[ابو ياسر الكعبي]

مازال أبداعك ملهماً لزفرات الوجع

شوكت؟؟ هسه عفتها امفتحه البوب !!
سنه عالباب واكف مَطـْلَعِتلي ؟
مو جانت جروحي تكض الدروب
إلك , وانت ملح بيهن تخلّي
كلبك هسه صاير, يحن ,ويذوب !
وأمس هوّه التعمّد بيده جتلي
بعد عكبيش ,كلبي مات مصلوب
وسجّينك عله نعشه تصلّي
مو آنه .. اشوكت مارِدته , مصحوب
ولا أقبل أكونن للتسلّي
غير الهجر واللوعه .. إشعفتلي .؟؟

بانتظار الوجع القادم

[سفينة البحار]

ابو ياسر الكعبي ( ليس لابداعك حدود )



عفتلك لوعة؟؟ .. أي .. بس لوعة احساس
تكلله بنار خطوات المبعدين
وعفتلك جمرة ؟؟ .. اي .. بس جمرة انفاس

شلتهه بصدري صابر كومة سنين

شنهو اللي يصح للعشك مقياس

وين الكه اللي يحكم بالعدل وين

رضيت آنه بدليلك حكم خلي

ويكول آنه شعفت .. وانت شعفتلي



مازلنا نسير في طريق الوجع بحثا عن وجع جديد

تحيــــــــــــــــــــــــــــــــــاتي

[ابو ياسر الكعبي]

سفينة البحار
وهل للنزف طعمٌ دون ابداعك
"
عفت لوعه احساسك ..لو نياشين ..؟؟
مكابر خَضَّـرت من جِـدمي للراس
موجنت إعله دربك أزرع العين ؟
أناطر جيِّـتـك واتفايض إحساس
ضعت بين اسمك وبين العناوين
ومابين انتكاسه , وبين لاباس
إصْبَرتلك ..! لجن كلِّي الصبر لاوين..؟
وراي الناس ,, عُـبرتني !! وإجت ناس ؟؟
تطالبني ؟ إبْـأدِلَّـه وبّـراهين
وعله ضلوع القصصايد ألف مقياس
إبَّـطِن كل بيت تنبض روح للحين
وعله كل روح ,عِفت أرواح حرّاس
إكتَبتها اكلوب تمشي ويمها ضِلِّي
وتناشدني او تِكلِّـي إنته إشعفتلي ؟!
"
مازلتُ منتظراً للوجع الجديد,

[سفينة البحار]

عناوين الابداع معروفة
على رأسها الكبير
ابو ياسر الكعبي

انه العايف الك من كل عطر لون
نزيف اجروحي يشبه عطر الورود
وانه الجنت ارتجي يصير الدمع عون
بغيابك صار فرعون على الخدود
عمري اصبح فريسه لليمرون
صاح الحزن وسط العمر فرهود
نشف نزف الدمع من شط العيون
واتاني شط فرحتي يصير بي زود
وصرت اترجه كون الرايدة يكون
وكون يرد عليه الرايح ردود
وضليت بامل كون .. وتكلي
لا تسأل بعد .. انت شعفتلي ؟؟

ستبقى عيني بامل ان ترى وجعا جديدا
تحيــــــــــــــــــــــــــــــــــاتي

[ابو ياسر الكعبي]

شكراً لكل العناوين التي لم اتلقّى منها إلاّ الوجع,

واهِم ؟! مَتْركِت عندي ولا لون
آنه الّي إتركت عندك مواويل
كبل طَرْة الفجر تعزفها العيون
ويكطّعني وترها من يجي الليل
على خد العذاب اتطيح الجفون
وحنيني كسر خاطر نجمة اسهيل
آنه الّي رماني إهواك بجنون
حيل اوياي واستاهل بعد حيل
جنت خالي كلب غدرتني الضنون
حسبالي الوفه عندك تراتيل
وحك كل نزف بحروف اليكتبون
بعد ما أكتب الجيتك مراسيل
ردتك عون ليش اطلعت فرعون
كبل جَيْتِ الرياح أغصانك تميل
إسأل عني روحك لاتكلّي
عفتلك كل شي .. إنته الماعفتلي

وجعي بانتظار الوجع

[سفينة البحار]

