على الساعه 6 ونص اعلنوا المطار للركاب الى على متن الخطوط السعوديه التوجهه للبوابه الرابعه لرحله 307 المتوجهه لمطار الملك فهد بالدمام في الممكله العربيه السعوديه ....اخذ عبدالعزيز الشنطه من سارا وترك عندها بس شنطتها الصغيره .. وسحب شنطته ووقفوا بالسره عشان يركبون الطياره ... بعد ماركبوا واخذوا اماكنهم ..كانوا جالسين بكرسين بالنص ... مالقوا مقاعد عند النافذه ... سارا كانت تحس انها تعبانه وفيها النوم ... وفي نفس الوقت حاسه برهبه وخوف من الطياره .. اقل من الخوف الي حسته اول مره .... اخذت بتربط الحزام وفقامت ايدها ترجف .. ما تدري هل هو من الخوف او من التوتر للحياه الي ما تعرف ايش راح تعيشها ....
عبدالعزيز: سارا الله يهديك هدي من اعصابك ماراح يصير لنا شي....
ومد ايده عشان يربط لها الحزام .. بعد ما خلص وتوه بسحب يده سارا تمسكت بها باقوى ماعندها..
سارا: عزيز انا خايفه
عبدالعزيز بنظره كلها حنيه: لا تخافين حبيبتى انا معك ... اصلا مابعد تطير الطياره...
سارا: لو طاحت الطياره
عبدالعزيز: ماراح تطيح ... لا تخافين
سارا: طيب اذا طاحت
عبدالعزيز: اذا طاحت بموت انا وياك وماراح يصيح احدنا على الثانى
حست سارا بسكينه تدخل قلبها طيرت خوفها...عزيز يموت.... يموت ويتركنا ... لا مستحيل انا افضل انى اعيش معه وهو ما يحبنى على انى اعيش من غيره ...
سارا: لا تقول كذا عزيز
عبدالعزيز: انا ادري عنك جالسه تتشائمين ..
مشت الطياره وزاد ضغط يد سارا على يد عبدالعزيز ....
عبدالعزيز : اقول سارا
سارا وعيونها بحضنها ومسكرتهم بقوه: نعم
عبدالعزيز: شوفينى
رفعت سارا وجهها وشافت عبدالعزيز
عبدالعزيز: ايه كذا زين...
سارا: ايش تبي
عبدالعزيز: الله ايش هذا
سارا: ايييش...
عبدالعزيز: الي هنا
وياشر على خدها اليمين ... لمست سارا خدها ..
سارا: ايش فيه...
عبدالعزيز: تصدقين تونى الاحظ هالحبه خال الي عندك
سارا: والله انك فاضي
عبدالعزيز وهو يبتسم: بس محليتك مره...
سارا: عزيييييييز انا حالتى حاله وخايفه وانت تتكلم عن حبه الخال هذي
عبدالعزيز: من ايش خايفه
سارا: الطياره الحين بتقلع
عبدالعزيز: هههههههه طلعتى عياره وماعندك سالفه الطياره خلاص قلعت والحين حنا بالجو..
سارا فتحت عيونها: والله
عبدالعزيز: ايه والله ... شفتى ما حسيتى ولا شي
سارا: ههههه ايه والله ما حسيت ..
وشافت عزيز بنظره يعنى انى فهمت حركتك ...
سارا: انت حاولت تلهينى صح
عبدالعزيز: هههههههههه وانجحت الخطه
سارا: هههههه..ايه والله ..
عبدالعزيز: بس الكلام الي قلته لك حقيقي...
سارا باستغراب: أي كلام؟؟
عبدالعزيز: حبه الخال هذي محليتك
احمر وجه سارا .. حست به حار مره ... راحت وخذت المجله الي قدام كرسيها ...
سارا : نشوف برنامج الطياره ايش
عبدالعزيز: ههههههههههههههههههه..
مشى لها الموضوع يا حليلها لازالت تستحى منى على اقل مجامله او مدحه... من جد هالانسانه كل مره تسحرنى اكثر واكثر
بقى ساعه على هبوط الطائره ببلاد الحرمين الشرفين... الوضع بالطياره مرره هادي.. واكثر الركاب نايمين ... والى مو نايم حاط السماعات باذانه ..يا يشوف التلفزيون او يسمع الراديو ...عبدالعزيز كان يقرى جريده الرياض الي وزعتها الطياره في بدايه الرحله ... اخذ يقرى الاخبار والاوضاع الي تعم الامه الاسلاميه والعربيه ...مع ان الاخبار كانت توصلهم بالسفر بس مو مثل الي مذكور بالجريده .. من جد كانت تضيق الصدر ... بعد ما شافها كذا سكر الجريده وحطها بالجيب الي بالكرسى الي قدامه ... لفت على سارا وشافها نايمه ولافه على الجهه الثانيه... حس بالارهاق .. بس مابقى شي وما يصير ينام الحين .. راح للحمام عشان يرشح وجهه بالماي ويتنشط .....بعد مارجع لكرسيه شاف سارا خلاص قامت ....
عبدالعزيز بابتسامه تهبل: صح النوم
سارا ردت له الابتسامه: صح بدنك...
وحطت ايدها على فمها وتثاوبت: وصلنا
عبدالعزيز بعد ما رفع ايده : بقى حول الساعه...
سارا: يووووه... يعنى نمت كثير
عبدالعزيز: هههه... تقدرين تقولين
سارا : وانت مانمت..؟؟؟
عبدالعزيز: لا ماجانى...
سارا: اوكي انا بروح اغسل وجهي واغير الشيله والبس شيله سوده
وقامت سارا و راحت ... دق عبدالعزيز للمضيفه وطلب له كوفي عشان يتنشط ... رجعت سارا وجلست مكانها
سارا: عزيز كم الساعه بالسعوديه الحين...عشان اغير الوقت بساعتى
عبدالعزيز: وحده وربع...تبين قهوه
سارا: لا مابي....مو تعب عليك ؟
عبدالعزيز: ليه تعب؟
سارا: لانك مانمت
عبدالعزيز: اذا وصلنا بارتاح انا الحين تمام...
وسكتت سارا ... رجع الهدوء يعم من جديد عليهم ... عبدالعزيز يشرب قهوه وهو بعالم .. وسارا بعالم ثاني... كانت تفكر معقوله وصلنا لدرجه ما عندنا موضوع نتكلم فيه .. ايش السالفه وليه هو ما يبدا الكلام.. كيف بتكون حياتى معه .. شلون بنعيش ... كانت تحس انها متوتره.. طول الرحله ما تبادلت معه أي محادثه يمكن توخذ بالاعتبار .. الى ان ازهقت وفضلت تنام ... لو بعيش معه هالعيشه بتكون حياتنا ممله ورتينيه.. هذا خمس ساعات ماعرفنا كيف نقضيها .. شلون العمر كله .. لو يحبنى كان هان الموضوع شوي.. بس انا بعيش مع انسان ما يكن لى أي شعور .. وزياده على كذا مو معبرنى مره ... لفت عليه وشافته يشرب القهوه وهو مركز على شي ..تابعت نظراته شافته مركز على خيط طالع من الكرسي الي قدامه .. واضح انه سرحان ويفكر بشي... الله لو بس اقدر ادخل لهالمخ .. واعرف هو يفكر بايش... لو اعرف ايش ورى هالقناع بس.. شلون اقرب منه هو بانى بينى وبينه جدار كبير ... صعب على الواحد يجتازه ... فجاه لف عزيز عليها وتلتقى عينها بعينه ... وعلى طول تلف راسها ويحمر وجهها كانه ضبطها بالجرم المشهود ... ابتسم عليها .. هالانسانه تدهشه وليومك هذا تستحى منه .. لفتت نظره حركه ايدها كانت تدير دبلتها بايدها الثانيه .. وحركتها كلها توتر ... سارا حست بمراقبه عبدالعزيز لها وماعرفت كيف تتصرف.. ما تحب تكون تحت انظار احد ... بس حتى انا كنت اراقبه .. والمشكله انه حس ووشافنى وانا ارقبه .. ايش فيها اصلا .. انا ليه يحمر وجهي.. لمتى اظل كذا .. الحين بيظن انى بزره والى الحين استحى .. هو ليه يشوفنى الحين .. مايدري انه جالس يوتر اعصابي ..وقامت تلعب بدبلتها من غير ما تحس ...
