[احمد العراقي]

الكفيل ابي الفضل العباس عليه السلام

مثل المستحي ونگلات جدمه اثگال
خطوة يريد .. ماكو لغايته اتقدم

مثل الضاع صوته وتيّه الچلمات
وطش حروفهن بلسان متلعثم

مثل وگفة حيا طال انتظاره اسنين
تطلع من خدرها العفة وتسلم

حال ابيات شعري التوصفك مولاي
وصورة لنور وجهك عالورق ترسم

يلم چف الوصف ابعاد سرّك راد
وضاع ابعالمك ياابو الفضل شيلم

شمس دنيا المكارم صاغك الكرار
يل مالك غروب ولا ليالي اتضم

يبان ابشمس وجه حسين طهر البيك
او فيّه الـ عالخدر بجفوفك امخيم

اليسولف عن بطل يبدي الحچي بزينات
والزينات اصلهن بيك متیمم

الشرف باسمك توضه وصلّه بيك الزود
حرم واسمى الصفات ابحضرتك تحرم

تحج ما بين چفك والعلم والجود
وعلى الشباچ سبع اشواط تالي اتم

تعفّر من عطر تربك جبين النور
و شفاف الولاء لعتبتك تلثم

تصف ابسنى الكبة وصوتك الها اذان
وتنطر بيها وجهك يالچفيل ايإم

بداية وحد الك ما حط قضى التاريخ
والسان النهاية بهاي متلجم

خط دربك علي وسمّاك بالعباس
اسم عين الصواب و انعم و اكرِم

شد عندك عهد من صرت موكل بيه
ايعرف چفك وفيّه وبالكفاله اتزم

سمع منك نعم وانت ابخطه الميلاد
وظل كاروك عزمك بالعهد يقسم

صفن من موقفك واحتار بال الكون
يبن حجر الوفه الـ بخلافه ما يفطم

قصة انت امن اكتبك يا نثر يكفيك
وكل نثر البطولة ابساحك امسلِّم

الخلود ابصوت دمك بان صمته اعليه
بيَّن قصر عمره بسما المتكلم

ابمعناك الكتبته ايضيع ما ينقاس
قطرة ابنص بحر هيهات اثرها ايهم

بس لمَّن گلت صرت اعله نبعك ضيف
وادري ابفيض فضلك يغني من يكرم


احمد العتابي
العراقي

[رياض الرسل]

السلام عليكم

حي الله عتاب

وحي الله قلمك الراقي حبينا
اكثر من رائعه و موفق عليها
وجعلها الله في ميزان اعمالك
بحق العباس


خادمك
رياض الرسل

[ثورة الحسين]

تسلم اناملك على ماخطت من كلمات ولائيه
اخوك الصغير
(عبدالله الشاعر)