جينه يوم الأربعين! الشاعر حسين الساعدي

منذر الساعدي · بتاريخ : 24-12-2012 الساعة : 07:11 AM

جينه يوم الاربعين!

جينه يوم الاربعين--انصيح يا ثار الحُسين

شوف جَم عابس اويانه
جَم حَبيب الاِجه اهنانه
والف حُر التِلكَانه
وبينه لهفة عاشكَين
جينه يوم الاربعين--انصيح يا ثار الحُسين

----

نرد للكافل يمينه
نجر سهم الطفه عينه
اِبرايتهَ وِيصول بينه
على كل طاغي اِولَعين
جينه يوم الاربعين--انصيح يا ثار الحُسين

----

كل موالي مضحي دمه
الك بيك اِوزاد همه
ما نعوفك يبو اليمه
وما تنسينه السنين
جينه يوم الاربعين--انصيح يا ثار الحُسين

----

انشيل عبد الله ابسلام
طفل من نور الامام
ليش فطمُوه بالسهام
اَل اميه الناصبين
جينه يوم الاربعين--انصيح يا ثار الحُسين

----

جينه بدروب المنيه
انزور ابن حامي الحميه
انوافي ونواسي الزجيه
ابذاكَ دمع ام البنين
جينه يوم الاربعين--انصيح يا ثار الحُسين

----

جينه للمهدي نعاهد
احنه جيشه وهوَ قائد
ايصول بينه بالشدايد
ابراية الحق المبين
جينه يوم الاربعين--انصيح يا ثار الحُسين

بقلم
حسين الساعدي

منقوول