ولعت لمبه اغلاق احزمة الامان ... واعلن الكابتن عن وصول الطياره لاجواء مطار الملك فهد بالدمام ... ازداد توتر سارا ..
عبدالعزيز: سارا...سارا شوفينى
لفت عليه سارا: نعم
عبدالعزيز: سارا ما يصير كذا لمتى بتخافين
سارا: مو كيفي..
عبدالعزيز: طيب ايش رايك نسولف.. عشان ما نحس بالهبوط
سارا: مابي اسولف ..
وغمضت عيونها بقوه
عبدالعزيز: افتحي عيونك وشوفينى .... الحين انتى ليه دخلتى تصميم داخلى ..
سارا وهي لازالت مغمضه عيونها: لانى احب اصمم الاشياء وخصوصا البيوت
عبدالعزيز: يعنى هذا حلمك .. افتحي عيونك ياسارا
افتحت عيونها وقالت: ايه ..
عبدالعزيز: بس مجاله مو مره كبير.. انا سامع انه ماله مستقبل
سارا: انا عندي فكره
عبدالعزيز: الي هي
سارا .: اخاف اقول لك وتضحك علي..
عبدالعزيز: جربينى...
سارا وهي خلاص اندمجت بالسالفه: شوف مره كنت اقرى قصه .. وكانت البطله فاتحه لها وكاله متخصصه بالمناسبات الخاصه من زواج وحفلة تخرج او ميلاد .. وهي تخصصها هندسه ديكور.. فدخله هالفكره ببالى
عبدالعزيز: يعنى تسوي وكاله للمناسبات
سارا ووجهها حمر: ادري انها فكره غبيه.. انسى انى قلتها لك
عبدالعزيز: بالعكس مين قالك كذا ...وايش فكرتك عن هالشي بالضبط
سارا: دايما العروس وامها يكونون محتاسين للزواج مو عارفين ايش يسون .. من ناحيه تصميم الكوشه والقاعه .. غير الورود والمصوره وفستان الزواج والكيكه .والعشا وغيرها كثير.. لو كانت عندنا وكاله تقوم بكل هالامور صارت مساله الزواج مره سهله... وغيرها من الحفلات
عبدالعزيز: قصدك حجوزات وغيرها
سارا: مو حجوزات بس.... يعنى تعطيها الخيارات .. وهي تختار الي يناسبها .. من غير ما تتعب نفسها ...
عبدالعزيز: فكره حلوه
سارا: المشكله انها مو موجوده عندنا ... وكل الي قلت لهم قاموا يضحكون عليها
عبدالعزيز: وانتى ايش لك فيهم سوي الي يرضيك ...
سارا: ادري .. مثل ما قلت لك هذا حلم ..ويحتاج له اشياء كثيره عشان ينجح
عبدالعزيز: اول ما تتخرجين لا تحاتين شي انتى بس اشري على المبنى الي تبينه وانا اشتريه لك عشان تصميمه على كيفك وتفتحين لك الوكاله الي تبينها
سارا: مثل ماقلت لك هذا حلم
عبدالعزيز: والحلم ممكن يصير حقيقه ..ومنيره معك بالمشروع هذا ؟؟
سارا: انا ما قلت لاحد انى افكر فيه بجديه .. بس مره طرحتها عن اهلى وما تركونى قاموا يضحكون على .. وبعدها ما فتحت السالفه حتى لمنيره...
ععبدالعزيز: غريبه مو خابر عمي صالح يحبط الواحد
سارا: لالالا مو ابوي الي ضحك .. بالبدايه سلمان .. قمت انا اضحك ..قاموا كلها يضحكون .. بعدين استلمنى سلمان تعليقات
عبدالعزيز: تدرين سارا ماعليك من سلمان هو دايما كذا ماخذ الدنيا وناسه..
سارا: ادري ...
عبدالعزيز: وصدقينى لو انك قايلتها لمنور ما كانت ضحكت عليك..
سارا: ايه منور ماراح تضحك بس مابتايدنى .. لانها ما تحب الا الرسم ... ومو فاضيه لهالاشياء
عبدالعزيز: اهم شي ان الفكره عاجبتك اول ما تتخرجين مثل ماقلت لك
ابتسمت سارا: شكرا عزيز
عبدالعزيز: ماقلت شي...مايحتاج تشكرينى
ازدادت ابتسامه سارا لدرجه ابهرت عزيز: الا شكرا والف شكرا
عبدالعزيز: هههههههههه.. ليه بس
سارا: شفت انك انت ما لاحظت ...
عبدالعزيز وعينه على واجهه سارا مو قادر يلفها: الاحظ ايش
سارا: خلاص الناس بيدوا ينزلون...
عبدالعزيز: ههههههههههههههههههههههههههههه. .. تصدقين ما حسيت
سارا: ههههههههه .. حتى انا
عبدالعزيز: شفتى الطيران ما يخوف وهذي ثانى مره ما تحسين
سارا: مادري..
عبدالعزيز: لو طلعتى تخافين كذا شلون نسافر السنوات الجايه ...
سارا: خلاص انشالله من بعد هالمره ما اخاف ابد ...
عبدالعزيز: ههههههههه.. يالله خلنا نقوم .. شكل الطياره بتفضى وحنا فيها...
وقام اخذ العفش من الدولاب الي فوق ونزله ...
عبدالعزيز: سارا ..تعالى بالممر حقى ...
سارا: اوكي...
راحت له وخلاها تمشى قدامه .. مروا من عند المضفيين الي واقفين عند الباب عشان يودعون الركاب ... دخلوا للمطار.... واخيرا وصلت لك ياوطن
..................
سلمان: ما كانهم تاخروا ..
عمر: الا ..تقريبا اكثر الركاب نزلوا
سلمان: يمكن هذ ي مو طيارتهم او انهم اجلوها
عمر: لا .. عبدالعزيز دق على قبل لا يركب الطياره .. هذي هي.. اقول سلمان انا بروح اسال عشان اتاكد .. الركا ب كلهم نزلوا الى الحين ما بعد يجون ...
سلمان: اوكي .. وانا بجلس هنا انتظر يمكن يطلعون...
وقف سلمان بعد ماراح عمر وعيونه على القزاز الي يفصله عن الركاب النازلين من الطياره متى يجي اليوم الي يكونون فيه الاهل باستقبالي ... ياترى مين بتكون زوجتى .. وتجي فجاه صورة رهف على باله .. هل البنت بالتجنني مو قادره تبعد عن فكري شوي ... كل دقيقه والثانيه تنقز لى .. في أي شي افكر فيه لازم تكمر على بالي ...اصلا ايش جاب طاريها الحين ... افكر بشهر عسلى وتجي هي.. معقوله تكون هي زوجتى .. ليش لا البنت مو ناقصها شي ... واكيد بتقبل فينى اصلا بتلاقي واحد بحلاتى ... يووووه انا ايش افكر ..تو الناس على الزواج .. خل اصطلب اطول واوقف لعب عيال بعدين افكر بهالشي ..بس لو تطير البنت عنى .. والله انى شايفها وهي مملوحه وماعليها كلام .. ياخوفي تروح علي... واذا راحت الي يقرى افكاري الحين يقول انى احبها .. انا مو حق حب واحد .. انا احب لمى ودلال واشجان وتماضر وعايشه .. احب كل بنت مستعده تتسلى شوي معي .... لازم اشيل رهف من بالي .. لازم اشيلها ....الا يحس بايد على كتفه .... لف ويشوف مراءه متغطيه بس مع كذا عرفها ....
سلمان: سوووووووووووووووير
سارا: هههههههههههههههههه... هلا والله سلمان
وضمت اخوها ... الي كان منصدم ومو مصدق....ب
سلمان: بسم الله من وين طلعتى .. انا عيونى طول الوقت على المدخل وما شفتكم....
سارا: ههههه.. كنت سرحان بس في مين ؟؟
سلمان: فيك ياقلبي ....
وشافت عبدالعزيز الي واقف وري سلمان ...
سارا: ماقلت لى انه بيجي .؟؟؟
عبدالعزيز بابتسامه: انا ما قال لى عمر الا قبل لا تقلع الطياره قلت اسويها مفاجاه...
سارا وهي تشد على اخوها: واحلى مفاجاه...
سلمان: هههههههه... خلاص تركيني يابنت الناس خلينى اسلم على الرجال....
