[علوي الهوى]

شلون أصبر على الاه
الشاعر : جابر الكاظمي


شلون أصبر على الآه.. و أترك نحيبي
بيدي دفنت بالـﮕـاع .. جثة حبيبي
لتظن يطيب .. جرح الحبيب .. و أترك نحيبي

تعنّى يم علي السجاد .. أبو حمزة الثمالي اليوم
يـﮕله سيدي الوادم .. بِدَت تحـﭽـي و عليك تلوم
شكثر تنحب يبو الباقر .. يـﮕولون النحب مذموم
يريدونك تكف دمعك .. تعيش بلا كدر و هموم

و عن دمعتك يـﮕلون .. لمن تسحها
هالدمعة للأموات .. تلـﭽم جرحها

خايف تصير .. جرح الحبيب
لتظن يطيب .. جرح الحبيب .. و اترك نحيبي
***********

شلون أصبر على الآه.. و أترك نحيبي
بيدي دفنت بالـﮕـاع .. جثة حبيبي
لتظن يطيب .. جرح الحبيب .. و أترك نحيبي

يجاوب حُجة الباري .. و يصب دمع المحاجر دم
يـﮕله يا أبو حمزة .. الوادم حـﮕها ما تعلم
أنا القابض على الجمرة .. و يظللني سحاب الهم
أطَشر بالصبر حزني .. و ردود الحزن يلتم

و الوَجرت بحشاي .. نار المصيبة
شحال اليصد و يشوف .. مصرع حبيبه

يسعر لهيب .. جرح الحبيب
لتظن يطيب .. جرح الحبيب .. و اترك نحيبي
***********

شلون أصبر على الآه.. و أترك نحيبي
بيدي دفنت بالـﮕـاع .. جثة حبيبي
لتظن يطيب .. جرح الحبيب .. و أترك نحيبي

يبو الحمزة البعض يفـﮕد .. عزيزه يظل عليه بنوح
و يظل طول الوكت ينحب .. و لا يملك زمام الروح
و هذا آنة الشِفت أهلي .. ضحايا بين ايدية تروح
بين الـﮕطعوا ﭼفوفه .. و بين اللي وﮔـع مذبوح

حـﮕـه اليريد يلوم .. و يبدي الملامة
ماحاضر و لا شاف .. جثة إمامه

دامي و عجيب .. جرح الحبيب
لتظن يطيب .. جرح الحبيب .. و اترك نحيبي
***********

شلون أصبر على الآه.. و أترك نحيبي
بيدي دفنت بالـﮕـاع .. جثة حبيبي
لتظن يطيب .. جرح الحبيب .. و أترك نحيبي

يلوموني يبو حمزة .. و لا علينفجع معتب
فَرِد يوسف فـﮕد يعـﮕوب .. و ظل طول العمر ينحب
و أنا شـﭽم يوسف ﮔـبالي .. أشوفه على الثرى امترَب
رجع يوسف و أنا الما عاد .. حبيبي و بالدما تخضب

يوسف عَدِل ماطاح .. جسمه و تعفر
و ﮔـبالي جسم حسين .. طاح و توذر

خلف نحيب .. جرح الحبيب
لتظن يطيب .. جرح الحبيب .. و اترك نحيبي
***********

شلون أصبر على الآه.. و أترك نحيبي
بيدي دفنت بالـﮕـاع .. جثة حبيبي
لتظن يطيب .. جرح الحبيب .. و أترك نحيبي

يبو حمزة العتب مذموم .. على اللي فـﮕد ضي عيناه
يلوموني البعض حـﮕهم .. محد شايف الشفناه
ماشافوا طفل ضامي .. عوض ما تطفى نار حشاه
تصيبه بمنحره النبلة .. و يتروى بنجيع دماه

و لا شاهدوا عريس .. و موذرينه
و تتحنى من دماه .. راحة يمينه

بالدم خضيب .. جرح الحبيب
لتظن يطيب .. جرح الحبيب .. و اترك نحيبي
***********

شلون أصبر على الآه.. و أترك نحيبي
بيدي دفنت بالـﮕـاع .. جثة حبيبي
لتظن يطيب .. جرح الحبيب .. و أترك نحيبي

يبو حمزة الزلم تطلع .. تقاتل تعرض المنحر
لـﭽن شنهو الجعل هالـﮕوم .. تشن غارتها عالخِدَر
عـﮕب ذبح الزِلِم بالطف .. علينا صالت العسكر
الأرامل و اليتامى بخوف .. هَجَت و الخيم تسعر

مرفوعة ليش الروس .. فوﮒ العواسل
ليش بيسر للشام .. تمشي الأرامل

و اللي يجيب .. جرح الحبيب
لتظن يطيب .. جرح الحبيب .. و اترك نحيبي
____________
اتمنى ان اكون نفعتكم

[ثورة الحسين]

قصيدة شماء وروعة
لك فائق الاحترام
اخوك
عبدالله العتابي

[الروح]

بوركت الأيادي للنقل الموفق..؛
جزاكم الله خير الجزاء..
تحياتي وتقديري

تنقل لقسم الشعر الشعبي

[الشاعر حسن خليفه]

طيب الله ذكرك وانفاسك وطهر صدرك

ورزقك شفاعه محمد واله الطيبين الطاهرين عليهم السلام

قصيده رائعه بميزان حسناتك ان شاء الله

تقبل مروري

اخوك الشاعر

حسن خليفه

البصره

[علوي الهوى]

تحياتي لكم اخوتي الاعزاء عبدالله العتابي
الروح العطر المقدس الراقي

[علوي الهوى]

الشاعر العزيز حسن خليفة
تحياتي لك ولكل اهل البصرة انا ايضا من اهل البصرة

[ابوتكتم الخير]

إختيارك لهذه القصيدة العذبة
دليل على ذوقك الرفيع
نسأل الله أن يحقق لك
مرامك
يا رفيعا للهوى بحب
علي
ابوتكتم الخير

[علوي الهوى]

اثلجت قلبي بردك الدال على تقديرك
كلام الاخرين وشعورهم يحفظك الباري
ابو تكتم الخير
----------------------
تحياتي لك دائما اتمنى ان تسعفنا بكلامك هذا