[احمد العراقي]

الك خطواته گلبي ابشوگ ينگل
يمن حبك چبير اشلون ينگل
سهل اسمك بثلث حروف ينگل
علي ومعناه عد الله ونبيه

من يعز الماي باحضان البحار
يطفح اسمك ماي ويزيل العطش

ومن تعز لگمة حلال اعله الفقير
ايشوف جودك خير جدامه انفرش

من يعز حچي الصدگ وسط الجدال
تبرز انته ويختفي لسان الدغش

ومن يعز ستر الدهر عن العفاف
تصير ستره البيك ما يوم انخدش

يا خجل گطرة حيا ابوجه الكرام
من تشوف العوز بالفقره نهش

يا امل فجر اليتامه الترتجيك
اتحنّي چف مصباحها العَز ما غبش

يا ربيع اسنينها وفيّ الحنان
ويا نسيم احلامها البيك انتعش

يا فرج جفن الارامل بالسرور
العاش .. بالفرحة ولا مرة رمش

يا ذخرنه وزودنه ابوجه السنين
ويا صبرنه الـ ما رخه ابيوم ورعش

يا امان اگلوبنه ابخوف الضباب
البيه مسير انهارنه الحاير بلش

صوت حق الله عرفناك ابيقين
الماوعاك ابزيف لب سمعه انطرش

انت وثبة نور بعيون الظلام
غير عمرك ماكو بسنينه بطش

ثق يحيدر كل گلب مؤمن نظيف
حروف اسمك خالصة ابنصه نقش

ايخفگ ما ضمته الدنيا علم لاك
وعقول هواي حيرها علم لاك
تباهي الخالق ابخلقك عالاملاك
علي وخلاك ميزان البريه

لان بحروفك علي اسرار الحياة
در طهور ارواحنه ابحبك روه

ولان بحروفك تشع شمس اليقين
ابعز ظلام ارحامنه انشوفك ضوه

ولان بحروفك علي صك الامان
الخوف من صحنه علي ابرهبه انزوه

ولان بحروفك علي اسباب النجاة
بيهن ادم تاب لله امن انغوه

ولان بحروفك علي سر الثبات
الما يضمهن للردى اشيعله هوه

ولان بحروفك يشد حيله الصمود
بغير اسمك عزم كل صامد خوه

ولان بحروفك معاني المعجزات
بس مديح الله الك بالمستوه

الله بانوارك خلق فيض الوجود
وياهو مثلك اية القدره حوه

الله باوصافك مزج روح الكمال
والفضل بچفوف ينبوعك طوه

الله بسنينك ختم سِفر الخلود
ودونهن چا ضاع وي هب الهوه

معدن الايمان يا حامي الدخيل
اليضدك والكفر بالله سوه


احمد العتابي
العراقي

[مرتضى شكر]

فوك شفتينك نزف ماي الغدير
بالولايه لحيدره حرفك ضوه

أحسنت كثيرا

مرتضى شكر
النجف الأشرف

[والي مطر]

تبجلاتي لقلمكم الراقي دمتم قلما مواليا عبقا كعبق الياسمين دمت طيبين ...تحيتي

[وللبكاء بقيه]

وربي ابداع تسلم ولا عدمنا هذه الايادي الحيدريه

[احمد العراقي]

السلام عليكم
اخي الكريم مرتضى شكر
ممتن كثيرا لتواجدكم المبارك وحروفكم البهية
شكرا جزيلا لكم ولا حرمنا الله تعالى بركات تواصلكم
تحياتي لكم وكل عام وانتم بالف خير بعيد الولاية الاعظم

[سعودي شرقاوي]

مشكور
وربي يوفقك

[ثورة الحسين]

اثابك الله بحق محمد وال محمد الاطهار (ص) وادخلك الجنة
اخوك الصغير (عبدالله الشاعر)

[علي البههادلي]

احسنتم وجزيتم خيرا على ماسطرتموه من كلمات ولائيه حيدريه
جعلت ذخرا لك واثابك الباري ورعاك
ماجورين بمحمد واله الطاهرين

[رآحيل]

الله بسنينك ختم سِفر الخلود
ودونهن چا ضاع وي هب الهوه

معدن الايمان يا حامي الدخيل
اليضدك والكفر بالله سوه
’’’’’ العتابي بارك الله فيك على هذا الناثر من طياته روعة
متصفح مبارك بذكر علي .ع.