وترك سارا ولف لعبدالعزيز ... الي مد ايده لسلمان عشان يتصافحون ....
عبدالعزيز: مرحبا يابو الشباب ...شخبارك؟؟
سلمان: بخير وانت ايش مسوي .. ان شاء الله ما تكلفتوا بالرحله
عبدالعزيز: لا الحمدلله كل شي تمام ...
ولف وجهه يدور اخوه
عبدالعزيز : الا اقول سلمان وينه عمر ...
سلمان: عمر راح يسال عنكم شافكم تاخرتوا كل الركاب نزلوا الا انتوا....
سارا: ماحسينا الا بعد ما فضت الطياره
سلمان: هههههههههههههههههاااي لازلتوا غرقانين بالحب
تغير وجهه سارا واختفت الابتسامه الي كانت على مرتسمه بوجهها .. يالله لوتدري بس ياسلمان كان ماقلت هالكلمه .. انا ايش نسانى هالموضوع ... من سولفت مع عبدالعزيز بالطياره وانا احس الدنيا بدت تبتسم لى .. وفالنهايه ترجع يا سلمان وتفتح جرحي من جديد ادري انه مو قصدك .. لوتعرف بس ان عزيز اخر شي عنه هو الحب .. ومستحيل يحبني .. لا وقايل هالكلام لاخوه .. الحين انا اشلون اقابله او اسلم عليه .. كيف بينظر لى عمر .. بعيون شفقه ..والا عطف ... او ماهو معبرنى ومهتم بالموضوع.. يمكن يكون مشجع اخوه على هالشي وهو الي محرضه ...
عبدالعزيز: الله يقطع شر بليس ياسلمان ايش هالكلام اعقل بس..
سلمان: هههههههههه.. هذا عمر جاي .........
ونادى باعلى صوته : عممممممممممممر... هذا هم شرفوا
راح عبدالعزيز لاخوه عمر وضموا بعض ...
عمر: هلا والله بو سعود اشوفك صرت عاطفي
عبدالعزيز: هههههههههه.. شفت شلون .. لا تلومنى تونى جاي من شهر العسل
عمر : السلام عليكم يامرت اخوي ...
انتبهت له سارا الي كانت مستحيه منه كثير خصوصا انها عارفه انه الوحيد الي يعرف حقيقه علاقتها باخوه ...
سارا بصوت واطي: وعليكم السلام.
عمر: حمدالله على السلامه لكم ...
عبدالعزيز: الله يسلمك ... يالله خل نروح نستلم العفش ....
عمر : انت شكلك تعبان اجلس مع سارا وانا وسلمان نروح نجيبهم...
عبدالعزيز: لا انا الحمد لله مافينى شي والشنط انا اعرفها .. اروح معك احسن ...والا اقول سلمان انت اجلس هنا مع سارا على ما نجيب الشنط ... مابي ندخل كلنا بالزحمه
سلمان: اوكي براحتك .. بس لا تتاخرون ..
عمر: اكيد ....
وراح عبدالعزيز وعمر عشان يستلمون الشنط وجلست سارا مع اخوها على الكراسي حقت الانتظار...
سلمان: ان شاء الله ما فشلتينا وخفتى من الطياره...
سارا: ههههههه .. يعنى تقدر تقول
سلمان : خفتى او لا
سارا: اول مره خفت ..بس بالرجعه اخف بكثير
سلمان:هههههههههههه شكلك ابلشتى ولد الناس
سارا: هو يحصل له وحده مثلي ... انت بشرنى عنك
سلمان: انا عال العال ...
سارا: وامي وابوي ومحمد وعبدالله
سلمان: حبه حبه علي .. كلهم بخير ولو دروا كان سووا لنا زحمه بالمطار...
سارا : كان ودي يجون .. بس عزيز مارضى
سلمان: معه حق خل ترتاحون اول ...
سارا: بشر خلصت الصيفي الي ماخذه
سلمان: الاسبوع الجاي الاختبارات بعدين خلاص ..
سارا: يوووه اجازتك قليله بس اسبوعين
سلمان: ادري .. لا تحاتين اخوك شقردي ما تمشى عليه بحللهم تحلل
سارا: ناوي علي ايش
سلمان: الخميس الجاي مو من هذا الاسبوع .., الي بعده انشالله بسافر
سارا: والله ..مع مين؟؟
سلمان: مع الربع انشالله ...
سارا: وين بتروح؟؟
سلمان: بنروح لسويسرا وايطاليا وفرنسا ولندن
سارا: الله الله كثير ما يكفيك اسبوعين
سلمان: الا يكفي كل بلد حول اليومين.. اصلا بناجر سياره ونتنقل بين البلدان
سارا: حلو وناسه .. على فكره فرنسا حلوه مره ..
سلمان:هههههههه.. ايه صرتى خبره ... اقول انقلعي بس انا رايحها مرتين مو لازم تقولين .. صدق الي ماعمره تبخر تبخر واحترق
سارا: وانا ايش قلت الحين ... انت محد يسولف معك
سلمان: الا .. والبنات بموتون على سوالفي
دزته سارا من كتفه: اقول استح
سلمان: ههههههههههههه... الله اختى كبرت وصارت عروس
سارا: والرجال المقبل بالترلي مو مالي عينك .. يسمونه زوجي
سلمان: من حلاته بس
سارا: احلى منك ...
سلمان: الله الله بدينا ندافع .. وين الي مابيه ولا يمكن احبه شلون اتزوجه ...
سارا حمر وجهها : سلمانوه اسكت بس
سلمان: عيب ترانى اخوك الكبير..
سارا: طيب تصرف مثل الكبار
سلمان: ههههههههههههههههههه.. والله انك تحفه... يالله قومي يالدبه هذا هم خلصوا .. خل نلاقيهم...
وراحوا لوين عمر وعبدلعزيز واقفين.... تلاقوا معهم ..
سلمان: اقول عبدالعزيز شلون صابر علي هذي انا هالعشر دقايق الي مروا كانهم سنه ...
عبدالعزيز لف سارا وابتسم لها : اقول سلمان عن الغلط تراها حرمتى الحين وما ارضى ...
سلمان: ههههههه.. يعنى موبس هي الي تدافع .. والله حركات ...
عمر: بس سلمان عيب عليك
سلمان: ادري عيب .. خل نحرجهم شوي
عبدالعزيز الي كان حاس بسارا الي مفتشله من جد .. خصوصا ان الكلام قدام عمر ...قال خل يحرجها زياده
عبدالعزيز: لو تموت ما يحرجنى هالكلام ... يمكن اختك ... مو هي الي كل دقيقه ينقلب وجهها احمر.. حتى اسالنى انا .. يمكن ما شفت وجهها بلونه الطبيعي الا مرتين
سارا بصوت واطي ما سمعه الا عبدالعزيز لانها واقفه جنبه: طيب تشوف ايش بسوي لك بالبيت
قام عبدالعزيز يضحك ..
سلمان: هههههههه.. تسالنى عنها ... اختى وعارفها...
عمر : والله انكم مهابيل .. يالله بسرعه مو مستعد اول السياره بالبارك اكثر من كذا ترى كل شي بحقه بعدين عليكم انتو التسديد...
عبدالعزيز: امووووت انا بالبخيل
عمر: خلنى ساكت لا افضحك قدام حرمتك واخوها
سلمان: هات خلنا نضحك
وتموا يسولفون ويتاقرون طول الطريق لين وصلوا للسياره ..وسارا طول الوقت ساكته وهي تمشي جنب عزيز الي يجر الترولى .. وسلمان يجر وحده ثانيه ... اما عمر كان متقدمهم عشان السياره... بعد ماركبوا الشنط ...
عبدالعزيز: زيييييين جبت الرنج .. والله انى تعبان وابي ارقد..
عمر: بالسياره؟؟
عبدالعزيز: متى بس نوصل البيت لى اكثر من 24 ساعه وانا قايم ..
سلمان: كلها ساعه الا ربع وحنا بالبيت ...
