[ابو ياسر الكعبي]

شكراً لكل العناوين التي لم اتلقّى منها إلاّ الوجع,

واهِم ؟! مَتْركِت عندي ولا لون
آنه الّي إتركت عندك مواويل
كبل طَرْة الفجر تعزفها العيون
ويكطّعني وترها من يجي الليل
على خد العذاب اتطيح الجفون
وحنيني كسر خاطر نجمة اسهيل
آنه الّي رماني إهواك بجنون
حيل اوياي واستاهل بعد حيل
جنت خالي كلب غدرتني الضنون
حسبالي الوفه عندك تراتيل
وحك كل نزف بحروف اليكتبون
بعد ما أكتب الجيتك مراسيل
ردتك عون ليش اطلعت فرعون
كبل جَيْتِ الرياح أغصانك تميل
إسأل عني روحك لاتكلّي
عفتلك كل شي .. إنته الماعفتلي

وجعي بانتظار الوجع

[سفينة البحار]

شكرا للوجع الذي جعلنا نتذوق
ابداعك ايها ( الكعبي ) الكبير


عفت جفي على باب الدرب مطبوع

يأشرلك يكلك كافي .. حن .. عود

يل خليت جرحك بين الضلوع

ومن هجرك صفه الدلال ممرود

صوتي من رحت ما عاد مسموع

ونارك بالكلب جن نار نمرود

الك وجيت عمري الضايع شموع

ونحل جسمي بغيابك صار جل العود

والك وقفت عيني وكل الدموع

وضليت بامل تذكرني وتجود

وتردلي اندعي كل ما اصلي

هذا العفته آنه .. انت شعفتلي



على امل ان نلتقي مع وجع حديد

تحيـــــــــــــــــــــــــــــــــاتي

[*أحمد الكعبي*]

السلام على أبداع أوجاعكم راق لي السجال فأحببت المشاركه ... تحيتي لكم




عفتني وعفت باب أجروحي مفتوح
أرماحك غبشه أجني أشلون مصباح
گلتلك كل شي سوي أوياي مسموح
لجل عينك أموزر بس بالأرماح
نثرت أبروحي منك
بس الجروح
أبتديت أحصد خساير وأخسر أرباح
الغريب أيطيح لجلي وآنه مطروح
وشفت أقرب الناس من الضحك طاح
ترس عينك وبذنك تسمع النوح
تعال أطعن بعد بس كون ترتاح
خلگ فلاح عندي وحنطتي أتفوح
يالذريت بيه بغير مرواح
حملي الچان عالي فوگ السفوح
ياحظ يابخت يقبلهه من طاح
راح أصبر وأكابر گوه عالروح
أعلي السكته بيه مو بالصياح
شضايعلك تگلي وآنه مذبوح
سلامة گلبك أنته كل شي ماراح
يالذبحيتني أشويه التفتلي
عفتلك كل شي !!! كل شي ماعفتلي
احمد الكعبي

[ابو ياسر الكعبي]

سفينة البحار
الكعبي احمد

أستقيكما وجعاً لاينضب

"
غفه كلبي اعله سيفك وانت ذبّاح
وعلى المذبح عفتلك خلگ دفّان
وعفت دنية دمع مكسورة اجناح
بسماوات الوجع شايلها انسان
وسفينة حزن بيها الجرح ملاّح
على كُبْر الأرض ممتدّه شريان
عله طول الچفَن فَصْلَتِ الجْراح
لأن ماوالمتني أشكال الأچفان

سچاچينك غدر مِتْـحَزّمَتْلي
عفتلك مُهجِتي .. يالماعفتلي
من بغداد ( اُسجّلُ حضوري)
على عُجالةٍ

الوجعُ وبغداد وأناي
بانتظار جمال وجعٍ آخر

[سفينة البحار]

( ابو ياسر الكعبي ) ستبقى الكلمات بانتظار ابداعكم

(احمد الكعبي ) لتداخلك طعم عابق بالابداع

عفت النوم لجلك ساهرت ليل
اعد واحسب اهموم آنه بغيابك
وبجت من حزني احزان المواويل
من كثر السوالف عن عذابك
حروف اسمك ارتل بيهه ترتيل

