شباب اليوم جايبلكم قصيده تعكس واقع حدث في العراق واتمنى ان تنال اعجابكم
ما احساسك
يسالني الصحفي الاوربي؟؟
ما احساسك
ما احساسك وانته الان بنص اوربا
في قمة عصر التقنيه
ما احساسك...
لو عندك حاسوب وانتنريت
وتراسل بالالكترون
ومتحس بغربه وحنيه
نقالك عبر الاقمار يطلع وجه امك يوميه
ما احساسك
لو فتحت كلبك والحصوه باليزر
يداون كلهن ومتحتاج لاي عمليه
ما احساسك لو باليزر
محو امراضك اسهل من محو الاميه
ما احساسك لو عالغيم اتعلك شقتك
والنجمه اطب من نافذتك
وتبات بحظنك ليليه؟؟
احساسي اتلفظه انفاسك
من اني اسال وانت تجاوب
ما احساسك
ما احساسك لو يتبدل حالك حالي
وناسك ناسي وناسي ناسك
ما احساسك لو تنسى الشقق الجويه
ما احساسك
لو تصبح اكثر شعبيه
ما احساسك لو تسكن بالحيانيه
ما احساسك لو كل ساعه ماجر غرفه
ونكله اجولاتك يوميه
لامن شغله ولا يوميه
وضلت بجيوبك بس ميه
ما احساسك
بيش اتجيبون الكميه
ما احساسك لو صوبتكم ما تتعله
ولاتتنصه ولا تتطفه
الا تذب فوكاها اميه
ما احساسك
لو وكتك ضكك فد نوبه
تداين خبزات وروبه
وخبز وروبه وخبز وروبه
وجيرانك دكتلك بابك
خويه انريد افلوس الروبه
ما احساسك من تظمر اتبيع الصوبه
ما احساسك
من تفتر ابسوك الجمعه
وشايلك من بيتك سلعه
عمي بتسعه عمي اتوكل بالله بسبعه
شايف خير وتستاهلها
شلعت بيتي ابيتك خلها
ومن يكعد يحسب بفلوسك
وي كل ورقه تنزل دمعه
ما احساسك
لو يوم تخلص كميتك
والجوع يلوجابزريتك
تبجي دموع تبجي عيونك
بجيك ما يترس صينيتك
اتكوم اتدعي وانت تصلي
باصدق نيتك يارب ريتك يارب ريتك
يارب ريتك تنصرنا ..يارب ريتك...ياريتك
والصاروخ يطيح ابيتك
ما احساسك
لو نص ابنك طك براسك
ما احساسك ...لو كتلك اترك احزانك
حس بشعبك او جيرانك
ما احساسك لو عينك شافت بنتين
بعمر الخمسه وست سنين
رادن يمشن رادن مره بلعبه يلعبن
بس ما كدرن متعوقات بلا رجلين
واتخيل عدهن رجلين ويلعبن ختيله براسك
ما احساسك
ما احساسك لو مريت بسوك وبنتك كالتلك
بابا جوعانه بابا جوعانه ....جوعانه
تكسر كلبك اتكوم اتمد ايدك بجيوبك
تلزم فخذك ...ماكو بطانه
وثكل الدمعه يدنك راسك
مو للكاع الشلفة بنتك انقهرت كلش
باستك مالازم بابا وندمانه
تسمع صوت ايصبيح ادفعلي
وصوت الثاني يكلك اني
لاانه...وانه...لاانه
وتباوع كلهم ديانه
اشرف واحد بالديانه
اتجسر....ومد ايده ابجيبك
وكض بس رجليك العريانه
ماكو بطانه
طلع ايده ...راح الاول .....راح الثالث......راح الخامس
ما احساسك
فخذك يعلن عن افلاسك
ما احساسك ....لو راسك بيه لعب الشيطان
وبكلبك قل الايمان
نهي هالعيشه خوف وذله وظلم وحرب وجوع
ودربك ما تكدر تندله
وما تملك بالدنيا جكاره
هم حاسب نفسك انسان
سويلك يمعود جاره
اتكوم تصيح.....يا شيطان....ياشيطان
بس عد الله اهناك الجاره
بس عد الله هناك الجاره
وتجيت حدر السياره
ما احساسك
لو داس ابريك وما داسك
ما احساسك ....لو اني السبب بالامك
واجسر واوكف كدامك
واجرا واسال احساسك ....ما احساسك
ما احساسك
قصيدة مؤثرة جدا بل ملحمة تفري القلب وتطحن العظم
إنا لله وإنا إليه راجعون والحمد لله حمد الصابرين على كل حال
أدام الله وزاد إيمانك أخي وتوفيقك وسعادتك وحفظك ورعايتك
وتسديد خطاك وتألق حضورك وتألق أسلوبك
نائل المظفر ما احساسك
العرض العادي