ركبوا السياره وجلس سلمان قدام جنب عمر .. وسارا وعبدالعزيز جلسوا ورى ... بعد ما جلست سارا وكانت السياره مرره هدوء .. عبدالعزيز مرجع راسه على ورى ومغمض عيونه لاحظت سارا خطوط الارهاق على وجهه عزيز بسبب نور السياره الي مرت من جنبهم... ما كنت متوقعه انه تعبان لهالدرجه ...المسكين ما قصر معي..... مع تعبه الواضح جلس يهون علي بهبوط الطياره ... غير مزحه مع سلمان.. انا الحين كل مره اكتشف شي جديد عنه ماكنت اعرفه ...سلمان ماكان مستغرب من تصرفات عبدالعزيز .. وواضح انه يمون عليه ... معقوله هو كذا مع الناس . والله انك ياعزيز اكبر لغز بحياتى .. ولو اموت ما راح افهمك ...
...........
لف وجهه من جهتها وفتح عيونه ... طاحت بعيون سارا ....ابتسم لها .. مدت سارا ايدها وحطتها بكل حنيه على ايد عبدالعزيز الي جنبها ...
سارا بصوت واطي مره: شكلك تعبان
اتسعت ابتسامه عبدالعزيز ورجع غمض عيونه ... حست سارا باحاسيس غريبه ... سعاده ما توصف .. انا لازم انجح هالزواج.. حتى لو ما يحبني بخليه يحبنى ... ماراح انهزم واستسلم ... ولانى احبه من كل قلبي بقاتل عشانك ......
على صوت اذان صلاة الفجر بالمسجد الي جنب بيت سالم .. وقفت السياره الرنج ..وبعد ما نزلوا كلهم لزموا على سلمان انه يدخل .. وكان منحرج بعدين وافق على اساس يجلس الى الاقامه وبعد الصلاه يوصله عمر لبيته... دخل سلمان وعمر الملحق .. اما عبدالعزيز وسارا فدخلوا البيت ... بعد ما دخلت سارا البيت الي كان مره هادي والطابق الاسفل مظلم ....
سارا: وينهي منيره ورهف .. ماعندهم خبر اننا واصلين اليوم
عبدالعزيز: والله مادري...
وقفت سارا بوسط الصاله ..
عبدالعزيز: ايش فيك واقفه هنا ...
سارا: وين اروح..
عبدالعزيز: روحي غرفتك الي هي غرفتى.. تعالى معي اوريك اياها
سارا: اعرف وين غرفتك ...
استوعبت الكلام الي قالته بعد ماشافت عبدالعزيز يرفع حاجبه ... حمر وجهها على طول
سارا: قصدي ..انا اعرفها لانى .. منيره وانا ...
عبدالعزيز: ههه .. مايحتاج تشرحين ادري انك كذا مره تجين بيتنا وتصعدين فوق...يالله حبيبتى تعالى نصعد .. انا تعبان مره..
سارا: وصلاة الفجر ماراح تصليها بالمسجد..
عبدالعزيز: لا بعدين بيشوفنى ابوي .. غير الرجال الي بالمسجد وبيسلمون على وانا تعبان...
وصعدوا فوق للطابق الثاني الي فيه غرف النوم ....كان عبدالعزيز شايل شنطه وحده .. وباقي الشنط بالسياره .. بكره انشالله بينزلونها كلهم ... وصلوا للغرفه الي كان الباب مسكر ... مع انه يطلع منها اناره من تحت الباب .. فتح عبدالعزيز الباب .. بالاول ما عرف غرفته .. كانت متغيره من فوق لتحت .... كانت الوان غرفته من الازرق الى البيج والزيتى .... حتى السجاه الزرقا شالوها وحطوا رخام .. وجدار الغرفه الابيض صاروا بيج فاتح مره .. والجدار الي ورى السرير كان بيج بس درجته اغمق من الجدران الثلاثه ... ومعرق بالزيتى ...السرير حقه القديم استبل بسرير اكبير منه وافخم .. غير التسريحه والطاوله الي جايين مع طقم السرير .. وغطا السريرالزيتي الوانه مثل الوان الستاره ...وكنبين بيج صغار موجودين على جنب الغرفه وقدامهم تلفزيون ... هو صح طلب من اهله يعدلونه غرفته .. مو يغيرونها بالاساس .. بس لوجينا للحق الغرفه كانت تجنن .. ريحه الغرفه كلها ريحه ورود .. بسبب الفواحه الي موجوده على التسريحه ... ونور الشمعه الي داخلها يتراقص ... الغرفه مناره بالابجورات الي على جنبين السرير .... سحرت الغرفه سارا وعجبتها مره ... غرفه ماكانت تتخيلها ابد ...
سارا: الله تجنن الغرفه ....والريحه احلى...
ولفت تشوف عبدالعزيز لاحظت انه عاقد بين حواجبه ... ايش السالفه انا سويت شي غلط او قلت شي .. والا الغرفه مو عاجبته
سارا :ايش فيك عزيز ...
عبدالعزيزبعد ما تنهد: مافينى شي.. واضح ان الاهل كانوا مشغوليين كثير...
سارا: ليه ما عجبتك...
لاحظ عبدالعزيز امارات الخيبه مكان الابتسامه الي قبل شوي...
عبدالعزيز: لا اكيد عاجبتنى بس استغربت منها شوي...
...........
منيره: انتوا جييييييييتوا....
رهف: ماقلت لك جاو انا سمعت اصواتهم ...
سارا: منوووووووور... رهووف
دخلت منيره الغرفه قبل اختها ... ماكانوا لابسين ملابس النوم .. واضح انهم ينتظرون سارا وعبدالعزيز ... وعلى طول تروح منيره لسارا وتضمها بقوه .... سارا يوم شافت منيره ما قدرت تمسك نفسها وقامت تصيح .. رهف راحت لاخوها عشان تسلم عليه
رهف: حمدالله على السلامه يالغالي
عبدالعزيز: الله يسلمك ....الله منور وانا ما تسلمين علي ...
منيره ردت على اخوها: جايتك بس خل زوجتك تتركنى ....
عبدالعزيز: كذا تصيحينها
منيره: ههههههه خلاص سارا ايش فيك
سارا وصوتها صياح: فرحانه انى شفتك
رهف: وانا وين رحت
تركت سارا منيره وراحت لرهف وضموا بعض ....
سارا: مو مصدقه انى اشوفكم .. والله اشتقت لكم
منيره بعد ما سلمت على اخوها:ايه واضح مشتاقه لنا ... اشوفك مكلمتنا كل يوم...
عبدالعزيز : وطوا صوتكم مابي الوالد يحس ...
رهف: لا الوالد خلاص نزل للمسجد
سارا: غريبه ما جانا
منيره: لا غرفتهم بالجهه الثانيه...متى وصلتوا
عبدالعزيز: ما اخذنا وقت تونا واصلين
منيره : وايش رايكم بالغرفه
عبدالعزيز وهو يقرص اخته بخدها: كنت متوقع ان كل هالاشياء من ورى راسكم انتوا
رهف: ههههههههههههه... بس بذمتك مو حلوه
سارا: الا تجنن ... مشكوره منور .. مشكوره رهف
عبدالعزيز رمي نفسه على السرير ...كان تعبان مره يحس شوي ويغمى عليه من شده الارهاق....
رهف: يووه شكلنا مسوين ازعاج يالله نتركم ترتاحون الحين...
منيره: ايه صح تصبحون علي خير
سارا: لا تو الناس وانا مو تعبانه ... تعالوا ابي اسولف معكم ما شبعت منكم ....
منيره: لا سوسو انتى توك جايه واكيد تبين ترتاحين...
عبدالعزيز وهو مغمض عيونه: لو تبين تروحين روحي ... واذا رجعتى ادخلى بهدوء لانى بصلى وبنام...
هزمت منيره راسها علامه الرفض يعنى لا تجين معنا واجلسى مع زوجك .. فهمت عليها سارا....
سارا: حتى انا بصلى وبنام وبكره بسولف معهم ....
رهف: الا وينه عمر ما شفناه
عبدالعزيز: اظنه بالمسجد ...
رهف : اوكي ما نعطلكم .. وحمدالله على سلامتكم ... تصبحون علي خير..
سارا: وانتى من اهله حبيبتى ...
وطلعت رهف ومنيره من الغرفه ... اما سارا وعبدالعزيز فبعد ماصلوا الفجر ...راحوا بسابع نومه ....
..............................
دخلت فوزيه غرفه عمر....
فوزيه: عمر قوم يالله .. عشان تجيب اخوك من المطار ...الساعد 9 الصبح روح ولا تتاخر عليه ...
عمر: يمه تكفين تركينى انام امس ما نمت الا متاخر ...
