[جابر النجفي]

بسم الله الرحمن الرحيم
اللهم صل على محمد وآل محمد وعجل فرجهم

مانصت رايتي ( قصيدة نزله للأربعين )
ــــــــــــــــــــــــــــــــــــــــــــــــــ ـــ
خويه جيتك من بعد ضيم اليُسُـر
خويه جيتك ما ﺑﮔــه عندي صبُر
شوفتك غايتي == ما نصت رايتي
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ
خويه حاﭽيني – يابعد عيني == جيتــك إبعبره يبو اليمّه الوفي
أمّك الزهـــــــره – آني منتظـــره == تحضر إوياي إو أهِل حزني الخفي
ننصب المأتم – يمّك إو نشتم == عطـــــرك البيه الرزايا تختفي
وأشكي آلامي – إو جور أيّامي == مـــن مشه عنّك ضعنه ياصفي
خويه ريتك تنهض إتشوف الحرم
خويه ريتك تنهض إتداوي الألـــم
من بعد محنتي == ما نصت رايتي
ــــــــــــــــــــــ
منهجك آني – صار عنوانــــي == ياحبيبي إو نور عيني ياحسين
وإفضحت آني – زيف عدوانـي == نار صبّيت إعلى كُل الظالمين
ياأبو الأكبر - ﭽــن علي حيدر == يكشف المستور والباغي اللعين
خويه ياروحي – كثرت إجروحـي == بس صرت نبراس للحق المبين
خويـــــــــه آني مانسيتك ياعَلم
خويـــــه آني ثورة الحق الأشم
من علت ثورتي == ما نصت رايتي
ـــــــ
نورك إويانه – يسري مولانـه == راسك الصار العجب يامُنيتي
يقره آياته – تجري دمعاتــــه == ينظر العيله إو يشاهد حالتي
يلعن الظالم – والعدو الغاشـــم == ﯾﻓﮔــد الأطفال يسمع حسرتي
منظره الدامي – يجرح أيّامــــي == والدمع محبوس يروي حيرتي
خويه ماتت فوﮒ راسك نبعتك
خويه ماتت بنتك إو ما شافتـك
وأمسح إبدمعتي == ما نصت رايتي
ــــ
إنهض إويانه – للعله إبشانه == صيح ياعباس إختك حايره
زينب إرويها - ﮔــوم ودّيهـــــا == للوطن تنخاك يا بِن حيدره
عذرك إﭽفوفك – منعدم شوفــــــــك == بس تريدك صوت هاي الصابره
تمشي ويّاها – صار رجواهــــــا == والوفه أنهار من عندك جره
خويه يبو فاضل إجتنه العالمـــه
خويه يبو فاضل إجَت بت فاطمه
ما هدت عبرتي == ما نصت رايتي
ــــــ
خويه ياعيني – زهرة إسنيني == راح أمشـــي يم كفيل العايله
وأﮔﻌــد إﮔباله – اني وإعيالـــــــه == وأسئله عن حالته وأشرح إله
غربتي إو ليلي – وأهتف إبويلي == خويـه ياعباس راعي المرجله
إختك إو جيتك – تنتفض ريتـــــك == تنهض إتنادي هَله إو ميّة هَله
خويه تنهضلي وشوفك ياأبي
خويه تنهضلي أسألك بالنبـي
يا أمل دنيتي == ما نصت رايتي
ـــــ
يم أبو فاضل – رايته إتناضـــل == رفرفت من يمّه حليت إبحزن
ﺗﺑﭽـــي ملهوفه – رادت إﭽفوفــــــه == تنهض إو ترفعها للعالي إو تِحِن
جــــوده ذب مايه – روحــــــه ﺷﭽـايه == يشكي للساﮔــي الظمه إبحسره إو يوِن
سيفه ناداني – شوفي أحزانـــــــــي == من بعد عباس ما أنهض أضِن
خويه ناديت إو أبد ماكو جـــــــواب
خويه ناديت إو جره دمع العتـــــاب
إسمع الشكوتي == ما نصت رايتي
ــــــــــــــــــــــــــــــــــــــــــــــــــ ـــــــ
مع تحيات شاعر اهل البيت / جابر النجفي
http://www.alshiaclubs.com/upload//view.php?file=a67892ee8b