العمر كله عزه عفته لمصابك

تمر بيه الشماته تهيل وتميل

ويحاجوني بهمس ضايع شبابك

جرحك من رحت فاضحني ويسيل

دزلي خل يجن شي من ثيابك

لتحيل المواجع للوصل حيل

واترجاك لاتبطي بجوابك

آنه الماعفت ؟؟؟ ارجوك كلي

وراوي الماعرف انت شعفتلي

سيبقى وجعي بانتظار وجع جديد

تحيـــــــــــــــــــــــــــــــــــــاتي

[ابو ياسر الكعبي]

البحار , مازالت حروفك تنبض بالجماد
"
يانوم التركته لأجل عيناي
ويا ... هَم الهجرته انت بغيابي
عفت عمري وصرتلك للوجع ناي
كلبك ماشَعَر لحظه بعذابي
ألف مرّه إعله بابك تِدِك يمناي
ولافد يوم جفّك وصل بابي
بطّلت العشك وانفطرت اسماي
وطاح إعله الأرض كوكب شبابي
وكلمن ماعرف, خل يعرف بهاي
ويِترجم لوعتي بهامش كتابي
شِلي إبْجيتك بعد واكطعت وصلي
غير اضنون مجنونه إشعفتلي

مازلتُ وبغداد بانتظار وجع جديد

[*أحمد الكعبي*]

تحيتي وودي لرحيق حرفكم


صلاة التضحيات أوياك صليت
گمت أذنت وحدي أبوكت الغروب
حيَ أعله الفراگ أبخدي خطيت
شنو شگالولك آنه صبري أيوب
مگص هجرك وأفصل بي معاناة
وأخيط بالدموع أثياب مو ثوب
شوديلك بديه الزيج شگيت
باد أمنلفراك وصار متعوب
صرت أسمع بهجرك بس تمنيت
وشايل بالعيون أدموع يعگوب
كله لخاطرك هيچ آنه سويت
يالهديت حيلي بسدت البوب
وآنه الچنت أظن منك تمرلي
فتت من باب بيتك ماصحتلي

[/CENTER][/CENTER]

[جودت الانصاري]

انت بيتك ميت ,, طابق
واني بيتي ,,, الف كصبه ,,
مسيس بنص الاهوار
وحتى ما عندي
جدار
لان كل الوطن بيتي ,, وانعم بحسن
الجوار
ومن اسافر ,,, عندي ستوته زغيره
وما يهمني حتى لو تملك
قطار

[ابو ظاهر البركي !]

تحية حب واجلال لأساتذة الادب

عجيبه شلون تسألني شعفتلك
هو انه شخذت حتى تركتلك
انا الماعندي كلشي انت الخذتني
وعجيبه وآني عندك ماشفتني
آني اسه ارد انشدك عني وارتاح
بعدني بجيب بالك لو عفتني؟
اذا نشدوني عني احجيك وبآه
لسه انت التجاوب لوبعتني؟
انا الردتك اضل وياك للدوم
اذن ردني لونك ماردتني
اذن ماعندي شي. وياك كلي
وانت لو عفت هم ماعفتلي


تلميذكم
ابو ظاهر البركي

[*أحمد الكعبي*]

[CENTER]

لا زلت أتنفس كل حرف من حروف اوجاعكم
السلام على أهل الوجع


عفتني بلوعتي مثل اليتامه
تموتهم الحرگه من يجي العيد
وعفتلي الدمع والهم والملامه
تجيني وي صفنتي أبلا مواعيد
مته ترجع يغايب بالسلامه
أحس بنار هجرك گامت أتزيد
عفتني أبلا جنح مثل الحمامه
بجنح مكسور تتعنه المشي تريد
كلشي أوياي ماعندك تگلي
غير الوجع والهم ماعفتلي

[/CENTER]