فوزيه : واخوك مين بيجيبه ...
وفتحت نور الغرفه .....
عمر: يمممممه ...
وغطى وجهه بفراش السرير ....
فوزيه: عمر.. قول تصرف مثل الرجاجيل تراك مو بزر
عمر: يووووه من هالعزيز من جد ابلشنا ...
فوزيه: لا تقول عن اخوك كذا يالله روح ... والا تبينى اروح مع السواق
عمر: تدرين يمه ... بقول لك شي وتركينى انام... عزيز بغرفته الحين امس بالليل وصل وهو الي مسهرنى
فوزيه حطت ايدها على صدرها : بذمتك انت ايش تقول
عمر: يمه ابي انام حرام عليك ... امس مانمت الا قريب الست ....
فوزيه: بالاول فهمنى وينه عزيز ... وليه جا امس ليكون صاير له شي
عمر: مافيه الا العافيه بس قدم رحلته
فوزيه: وليه مقدمها
عمر: شكلك يمه ما تبينى انام .....
وقام من الفراش
عمر: ها فرحتى الحين النوم طار
فوزيه: جعله ما يرجع فهمنى ولدي فيه شي
عمر: مافيه شي لا تخافين وتشلين همه
فوزيه بعد ما جلست على السرير: وليه ما قلتوا لى ؟؟
عمر: لا تسالينى انا روحي اساليه
فوزيه: يعنى الحين هو بالبيت
عمر: يمه شكلك انتى الي فيك النوم .. ايه بالبيت
فوزيه: وزوجته
عمر: بيت اهلها
ضربت فوزيه صدرها: ياويلي وانا اقول ليه راجع بدري... ليه؟
عمر: هههههههههه... امزح معك ... بعد بتكون وين معه طبعا
فوزيه: يا سخفك ... يالله انا بروح اشوف وليدي...
عمر: ايه بعد ما طيرتى النوم منى
فوزيه: استح على وجههك بس حتى الشغل ما رحته .. وابوك عاذرك على اساس بتجيب اخوك من المطار
عمر: وانا ايش سويت الحين ...
فوزيه: يالله لا تضيع وقتى زياده بروح اشوف اخوك
وطلع فوزيه من الغرفه وعمر يضحك على امه وهو رايح للحمام .... يا حليلها طيبه وطيبتها تكون احيانا نقطة ضعفها .....
سارا: عزيز قوم يالله ... بسك نوم الساعه 9
عبدالعزيز: خلينى انام....
سارا: قوم عزيز ... خلنا ننزل ونسلم على اهلك ...
عبدالعزيز: نزلى انتى
سارا: استحي...
عبدالعزيز فتح عين والعين الثانيه لازال مسكرها وقام يشوف سارا: وليه تستحين منهم مو هم اهلك االحين
سارا: ادري بس شلون انزل بروحي ... يالله قوم
عبدالعزيز: اووووف والله بلشه ...
سارا: وابي اروح بيت اهلى ....
عبدالعزيز رفع ايده عشان يشوف الساعه...
عبدالعزيز: مقومتنى الساعه 8 ونص ..لا وتقولين تسع
سارا: عشان تقوم ... ما يكفينا الوقت نلبس ونجهز
عبدالعزيز: انتى روحى للحمام وبعد ما تخلصين بقوم....
سارا: اوكي بس لا تنام ...
عبدالعزيز: وانتى لا تسكنين بالحمام...
راحت سارا للحمام واخذت لها شور سريع ..لبست الروب وشعرها ملفوف بالمنشفه ...طلعت وشافت عبدالعزيز نايم ولا حاس... مسكين لازال تعبان ...رحمته ولا حبت تقومه مره ثانيه ... بعد ما تلبس وتخلص بتقومه .... فتحت الدلاب وشافته حق ملابس عزيز واثوابه ... فتحت الدلاب الي جنبه شافت تنانيرها وبلايزها وباقي ملابسها معلقه بترتيبت ... منيره ورهف ما قصروا ... كل شي لها موجود هنا ... ما توقعت منهم يرتبون دولابها بس اثبتوا انهم من جد بمثابة اخواتها .. وهذا شي من صالحها لانها عايشه طول عمرها من غير خوات ..... اختارت لها تنوره طويله توها شاريتها ومن غير فتحه مع بلوزتها ... لازم تطلع بمنظر يعجب ام العريس ... وتحس ان مرت ولدها مره مو مراهقه ... بعد ما لبست .. مشطت شعرها نشفته بالاستشوار ... وتركته على كتوفها .. طاح مثل الخيوط الكستنائيه الحرير.... حطت ميك ابك خفيف ...راحت للسرير وانحت على عبدالعزيز ... وتوها تبي تهز كتفه
الا يستنشق عزيز الهوا ويقول: امممممممممم... ايش هالريحه الحلوه
حمر وجهه سارا وفتح عبدالعزيز عيونه وابتسم لها: متى خلصتى
سارا: من زمان بس قلت البس واقومك
عبدالعزيز: اها .. طيب هذا انا قمت ....
سارا: بنروح بيت اهلى صح
عبدالعزيز: اكيد ياحلوه بنروح ... بالاول نشوف اهلى
وقام عزيز وراح للحمام ... وترك سارا بحيرتها ... عبدالعزيز متغير ... لا ما تغير هو كذا من اخر يوم لنا بلندن وطول اقامتنا بفرنسا... بس ايش معنى الكلام الي سمعته ... هو قال اسمى لو ما قاله ... الحين عزيز بتصرفاته هذي يعيشنى بحيره ... مو قادره افهمه .. ساعه اقول انه يحبنى ...وساعه لا .... نشوف الايام الجايه بتوضح لنا كل شي...
عبدالعزيز: تفكرين بايش
سارا: خلصت ما حسيت فيك
كانت جالسه على السرير وسرحانه
عبدالعزيز: طبعا ما بتحسين لانك بعالم اخر..
سارا: اول مره اشوفك بالثوب
عبدالعزيز وهو رافع حاجبه: ويوم العرس والملكه
سارا: كنت لابس بشت.. انا قصدي الثوب لوحده..
عبدالعزيز: وايش رايك فينى ...
سارا: يهبل عليك رزه ...
عبدالعزيز: ههههههههههه.. طلعتى تعرفين تغازلين
استحت منه سارا ....
عبدالعزيز يبتسم: لازلتى تستحين ...
يدق الباب عليهم بهاللحظه ...راح عبدالعزيز عند الباب وفتحه ... ويشوف امه قدامه ...اول ما شافته امه عيونها غرقت بالدموع ....
فوزيه: كذا يا عزيز تجي ولا تقول لامك
عبدالعزيز قرب من عندها... ما قدرت فوزيه تمسك نفسها اكثر وضمته لقلبها ...انحى عليها وهو يضمها ...كان مره طويل بالنسبه لها .... حس براحه حلوه مستحيل الانسان يلاقيها الا بحضن امه .... الله يا يمه ما كنت عارف انى مشتاق لك الا هاللحظه ....
عبدالعزيز: ما حبيت اشغلك وطيارتنا وصلت متاخر ..
فوزيه: مهما كان ياوليدي ... المفروض تقول لى ....
شد ت عليه كانها خايفه انها تفقده ..... كانت تكلمه بنفس الطريقه وهو صغير ... ماهمها طوله وعرضه ... هذا عبدالعزيز ولدي الصغير مهما كبر ما يكبر بعينى ... بظل طول عمره طفلى ....
عبدالعزيز: انشالله ماراح اسويها مره ثانيه.... ولا يصير خاطرك الا طيب ...
سارا الي كانت واقفه ورى عبدالعزيز وتشوفه مع امه ... من جد اثر فيها منظر ام عمر ... والدموع بعيونها ... كانها مو مصدقه انها شافته ولدها ... شكلها مره يكسر الخاطر ... واصله لنص صدره .... قام عبدالعزيز حب راس امه .....
فوزيه: الله يخليك لى ياقلبي... وينهي زوجتك...
سارا: هلا يمه ...
تركت فوزيه ولدها وراحت لعند سارا ....
فوزيه: هلا بك يابنيتى ... تعالى جنبي...حمد الله على السلامه
راحت لها سارا .... وحبت راس ام زوجها ..قامت فوزيه ضمتها ....
فوزيه: الله ايش هالزين ... والله انى ناسيه انى اخذت لولدي قمر ..
