قارنتك علي ويه اليحكمون
ولكيتك يا علي مفرط بالأحكام
شنو تحكم الدنيا وعرشك بساط
وشنو بجامع مقر القائد العام
وشنو عود اليتيم يكضلك الباب
اليتيم يروح يسكن دار الايتام
جا ما عادهه ولا كضلك الباب
كون بصدره قنبر ساحب اقسام
كلشي يصير مدري يفخخ البيت
تحت مهرك يجوز يحطلك الاغام
علي شعليك اذا بالشام جوعان
دشبع حزبك ونعلة ابو الشام
تكضي الليل تفتر وانت مسؤول
السياسي الزين كون المغرب ينام
بين الناس تخطب لايبو حسين
علي المفروض تخطب من ورى الجام
كثر نوك واطلع موكب وياك
وانشر عل درب رماية سهام
ناكة مضللة وتركبها ابو حسين
وعمار ابن ياسر كعدة جدام
وخل مالك الاشتر كبلك يفوت
يكطع كون سير الشارع العام
بدولتك هم جنت تنجز مشاريع
وهم تاخذ1 مقابل بصمة ابهام
فضة وقنبر شكد يا علي انطوك
يله تعينوا بالبيت خدام
عقيل شراد منك حتى تجوي
اخيك هاذ ضمه لظهرك احزام
كبل ماكو دمج وتدمجه مولاي
علي سجله سياسي مهدم الاصنام
شعجب ولدك علي ما طلعوا ايفاد..!؟
تدزهم عل بحر يكضولهم عام
دبرلهم عذر خلهم يصيفون
بحجة مشوا دورة بنشر الاسلام
علي تنطي الخبز تتلثم شبيك ..!!
جا ما كشفت وجهك للاعلام ..!
جا ما صار بينا الصار مولاي
وضل ياهو اليجي وكال انه ابو لثام
التعديل الأخير تم بواسطة الروح ; 05-11-2012 الساعة 02:36 PM.
الشاعر نهاد الخيكان رائعته (( قارنتك علي ويه اليحكمون))
العرض العادي
