[مازن الشطري]

يحسين اطفالك تنخاني عمي الماي الماي***وأنه المن حيدر ضماني تدري الهاي الهاي


ابكَلب يلهب ***أرفعوا مطلب


عمي الماي الماي *** عمي الماي الماي


********************


يحسين بالــذر من جنت *** طيف أبحر أيجاده


بسمك أنه أهناك أسمـعت*** جبريل صاح وناده


فجأة ابضميري اتغـلغلت*** أو نار العشكَ وقاده


وبعالم الــذر بايـعت ***لبى الضمير أنشاده


عد عونك لمّن تنخاني تامر يا مولاي ***لو تعطش بالحومه اطفالك أعصرلك عيناي


وذبهن ذب *** أبكَلب يلهب


عمي الماي الماي *** عمي الماي الماي



الكربله وجـودي انتقل *** من بعد فــترة ومده


جنب النهر ضعنك نزل*** والماي يحــرم وِرده


من العطش عبد الله ذبل*** والدمع جــرح خده


ياعمي دلالي أشتــعل*** صوت أسمعت من مهده


ياعمي كَليبي المتلهب وبجودكمعقود *** أكصد يالساقي وروينه جيب الماي اوعود


ونه أترقب *** أبكَلب يلهب


عمي الماي الماي *** عمي الماي الماي



لحسين بالجود أكصدت *** أبحركَة كَلب حاجيته


صوب الشريعة أتوجهت *** ابلهفة العلم رفيته


وبسيفي للروس أحصدت*** عنوة النهر طبيته


للعذب بجفوفي أغرفت *** والماي ما شربيته


هيهات انه أشرب من دونك وكَليبك عطشان *** وبصفك ظلت تتناني اطفال ونسوان


محال أشرب *** أبكَلب يلهب


عمي الماي الماي *** عمي الماي الماي

حمليت روحي براحتي *** شديت روحي أبجودي


وبيش أوصف فرحتي *** وفيت كــل أعهودي


كل همي توصل جربتي*** كل غايتي ومكَصودي


لنْ سيف طير يمنتي *** بَتر يخــويه أزنودي


ماهمني اليمنه ولا اليسره بس همي على الجود***وأصوات أطفــالك أسمعها ماتخــمد وتهود


أبدمع تنحب *** ابكَلب يلهب


عمي الماي الماي *** عمي الماي الماي



خطين متروك الأثر *** يرسم دمـــه جفيني


والثالث ابسهم النظر *** مسجوم مدمع عيني


والعمد للراس انتظر *** فوكَـ الأرض يرميني


واللساني للحرة أعتذر*** يم الخدر عذريني


لا مو لجل العين أتعذر لا مو علجفين *** جي صابوا بأسهام القربه وأطفال امتانين


الأجل أقرب *** ابكَلب يلهب


عمي الماي الماي *** عمي الماي الماي

من المهر لمّن طحت *** جفين مامش تحمي


للترب لمّه اتوسدت *** وحسين حاضر يمي


كَتله السكينه واعدت*** كَلها الـعذر ياعمي


والحره زينب لو شفت ***مايج خبطته ابدمي


يازينب يالحرة اتعذر يابت الكرار *** وأطفال التنشد ياعمه عمي عليه أشصار


لها اتسبب *** أبكَلب يلهب


عمي الماي الماي *** عمي الماي الماي

الشاعر

مازن الشطري

[زكي الياسري]

احسنت يا شاعرنا الفذ
ابداعك لا يعرف الحدود
تحياتي لك يا رائع الحرف

[مازن الشطري]

اقتباس : المشاركة الأصلية كتبت بواسطة زكي الياسري [ مشاهدة المشاركة ]

احسنت يا شاعرنا الفذ ابداعك لا يعرف الحدود تحياتي لك يا رائع الحرف

اطرائك وسام أضعه في عنقي يامولاي المبدع زكي الياسري.

[احمد العراقي]

احسنت واجدت لهذه الرائعة الجميلة
اخي الحبيب مازن
جعلها الله تعالى ثقلا لك في مورد حسناتك الصالحة
بوركت ووفقك المولى عز وجل لكل خير
تحياتي لك

[مازن الشطري]

اقتباس : المشاركة الأصلية كتبت بواسطة احمد العراقي [ مشاهدة المشاركة ]

احسنت واجدت لهذه الرائعة الجميلة اخي الحبيب مازن جعلها الله تعالى ثقلا لك في مورد حسناتك الصالحة بوركت ووفقك المولى عز وجل لكل خير تحياتي لك

دعائكم غاية المنى وخدمتكم ياخدمة الحسين شرفٌ لنا مشكور حبيبي على المرور.