سارا: الله يخليك لنا يايمه
فوزيه: انشالله ما زعلك عبد العزيز او ضايقك بشي
رفعت سارا راسها وطاحت عينها بعين عبدالعزيز ... شافته يبتسم لها ..على طول تذكر كلامه لعمر ... وتعقد بين حواجبها .. لاحظ عزيز عبوسها ..... ايش الي طرى على بالها الحين... بايش تفكر ..... ايش اللي مضايقها
سارا: لا ... عبدالعزيز مو مقصر معي...
فوزيه: الله يخليكم لبعض ويوفق بينكم ... يالله تعالوا نزلوا ولهانه عليكم كثير .. خل نفطر مع بعض
عبدالعزيز: حاضر يمه .... انتى نزلى وهذا حنا معك ...
ونزلوا لتحت ... جلسوا مع بعض يفطرون .... اما عمر راح للشركه .. والبنات لازالوا نايمات
في بيت صالح ...ام محمد ومها جالسين بالصاله يتقهون ....
مها: خالتى اليوم العشا ببيت عمي سالم صح ...
لطيفه: ايه ... ما يقصرون .. كان ودي العزيمه انا اسويها بس فوزيه اصرت وما قدرت اقول لها شي...
مها: واخيرا سارا جات والله اشتقت لهالبنت
لطيفه: ايش تقولين عنى انا .... ماكنت متوقعه انى بفقدها لهالدرجه ... لك مكانه ياسارا
مها: ومتى بتوصل طيارتهم ...
لطيفه: مادري متى بالضبط ... اتوقع حول الساعه 10 ...
مها: يعنى بعد نص ساعه تقريبا
لطيفه: ايه
مها: مين بيستقبلهم بالمطار
لطيفه: اهل عبدالعزيز... حاولت ببو محمد بس مارضى يقول ماله داعي حريم بالمطار
مها: الله عليه عمي .... وعمي بيروح
لطيفه: لا.. يقول مايبي الشركه تصير فاضيه ... اتوقع بس عمر حتى محمد ماراح يروح .. اصلا ماله داعي ...
سلمان: ياهل البيت انا نازل
حطت مها بسرعه الجلال على راسها وتغطت به ....ودخل سلمان للصاله
لطيفه: سلمانوه
سلمان: سمي يا بعد طوايفي...
لطيفه: ياعمري انت ... غريبه قايم بدري.... خابره ماعندك محاضره الحين
سلمان: ايه يالغاليه ماعندي ... محاضرتى العصر مو الحين ..
مها: وايش عندك قايم ...
سلمان : يمدحون سوالف العجايز بالضحى... حبيت اسمعها
لطيفه: أي سوالف انت بعد.... مادمت قايم بدري ليه ما تروح للمطار
سلمان: مالى خلق
لطيف: روح استقبل اختك
سلمان: عندها من يستقبلها
مها: والله انى مو متطمنه لك حاسه ورى هالقومه البدري شي
سلمان: هههههههههههههههههههههههههههههه ه...والله مو فاهمنى بالبيت الا انتى يابنت خالتى
لطيفه : يعنى ايش بيكون وراك
سلمان: لا بس ماودي افوت المسرحه..
مها: ههههههه انا قايله في شي
لطيفه بعصبه: أي مسرحيه بعد.. ليكون مسوي عمله من عمايلك
سلمان: افا يالغاليه يعنى بسوي ايش....
وقرب من امه الى ان لصق فيها ... وحبها على خدها ...
سلمان: قصدي مسرحيه الام والابن
دزته لطيفه بقوه: روح ياملقطك يا ولد ...مدري متى تكبر
مها: هههههههههه
سلمان: اااااي يمه عورتينى .... هذا وانا حابك تسوين لى كذا ... انا مالى احد بهالبيت
مها: انت ماعندك الله اكبر
سلمان: اقول اسكتى انتى محد كلمك .. الا وينه جنيك الصغير
مها: نايم مابعد يقوم...
سلمان: اشوى والا مالنا خلق صراخه على الصبح
لطيفه: الحين انت فطرت
سلمان: لا والله .. ايش فطوركم
لطيفه: حنا فطرنا من زمان مع ابوك واخوك ...
سلمان: طيب ليه مابقيتى لى شي
مها: وانت من متى تفطر معنا
لطيفه ايه والله .. تبي شي معين
سلمان: لالا مابي ... بعد ما تنتهى المسرحيه بطلع افطر مع الربع
لطيفه : أي مسرحيه انت بعد ...
سلمان: ههههههههههه بتعرفين قصدي قريب
.....................
في بيت سالم .....
سارا: عزيز ودي ادق على اهلى اقول لهم انى وصلت ...
فوزيه: وليه ما تروحين لهم ...
عبدالعزيز: ايه يالله البسى وخلينا نفاجئهم ...
سارا: بروح البس عبايتى...
عبدالعزيز: لا تتاخرين ...
بعد ما طلعوا من البيت .....دق عبدالعزيز على ابوه الي كان معصب عليه لانه عرف انه جاي من امس من عمر ... عصب لانه ماقال له ...وقال عبدالعزيز له انه بيوصل سارا لبيت اهلها بعدين بيجيهم بالشركه ومره وحده يسلم على عمه بو محمد .....
وصلوا لبيت صالح ....
سارا: بتنزل معي صح ...
عبدالعزيز: ايه .. ايش عندك تسالين هالسؤال
سارا: سمعتك تقول لابوك انك بتجي للشركه
عبدالعزيز: بسلم على عمتى بعدين بروح
نزلوا من السياره ... كان الباب مسكر فدقوا الجرس ....
الخدامه: مييين..
سارا: سومي افتحي باب
سومي: انتى سارا
سارا: ايه بسرعه افتحي يالله
وراحت سومي ركض عند الباب ...
لطيفه: مين ياسومي
سومي: هزي سارا في اجى
لطيفه: أي سارا بعد
سومي: ماما هزي سارا مال انتا
لطيفه: سارا بنتى
سلمان:يمه بعد مين سارا
مها: شلون ما يمديهم يجون الحين اذا طيارتهم 10 ... الا اذا كانوا جايين مباشره من المطار
لطيفه: لا تروحين انتى ليكون وحده نصابه ... قوم انت ياسلمان وافتح الباب
سلمان: يمه صدقينى هذي سارا اختى
مها: وانت ايش عرفك
سلمان يبتسم : اعرف وبس
لطيفه: طيب يالله قوم
سلمان: حر
لطيفه: سلمااااااااااان
سلمان: طيب طيب ....
قام سلمان وراح برى .. الا يشوف وراه سومي ....لف عليها ..
سلمان: هيه انتى ايش تبين
سومي: تبين شوف سارا
صرخ عليها سلمان : يالله داخل بس ... خدامات اخر زمن
وفتح الباب ويشوف اخته وزوجها معها
سارا: هلا سلمان
سلمان: هلا بك ... تفضلوا هلا عبدالعزيز شخبارك يا رجال
عبدالعزيز: الحمد لله تمام وانت
سلمان:زين الحمدلله
سارا: .. ايش فيكم تاخرتوا على ماتحتوا الباب...
سلمان: الوالده الله يحفظها مارضت لسومي تفتح على بالها نصابه جايه لنا
سارا: ههههههههههههه
سومي: سلام سارا
سلمان: الله عليها مارضت تروح حتى بعد ما زفيتها
سارا: هههههههه ... هلا سومي كيفك
سومي: انا زين... انتا ايس في سوي ... حلو شهر اسل
وتضحك بثقل دم
سارا: ايه زين .. سلمان الوالده وين
سلمان : بالصاله مع مها
عبدالعزيز: اجل انا بدخل الملحق وانتى نادي لى امك اسلم عليها...بعدين بروح
سلمان: على وين يابو الشباب
عبدالعزيز: بمر الشركه
سلمان : خلاص انتى روحي للصاله ياسارا ونا بدخل الملحق مع عبدالعزيز
دخلوا عبدالعزيز وسلمان للملحق .. اما سارا راحت للصاله ... اول ما دخلت كانت ام محمد جالسه وبحظنها فهودي الصغير وواضح من وجهه انه توه قايم من النوم ... ومها تقلب بقنوات التلفزيون
سارا: السلام ياهل الدار
فزت ام محمد من مكانها .. والابتسامه شاقه وجهها .... مسكين فهد كان بيطيح من حضنها ... جلسته بالكنب ... ولفت لبنتها ...
