[كريم السعبري]

وكفت اليوم اقره لآغلى مولود وعطر عل الناس بيدي كون ارشه
وما مخلوق انته ياعلي اليوم واضن سواك لمن سوه عرشه
وكل شيعي وموالي الك فرحان اجهجكليته بيده وكام طشه
لان انته العدل وانته المساوات والانصاف انته زرعت هرشه
تتطعم الفقره بيدك ياعلي ادريك اليتامه اخلافك ابدا متعشه
اذاجوعان واحد كال ياناس ميسمعه السياسي اذنه طرشه
تعب والله تعب جبناهه لليوم فوك الظيم اعلم الجدم ممشه
واذامسؤل كتله انصف وياي عليه تصيح ربعه هاي حرشه
متخوم السياسي يبات كل يوم وجوعان الفقير وخالي كرشه
ماعندي فلس والصار مسؤل كل لحظه التمر يهمشله همشه
دوخونه الشباب وحايره ابيش ذاك بالريال وهذا برشه
عليه الهاشمي مو نبي مسويه مو هسه انكشفلي وبان غشه
دليمي ودايني وميت الف عرعور للتفخيخ فتحو بيه ورشه
كل طاغي الابد ماينصف وياي منجل ضيمنه لازم يحشه
منخلي وطنه بيد الاغراب موحته البوم يعرف يحمي عشه
كردي وناصبي وكفولي اضداد خيرهم اصبعي بعينه اخشه
ماأأتلف ويه اليكره احسين وشرف ناسي حدر جدمينه افرشه
علي ياابو الحسن اشكيلك عله الناس كلمن عاف دينه ولزم دشه
علي يابو الحسن ضيعنه الانصاف البنيته بساعدك كمنه نفلشه
اريد المنصف الكلبه عله الدين ماريد الحكمني ودينه قرشه
يمته نفتهم دينك يبو حسين جمره الدين بس ياجف يكمشه
كل منصف وخير يخدم الناس على راسي انصب بيدي عرشه

------------------------

بقلم كريم السعبري
1\6\2012

[ابوتكتم الخير]

وكفت اليوم اقره لآغلى مولود وعطر عل الناس بيدي كون ارشه
وما مخلوق انته ياعلي اليوم واضن سواك لمن سوه عرشه
السيد كريم السعبري
دعني أول من يقف على سواحل إبداعك فأرتشف
منها ما يصل إلي في حب علي وعدالته
نظم فا ق الروعة وألأبداع فتساما ملا ئكيا
في صحيفة أعمالك يخطها أمير البلاغة والنحل
موفق

[ابو ياسر الكعبي]

الله عليك ياكريم السعبري

أزاد الله ابداعك ابداعاً

جميل كما عهدتك

وفقك الله

وسدد خطاك

[كريم السعبري]

استاذنا الفاضل السلام عليكم
هنيئا لكم ولادة أمير المؤمنين
اخي ابوتكتم السباق انت دائما وتلهمنا من دروسك
مايفلج قلوبنا وينير طريقنا بحب العتره الطاهره

وسوف ارد على الاخ الكعبي في وقت اخر
تحياتي السعبري