[دكتور هاشم الفريجي]

مَنْ يُكملُ النص

****

الليل ..
مر وابتسم..
ما يدري باللي خِفه ..!

سهَّرني..
بس .. ما درى ..
بجفوني طيفك غفه!

إبْعِدْ .. ولك لا تِرد..
يا ليل..
نومي انتفه!

وسنين..
ناسي الفرح
وبعيني نوري إنطفه

أبعَد .. حبيبي وهجر..
خلـَّـفلي بس الجفه

وأتراجف من البرد..
وبحظنه..
غيري دفه ...!!!!!

كلبي..
صفه بس إله
ولغيري..
وصله صفه .. !

وآنا اكتفيت بعشك..
هوّه..
بعذابي اكتفه!

لاني اشتفيت بوصل..
لاهوْ بمحنه اشتفه!

يا صاحبي ..
بهالوكت
طبع الحبايب جفه..

ما ندري وين الصدك؟
وشلونه ..
طعم الوفه..

تسمع كلامه عسل..
بس طبعه..
جور وعفه!

فهمني .. ياهاجِري..
للحب ..
أكو فلسفه ..؟؟؟؟

لو كلمن وغايته ..
....؟؟
من يكمل النص ؟؟

شعر: د. هاشم الفريجي