـنيتي
واذا تردون اليه بهالگبر ارتاح
امانة الله دفنوا وياي جنسيتي
امانة الله دفنوا وياي جنسيتي

هذا القصيده للشاعر عاشق الأهات

منقول
الصكر