لطيفه: وعليكم السلام ... هلا والله ...
فتحت ايدها لبنتها .. وعلى طول ركضت سارا لها وطاحت بحضنها ... ضمتها لطيفه بقوه ...
لطيفه: هلا ببنتى .... هلا بقلبي ... وينك عنى .. البيت من غيرك ما يسوى فلس.. اشتقت لك كثير
سارا: وانا اكثر ... يمه احبك
لطيفه: ياعمري انتى.. ادري انك تحبينى .... انتى ايش مسويه
سارا: انا بخير ..
لطيفه: ان شاء الله انبسطتى بالسفر
سارا: ايه .. بس مابي اروح عنكم مده طويله مثل هذي
مها: حمد لله على السلامه ياسارا
راحت سارا لمرت اخوها وبنت خالتها .... وسلمت عليها ....الا تحس باحد يجر عباتها من تحت .. نزلت سارا وشافت فهودي الصغير...
فهد: وانا يا أمّه تالا
سارا: اموت انا على عمه تالا ...
ونزله وشالت ولد اخوها وحبته بقوه ...
سارا: كبرت يا بطل وصرت ثقيل
فهود: انا بطل
سارا: ايه وعندك عضلات بعد...
لطيفه: رجلك وينه يا سارا...
سارا: يوووه نسيت بالملحق مع سلمان .... يبي يسلم عليك
لطيفه : هذا انا رايحه له ...تعالى معي
راحت سارا وهي شايله فهد مع امها لعند الملحق .... بعد ما سلمت لطيفه على عبدالعزيز الي حب راسها .. وجلست معه شوي ... بعدين طلع عبدالعزيز وسلمان ... كل واحد راح للجهه الي يبيها ... وقال عبدالعزيز لسارا انه بيجيها العصر ياخذها من بيت اهلها بعد ما يرجع ابوها واخونها عشان تسلم عليه.....جاتهم مها للمحلق وجلسوا يسولفون ...
سارا: الا صح مبروك عليك يا مها
مها: على ايش؟؟
سارا: والدبّه الصغيره ايش
مها: ههههههههههه... الله يبارك فيك .. عقبالك
سارا: لا تو الناس
لطيفه: أي تو الناس .. كثير يحملون من اول ليله..
سارا حمر وجهها : يممممممه ايش تقولين
لطيفه: انتى الحين مره خلاص ....
سارا: طيب معليش لاحقين على العيال... باي شهر انتى يامها
مها: بدخل الخامس بعد اسبوعين
سارا: الله يسهل عليك .. ايش ودك بنت او ولد..
مها: الي يجي من الله حياه الله
لطيفه: الا تعالى انتوا ماراحتوا بيت عمك سالم
سارا: الا رحنا ... ليه سلمان ماقال لكم
لطيفه: يقول لنا ايش
بعد ما شرحت لهم سارا الموضوع جلسوا يسولفون بعدين راحت ام محمد تشوف ايش مسوين الخدامات مع الغدا.. خصوصا ان بنتها بتتغدى عندهم ....
........
يوم عرف بومحمد ان بنته وصلت وهي في بيته ... طلع من الشركه قبل الوقت المحدد ... وراح للبيت طبعا بعد ما جاه عبدالعزيز وسلم عليه ....
وتغدوا كلهم مع بعض ... وعلى حدود الساعه 3 العصر دق عبدالعزيز على سارا عشان يمرها وياخذها للبيت ...
سارا: بس انا مابعد اشوف اخوانى
عبدالعزيز : بتشوفينهم الليله ....
سارا: محمد توه داق وقايل انه بيجي مع زوجته وعياله فمو حلوه يجي ولا يشوفنى
عبدالعزيز: كلهم بيجونا الليله ... لاحقه عليهم ياالله اهلى يبون يجلسون معنا خصوصا ابوي يبي يتاكد انك بخير...
سارا: اوكي خلاص تعال ..
عبدالعزيز : ربع ساعه وانا واصل ابي ادق عليك وتطلعين.. مب نازل
سارا: طيب
وسكرت التليفون...
صالح: بتروحين ؟
سارا: ايه يبه بروح ... بيمرنى عبدالعزيز الحين
لطيفه: ماجلستى معنا
سارا: بتجون الليله بيت عمي سالم
صالح: ايه بنجي انشالله
سارا: خلاص اشوفكم هناك ... يمه انا بروح غرفتى اشوف اذا فيها شي ابيه واخذه معي
مها: دقيقه بجي معك ...
لطيفه: مافيها شي منيره ورهف ما قصروا جاو واخذوا تقريبا كل شي
سارا:ادري بس ابي اتاكد.. وصراحه ولهت عليها
مها: ههههههههه .. هين ولهتى والله لو نحاول تنامين فيها وتتركين رجلك ما توافقين
سارا: حرام عليك .. مو لهالدرجه ..
مها بمكر: نشوف...
وراحوا لفوق وهم يسولفون ... بعد ما دخلت غرفتها حست انها مافارقتها ولا مره ... هذي غرفتها من يوم كان عمرها 10 السنين ... كانها امس نايمه فيها .. السرير مرتب والغرفه كلها مرتبه .... بس شعورها اتجاها كان ناقصه شي.. تحس بداخلها شي متغير ماتدري ايش... وقفت وخذت تشوف السرير وهي سرحانه بعالم ثاني..
مها: سارا
سارا: هلا
مها: ا يش فيك مره وحده سكتى؟؟
سارا: مادري والله .. مها بسالك سؤال غبي
مها: هههههه .. اكيد
سارا: جد اتكلم
مها: وانا جاده معك ....
راحت مها وجلست علي سرير سارا..
مها: بالاول اجلسى..
سارا: لامابي...
وقفت عند التسريحه وقامت تلعب ببقايا مكياجها المحطوط عليها ..
سارا: مها .. اول ماتزوجتى عبدالله ايش كان شعورك..
ابتسمت مها ابتسامه حلوه: تسالينى يا سارا عن شعوري انتى اكثر وحده كنتى عارفته..
سارا: ادري ..والله ادري انك كنتى تحبينه من وانتى صغيره بس هو مو معبرك .. وماصدقتى خبر يوم خطبك..
مها: قويه ماصدقت خبر ..
سارا: ههههه.. نسيتى يوم تدقين على وتقولين لى .. سارا مو مصدقه ... تحرك الثلج..
مها: ماللثلج الا انتى
سارا: اشوفك صايره تنكرين كلماتك
مها: هههههه.. خلاص سارا ايش تبين بالضبط..
سارا بتردد: اممم.. اول مادخلتى غرفتك ببيتنا ايش كان شعورك ..
مها: هالبيت ماكان غريب على وقبل لا يكون بيتى كان بيت خالتى ...
سارا: ايه بس ماحسيتى بشي غريب..
مها: مثل ايش؟؟
سارا: يعنى .. انك ندمتى لانك تركتي بيتكم .. قصدي بيت اهلك..
مها: سارا خرعتينى
سارا: وليه اخرعك..
مها: في شي بينك وبين عبدالعزيز
سارا: ماقلت كذا بس انا سالتك ..ليه ما تجاوبين
مها: بجاوب اذا جاوبتينى انتى
سارا: على ايش
مها: انتى ندمانه ...
سارا: لا مو ندمانه
مها: طيب وليه هالاسئله
سارا: لانى من جد ابيك تجاوبين عليها ...
مها: لا ما ندمت ولا حتى لحظه لانى تزوجت عبدالله ...وكل يوم اتاكد من حسن اختيارى .. تدرين ليش ياسارا؟؟
سارا بحيره: لانك سعيده معه..
مها: اكيد لانى سعيده بس قبل كل هذا لانى احبه ...
سارا: وهو يحبك...
مها: ايه يحبنى ... بس هالحب ماجا بسهوله ... ياسارا انا اول ما تزوجت عبدالله كنت احبه حب ما يوصف وانتى تدرين انى احبه من وانا صغيره .. بس الي ما تدرينه ان حبي له الحين ما يقاس بحبي له ايام المراهقه ...الحب شي حلو يخلى الي قدامك ملاك ..بحيث انك ما تشوفين عيوبه ... واذا صدر من حبيبك شي ماعجبك او غلط بحقك .. الحب يخليك تسامحينه غصب عنك .. هذا الحب الي ماحسيت فيه الا بعد زواجي من عبدالله وهنا عرفت انى كنت فاهمه معنى الحب غلط .......
