[مهيمن الاسدي]

ابدي بسم الرب معاك
من فكر يكره محاباة الخطيئة ..
وأنت راهب
يعني مامعناه عندك ..
رهبة من جرح الاحاسيس البريئة
　
بين عقلي وعقلك يدور الحوار ؛؛
بكل محبة وكل مودة
　أنته شايل نار بيدك ..
وآنه شايل بيدي وردة
　
وانته قيس الفرق .. مابينك وبيني
بكثر ماشايل ظغينة الفرق قيسه
... انته اشعل نارك اباب الجوامع ...
وآنه ازرع وردتي اباب الكنيسة !!
　
هُز اليك بجذع عقلك .. حتى يتساقط
غُبارك
بلكي من تتمخض الفكرة بضميرك ..
تقتنع وتطفي نارك
　
طوف بآيات الكتاب .. آية آية ،
وكلمة كلمة
وشوف نارك لو سرت بيه شتريد ؟؟
ومر على مهد المسيح .. وخلي بالك
حتى ماينصلب بيدك من جديد
　　　　　　　　　　　　　　　　　　　　　
وآنه عندي أنسان .. كتلة من المشاعر
ينجرح بس مايصيح
وينشتم بس مايصيح
نبــي لكن ..
دمعة عيونه غصن ،،
لحظة وتطيح ..
　
يرضه لو نارك تظل تاكل بروحه .
.بس ابد مايرضه نارك ،،
تجرح أحساس
المســــــــــــــــــــــــــــــــــــــــــــــ ــــــــــــيح .

وكبل ما تشتعل عيدان الثقاب
　أجّل النار ..
و اخذ نظرة تأمل عل كتاب
واذا ماعندك قناعة
وتعتقد ماعندي دين
أنصحك أن تقره سورة مريم
وأفهمها زين ،،

اعتقد ذاك الوكت
نارك تشب بين الظلوع
..وكل مساعيّك وحقدك
راح يتحوّل خشوع
　
دعك من ديني ، ورسولي
وفكّر بحكمة وخضوع ..
وكبل ماتحرك المصحف ،،
شيل أسم الطــــــــــــاهرة العذراء مريم ؟؟
　 حتى ما يزعل يسوع !!