شكرا للوجع الذي جعلنا نتذوق
ابداعك ايها ( الكعبي ) الكبير


عفت جفي على باب الدرب مطبوع

يأشرلك يكلك كافي .. حن .. عود

يل خليت جرحك بين الضلوع

ومن هجرك صفه الدلال ممرود

صوتي من رحت ما عاد مسموع

ونارك بالكلب جن نار نمرود

الك وجيت عمري الضايع شموع

ونحل جسمي بغيابك صار جل العود

والك وقفت عيني وكل الدموع

وضليت بامل تذكرني وتجود

وتردلي اندعي كل ما اصلي

هذا العفته آنه .. انت شعفتلي



على امل ان نلتقي مع وجع حديد

تحيـــــــــــــــــــــــــــــــــاتي

[*أحمد الكعبي*]

السلام على أبداع أوجاعكم راق لي السجال فأحببت المشاركه ... تحيتي لكم




عفتني وعفت باب أجروحي مفتوح
أرماحك غبشه أجني أشلون مصباح
گلتلك كل شي سوي أوياي مسموح
لجل عينك أموزر بس بالأرماح
نثرت أبروحي منك
بس الجروح
أبتديت أحصد خساير وأخسر أرباح
الغريب أيطيح لجلي وآنه مطروح
وشفت أقرب الناس من الضحك طاح
ترس عينك وبذنك تسمع النوح
تعال أطعن بعد بس كون ترتاح
خلگ فلاح عندي وحنطتي أتفوح
يالذريت بيه بغير مرواح
حملي الچان عالي فوگ السفوح
ياحظ يابخت يقبلهه من طاح
راح أصبر وأكابر گوه عالروح
أعلي السكته بيه مو بالصياح
شضايعلك تگلي وآنه مذبوح
سلامة گلبك أنته كل شي ماراح
يالذبحيتني أشويه التفتلي
عفتلك كل شي !!! كل شي ماعفتلي
احمد الكعبي

[ابو ياسر الكعبي]

سفينة البحار
الكعبي احمد

أستقيكما وجعاً لاينضب

"
غفه كلبي اعله سيفك وانت ذبّاح
وعلى المذبح عفتلك خلگ دفّان
وعفت دنية دمع مكسورة اجناح
بسماوات الوجع شايلها انسان
وسفينة حزن بيها الجرح ملاّح
على كُبْر الأرض ممتدّه شريان
عله طول الچفَن فَصْلَتِ الجْراح
لأن ماوالمتني أشكال الأچفان

سچاچينك غدر مِتْـحَزّمَتْلي
عفتلك مُهجِتي .. يالماعفتلي
من بغداد ( اُسجّلُ حضوري)
على عُجالةٍ

الوجعُ وبغداد وأناي
بانتظار جمال وجعٍ آخر

[سفينة البحار]

( ابو ياسر الكعبي ) ستبقى الكلمات بانتظار ابداعكم

(احمد الكعبي ) لتداخلك طعم عابق بالابداع

عفت النوم لجلك ساهرت ليل
اعد واحسب اهموم آنه بغيابك
وبجت من حزني احزان المواويل
من كثر السوالف عن عذابك
حروف اسمك ارتل بيهه ترتيل

العمر كله عزه عفته لمصابك

تمر بيه الشماته تهيل وتميل

ويحاجوني بهمس ضايع شبابك

جرحك من رحت فاضحني ويسيل

دزلي خل يجن شي من ثيابك

لتحيل المواجع للوصل حيل

واترجاك لاتبطي بجوابك

آنه الماعفت ؟؟؟ ارجوك كلي

وراوي الماعرف انت شعفتلي

سيبقى وجعي بانتظار وجع جديد

تحيـــــــــــــــــــــــــــــــــــــاتي

[ابو ياسر الكعبي]

البحار , مازالت حروفك تنبض بالجماد
"
يانوم التركته لأجل عيناي
ويا ... هَم الهجرته انت بغيابي
عفت عمري وصرتلك للوجع ناي
كلبك ماشَعَر لحظه بعذابي
ألف مرّه إعله بابك تِدِك يمناي
ولافد يوم جفّك وصل بابي
بطّلت العشك وانفطرت اسماي
وطاح إعله الأرض كوكب شبابي
وكلمن ماعرف, خل يعرف بهاي
ويِترجم لوعتي بهامش كتابي
شِلي إبْجيتك بعد واكطعت وصلي
غير اضنون مجنونه إشعفتلي

مازلتُ وبغداد بانتظار وجع جديد