سارا: تعطين للحب معنى رائع
مها: وهو كذا جميل اذا عرفته عدل
سارا: واذا كان الي تحبينه ما يحبك
مها: تحاولين تكسبينه بكل طرق واسلحه الحب الي قدامك ....تعالى هنا يالدبه
سارا: ايش؟؟
مها: ليكون تحسبين ان عبدالعزيز ما يحبك..
ارتبكت سارا من كلام مها .. وخافت انها تكشف لها الي صار وهي ما تبي احد يعرف .. ماتبي تبين لاحد مدى جرح كرامتها ... مستحيل تقول لمها او لغيرها ...
سارا: ليه تقولين كذا
مها: انا فاهمتك ياسوير .. مو لانه ما قال لك كلمه احبك معنى كذا انه ما يحبك .... حبيبتى الحب اكبر من هالكلمه ..مو لازم ينطق فيها الشخص عشان تعرفين اذا حبك او لا... بسالك الحين انتى مره قلتى لعبدالعزيز انك تحبينه؟؟
سارا: لا
مها: يعنى بيفكر مثلك ...
سارا: لاماراح يفكر .. هو متاكد انى احبه
مها: واشلون يتاكد وانتى ما نطقيتي بها
سارا: الا متاكد..
مها: طيب وايش ياكد لك انه ما يحبك ...
سارا: انا ما اقول انه ما يحبنى .. لا مادري والله ماعرف كيف اقول لك بس
مها: حبيبتى ساره .. احيانا الرجل يعانى مشكله في اخراج مشاعره ... وبعضهم يعتبره ضعف .. المفروض تحاولين اقصى جهدك عشان تطلعين هالمشاعر .. مو تفكرين انه ما يبادلك اياها..
سارا: انتى مو فاهمه
مها: طيب فهمينى
ودق جوال سارا ...
سارا: يووه عزيز جا .. يالله مع السلامه اشوفكم الليله بالبيت ...
قامت مها من السرير .. وراحت الى مكان سارا الي واقفه فيه..
مها: بالاول ابيك توعدينى بشي
سارا: اكيد
مها: اوعدينى انك تفكرين بكلامي زين .. ولا تنسين الحب تضحيه ومسامحه والاهم من ذلك انك تعطين من غير ما تهتمين اذا بتاخذين او لا ... لو تحبين عزيز زين اكسبيه ...وخليه يحبك مثل ما تحبينه..
ابتسمت سارا لمها ابتسامه تحمل كل معانى الشكر ... وهزت راسها باشارة نعم ...وراحت للباب عشان تطلع ووراها مها ....
مها: سارا هالبوك لك ...
لفت سارا لمها: اشوف
واخذت مها البوك الي فوق التسريحه وعطته لها .. عقدت سارا بين حواجبها وفتحت البوك ..
سارا: هذي صوره رهف...وهذي بطاقتها.. اكيد هذا بوكها .. ايش جابه هنا...
مها: يمكن نسته يوم تجي قبل يومين مع منيره
سارا: اكيد .. خلاص خلنى اخذه لها
مها: يالله حبيتى عجلى ولا تتاخرين على رجلك تراه بره يتنتظرك
سارا: انشالله
وطلعوا من الغرفه .. وبعد مالبست سارا عبايتها راحت للسياره عند عبدالعزيز .. افتحت الباب وطلع لها صوت الشيخ عبدالرحمن السديس يقراء سورة يوسف... الله هذي السوره الوحيده الي مهما قرتها او سمعتها مستحيل تقدر تتركها الا بعد ما تنتهي .. صح كل القرآن يهديها اذا كانت متضايقه ويزيل همها بس سوره يوسف غير ....ولان الشيخ يقراء ماحبت تقطع القرآن ودخلت السياره بهدوء وسكرت الباب.. لف عليها عبدالعزيز وابتسم ... ومشت السياره ... من كلام مها معها قبل شوي ... مع صوت سديس العذب ... حست بكل جسمها يسترخى ... تسندت على السيت ... وغمضت عيونها .....حست بكل همومها تروح .. والضيقه الي كانت تحس فيها من اول ما سمعت كلام عبدالعزيز مع اخوه راحت .... خلاص بكسبك ياعزيز ... وبهدم أي جدار تبنيه بينى وبينك .... وما انتبهت الا يوم انقطع الصوت ... ووقفت السياره ...
عبدالعزيز: شكلك تعبتى
سارا : يعنى ..
عبدالعزيز: ارتاحي لك بالعصر .. لاتنسين عندنا جماعه الليله..
سارا: انشالله ...
وانزلوا .. بعد ما دخلوا البيت كانت ام عمر مع عمر ونورا ..ومي منسدحه بالارض وهي مندمجه مع ماروكو(مسلسل كرتونى احبه مادري ليه) ... اول ما شافت مي عمها .. وكانت هذي المره الاولى الي تشوفه بعد ما جا .... قامت بسرعه من قدام التلفزيون .. وركضت لعمها ... عبدالعزيز اخذها وشالها ...
مي: اشتقت لك مره ياعمي ....
عبدالعزيز : وانا اكثر
مي: جبت لى هديه
عبدالعزيز: ايه .. هههههه خلاص مي خنقتينى ...
عمر: خلاص ياماما.. اتركي عمو ... وخلى عمه نورا تسلم عليه ...
مي: مابي...
عبدالعزيز: خلها حتى انا مشتاق لها ...
عمر: لا مي كبرت .. مي خلاص
نورا: هههههههه ياحليها تحبك كثير ياعزيز
ونزلت مي من حضن عمها ... وارجعت تنسدح على الارض وتشوف التلفزيون
عبدالعزيز: وانا اموت فيها...
نورا: حمدالله على السلامه يا اخوي...
وجات لإخوها وسلمت عليه ..
عبدالعزيز: الله يسلمك .. ماكانك يانورا سامنه
عمر: الا بتنفجر
نورا: هههههههه حرام عليكم .. روح بس انت ...خل اسلم على زوجتك ياعمري مستحيه وواقفه وراك وانت مو حاس على دمك
سارا: لا عادي
سارا كانت منحرجه من عمر لازالت تعتبره رجال غريب عنها ... وما تملك الجرائه انها تسولف قدامه او تسوي شي...
عبدالعزيز: هذا هي قدامك روحي اشبعي منها.....
وراح جلس جنب مي على الارض ....اخذ منها ريموت التلفزيون
مي: عمي لا تغير القناه
عبدالعزيز: بس دوره كامله .. وبحط الي تبينه
نورا: شخبارك يامرت اخوي... حمد الله على السلامه
سارا: الله يسلمك يانورا... انتى شخبارك
نورا: بخير...
سارا: الا وينها منيره ورهف...
ام عمر: فوق مثل عوايدهم
سارا: انا رايحه لهم ...
نورا: خلك معنا .. تروح مي تناديهم
سارا: لا انا اصلا رايحه فوق
عبدالعزيز: وابوي وينه؟؟
فوزيه: مادري اسال اخوك
وطلعت سارا من الصاله رايحه فوق عند البنات..
عبدالعزيز: ماترد ياعمر
عمر: خيير ماكنت معكم ايش تبون
عبدالعزيز: ابوي وينه في لى ماجا
عمر: مادري انا طلعت معك .. مادري ليه تاخر
فوزيه: خل ادق عليه احسن
نورا: تعال عبدالعزيز ..قولى ايش رايك بالزواج ..ههههه
عبدالعزيز: خخخخخ .. يعنى ايش رايي
مي: عمي لا تحط هالقناه .. بيخلص ماروكو ابي اشوفه
عبدالعزيز: اوف منك .. خذي الريموت وفكينى.. الا الجنيتين مو موجودات
نورا: في بيت جدتهم ...
عبدالعزيز: واحمد ماشفته
فوزيه: ليكون ماقلتى له يجي الليله
نورا: الا بيجي هو عمتى عايشه ...
وتموا يسولفون بالصاله .. اما سارا فراحت على طول فوق عند غرفة منيره ... الى واضح عليها انها توها طالعه من السبوح وقاعده تمشط شعرها ...
«•! 00 [ خـــوف مـن الحـب ] 00 !•»
«•! 00 [ خـــوف مـن الحـب ] 00 !•»
العرض العادي
