شنو الغمازة بالضبط؟
شكلها مثل حفرة أو “انبعاج” في جلدة الويه، غالباً تكون في جهتين الوجه، لما تكون بجهة وحده هذي حالة نادرة.
شنو سبب ظهور الغمّازة؟ وشلون تصير؟
ويهك فيه وايد عضلات، إي يعني ويهك معضّل، شد ويهك هووووب !
ويهك بو عضلات هذا فيه عضلة مهمة يسمونها العضلة الوجنية الكبيرة – Zygomaticus major muscle، هذي العضلة اهي اللي تشد ويهك عشان تضحك أو تبتسم يعني موجودة تحت خدودك وممتدة لحلجك، شوفوا صورتها وين صايرة بالضبط:
أهم شي لا تخافون ماكو نفط داخل غمّازاتكم ، تركيبة وشكل العضلة مرات يسبّب وجود حفرة لما تتقلص أو تشتد عشان تضحك حضرتك العضلة هذي مرات تكون مزدوجة ولما تنقبض جزء منها يصير فوق الثاني ومع حفرة الجمجمة تسبب بالأخير تكوين الغمّازة! أكثر شي اللي عندهم غمازات تكون عضلتهم الوجنية هذي أقصر من اللي ما عندهم غمازة. مرااات يكون سبب الغمازة بس شحم زايد بويهك، وهالغمازات مو دايمه، تروح متى ما اختفى هالشحم بس يحسبونها دليل سلبي على مستواك الصحي.
عموماً يعني سالفة بسيطة وعادية، بس لما تشق ويهك الابتسامة -أو لما تقعد تسولف وانت مندمج- شكل العضلة وترتيبها يرسم مثل حفرة بقَسَمات ويهك… اتعب على رسم القَسَمات عشان جذي الغمّازة غالباً تبيّن بس لما نضحك أو نبتسم، لما العضلة تنقبض بقوة كافية انها تبيّن هالحفرة، نادراً تكون الغمّازة مبينة على طول.
مادري ليش بس الناس يحبون الغمازات ويشوفونها من علامات الجمال وهالشي تقريباً عالمي بس مشهور اكثر شي بالدول الآسيوية، يمكن لأن الغمازة يعتبرونها صورة من صور الشباب وصغر السن، اليهال وايد يطلع لهم غمازات بس تختفي مع العمر، الظاهر العضلة الوجنية تكون لي الحينها مو مستويه يبيلها وقت عشان تكبر.
بعض الآراء تقول ان ظهور الغمازة متصل ببعض الجينات الوراثية بس بعضهم يقولون الأدلة قليلة لدعم هالراي، اللي يوافقون على سالفة الجينات الوراثية يقولون إذا كان أحد الوالدين عنده غمّازة راح تصير فرصة ظهور غمّازة عند أحد أبناءهم 25-50%، أما إذا كانوا اثنينهم عندهم غمّازات العيال يصعد احتمال ظهور الغمّازات لهم من 50-100%!
عموماً عرفنا السبب سواءاً كان جيني ولا غير جيني.
تحياتي
ليش بعض الناس عندهم غمّازات؟
العرض العادي
