[خالد محمد مهدي]

((من شرَبك يبني الماي))

يوليدي ماتبجي بعد \\ من شرّبك يبني الماي

يامه صدرك

من سهم نحرك

**********

آني جنت أرجه وجودك خيمه بيهه أتلم سنيني

الورد ما حسّبت لحظه يروح عنّي وما يجيني

وأبقه أكّابل مهد خالي ودمعتي تلولي أو ونيني

عيني مشتاكه أعله شوفك من يرد لهفتهه عيني

منّي خذك طير الوعد \\ وعن روحي يرضيعي أبتعد

من نشف درَّك

من سهم نحرك

**********

ترجع أتفرِّح ظنوني ضاع تالي وياك تعبي

ألمن اوصف سهر ليلي يعبد الله أنجوه كّلبي

أنحنه حيلي أنكسر ظهري بعد ما وجّده دربي

نوحي لونيني شكاله شنهو ذنبك شنهو ذنبــي

مذبوح تالي أترد ألي \\ غيابك ذبح كل أملي

العطش ضرَّك

من سهم نحرك

**********

نجوم بسمايه أعدهه وعله كل نجمه رسومك

شيب راسي عليك يندب ريت يومي كّبل يومك

رحت لُمَّك الزجيَّــــــه وعفت لُمَّك بس همومك

عيوني تمطر نار كبره يالولد لو شـــــم نسومك

بنسمة هوَه طيبك أشم \\ وعالماي وجهك ينرسم

من نشف درَّك

من سهم نحرك

**********

شأرد أجاوب لو سألني رباك يبني شأرد أكّلّه

العطش ماخلَّـــه مهجه وفحطتك ربَّتلي عِلَّــــه

عيون تذبل وجه أصفر منظــــرك للجبــد سلَّه

يُمَّه لو بالدمــع تروه والدمــع أدري تِمِلَّــــــــه

درِّي نشف صدري يحن \\ بلياك ليل نهار أون

اعرف وعذرك

من سهم نحرك

**********

وياك ماخذتـــه الدليلــــي عافك وعايش عجيبـــه

روحي ظلَّت تنعي فكّدك وبيَّه أحس روحي غريبه

عمري ماريده بغيابك من تردلـــــــي عمري جيبه

أخذ جبدي بصف وريدك وحرمله خلَّــــــي يصيبه

ماريد بعدك دنيتي \\ أبقه اعايش حيرتي

يمه شخبرك

من سهم نحرك

**************************