افديك بدمي وشرياني = يل دمك مصدر ايماني
يانور الله الوضاء = يابن علي والزهراء
افديك بدمي وشرياني
----
يحسين اسمع هاي الصرخه من عشاﮔـــك يا مظلوم
من يوم الطف نهتف بيهه ونصرخ بيهه لهذا اليوم
عنك ما نتنازل والله لو سالت من عدنه دموم
عهد انكتبت كل احروفه بالدم يا خامس معصوم
افديكَ بإغلا الأشياءْ = يابن علي والزهراء
يل نحرك فجر بركاني = افديك بدمي وشرياني
----
من دم نحرك يابو اليمه اتفجر بركان الامجاد
ونهجك دستور ومضمونه ثوره تواجه كل جلاد
انته الحق اليزهق باطل والهم واﮔـــــف بالمرصاد
وين الي تحداك بطيشه صدام وين ابن زياد
أين يزيد والطلقاء = يابن علي والزهراء
وين الي بحبك عاداني = افديك بدمي وشرياني
----
عاشورك لو هل اهلاله يتجدد طفك يحسين
وتجدد صيحات الاكبر والقاسم نسل الطيبين
ويرجع عباس بأيثاره ونشوف هناك الچفين
وترجع زينب وهيه تنادي يبن امي بدمعات العين
ونرى الانصار السعداء = يابن علي والزهراء
انصارك والكل متفاني = افديك بدمي وشرياني
----
يبن الزهره ومن تضحيتك ومن دمك صنت الاسلام
ضحيت ومثلك من ضحه وتحمل جور الظلام
لوما نحرك يا ثار الله ما ضل قران واحكام
وبيك الطف بيوم العاشر يتجدد كل عام وعام
قد عاد بنا عاشوراء = يابن علي والزهراء
وتتجدد بالطف احزاني =افديك بدمي وشرياني
----
يحسين اتقبل خدمتنه يل ما خاب الي ينخاك
رغم الطغيان وارهابه يابو اليمه واليناك
ياسيد شبان الجنه هالعالم داخل بحماك
نبقه على الموقف ونادي لــــﮕطع المنحر ما ننساك
يا نورا يعلو الجوزاء = يابن علي والزهراء
بيكم يتجسد عنواني = افديك بدمي وشرياني
---- شعر عمار جبار خضير
العرض الشجري