[الموسوي2009]

مل مني القلم ومن القلم مليت
عمت عينه قلمنه المانفع شعره
تعب حتى الشعر وي العراقيين
وصار بحال اهلنه وبالعراق ادره
رسمت حروف العراق برسم فنان
وجمعت اربيل والانبار والبصره
وكَلت لازم حروفي توحد الخوان
مامعقوله هيج اتصير فد مره
ورديت ولكيت ادموع عالوجنات
حروفي الي رسمتهه اليوم متطشره
كردستان تحجي بزود وتكَول
احنه العاصمه وبغداد متأخره
والانبار شالت سيف عالخوان
لو ليه الحكم لو فلش الاسره
والبصره تكَول اقليم احنه انريد
ومن نفط العراق الكم فقط عُشره
وشفت للفتنه والله العراقيين
دون حروف جر ياناس منجره
مذبوحه المحبه وناس تكره ناس
سوي اليت تحب والقابض الجمره
حتى الورد مايرضى بعد بالماي
من دمنه تريد الورده والشجره
رقم جبنه قياسي بالقتل والموت
وصرنه اول شعب نص اهله متهجره
نهر **** يناس من الجثث غركَان
خلي انمد ادينه ل**** ونجره
على جثثنه تدور هالفضائيات
ياهو الي يصور ياخذ الاجره
معصوبه العيون مكتفه الايدين
وانواع الرصاص مكوم بصدره
لا اهله اجوي وجفنوه بجفان
مجهوله الهويه ومن دره بأمره
وشوف امه الحنونه الصايمه برمضان
ما فطرت بقت والله تنتضره
تنتضره يرد وتريد تحجي وياه
لان بالعيد لازم ينكَطع مهره
وهل باعت ذهبهه بشارع الصياغ
حتى تزوج ابنهه المافرح عمره
مانامت بقت سهرانه طول الليل
اياليل العراق المابزغ فجره
وما جاهه صبر طلعت تدور اعليه
مثل طلعت حمامه بعينهه العبره
ما شافت ابنهه وجاهه ملك الموت
تعرف شنهو يعني لتموت بالحسره
معناها الفرح صاير مثل رجال
شايل ورده بيده وخنجره بضهره
معناها عراقك قاتل ومقتول
سوده كَلوبهم وعقول مفتره
وكل هذا ويكَلي احنه العراقيين
سنه وشيعه عشنه الحلوه والمره
لا والله جذب احنه العراقيين
سني وشيعي عشنه الضره ع الضره
ملينه الجذب وليمته وليادوب
واقع حال لازم نخضع لامره
ملينه الجذب وليمته وليادوب
قصايدنه اجت للناس متأخره
نعم خوان احنه وياك اني بهاي
بس مو من بعد تفجير سامره
بعد تفجير سامره العراقيين
مثل فلم الرعب ودمايته الحمره
القتل مو عالهويه هواي متوهمين
صار عالاسم كَص راسه ويشمره
واليكَلي تبالغ انته حيل ابهاي
جبت حجه ودليل وياي هالمره
اتحده بكر واتحده ابو الخطاب
فن واح البيهم يوصل الثوره
واتحده علي واتحده هم حسين
اذا الفلوجه طبهه ومن**ر ضهره
صفر كل النتائج للعراقيين
بس بالفتنه جابو عشره من عشره
هذا ايكَول سني ناصبي اغتالوه
وذاك ايكَول شيعي رافضي انكفره
ضلو بهالسوالف ياخزي ويا عار
واسرائيل شعلة نارهه الكبره
يول وين الشرف جدامكم بغداد
شكَو ثوبهه وأخذوهه متأسره
اغتصبوهه الكفر ما تسمعوهه اتصيح
انه ام الشرف واليوم مو عذره
بعد والله ماينفعنه قيل وقال
لان كلشي انتهه ون**رت الجره
مرحوم العراق استشهد من سنين
ياوسفه بقت اشلائه منتثره
منتثره بمزابل يمهه كوم كلاب
اكلت من لحومه ومادرت سره
صير وياي بس هالمره اترجاك
عيب من العراق اليوم نتبره
صعبه بمزبله جثت العراق اتصير
خلي انشيله منهه وندفنه بكَبره

مع تحيات
الموسوي 2009