السلام عليكم ورحمة الله وبركاته
اللهم صلي على محمد وال محمد
هذي قصة وانا امس انوم ولدي لازم يبي قصة من تاليفي طبعا اهر ويطلع لي كلام وكلام وصارت قصة
اليكم القصة
اول مانبدي بالصلاة على النبي واله
كان ياماكان في قديم الزمان في بنت أسمها دانة مسكينة وحلوة وامورة فقيرة وعايشة مع امها الطيبة في بيت صغير وبسيط
وحالهم مايسر عدو ولاصديق , البنت يتيمة والأم ارملة يعني ماعندها ابو يتيمة تكسر الخاطر ونفسها تتعلم وتروح المدرسة مثل باقي البنات بس ظروفهم ماتسمح وامها تستحي تقول لأحد يساعدهم .بس الجيران مايقصرون يعطونهم
بس مايكفي , بيعطونهم اكل بس موعلى طول بيساعدونهم ,والام المسكينة كانت تخيط ملابس حلوة ومعظم جيرانعم تخيط عندها .0قبل ماكان في خياط مثل الحين كل النا تخيط عندهم .واتطورت الناس ماقاموا يخيطون عندها وكبرت
دانة وصلت لمرحلة التعليم فاتتها الروضة المفروض تكون بالمدرسة . فديتها كل يوم الصبح تروح المدرسة اللي يمهم تدخل بدون محد يشوفها وتتخفى بين الصفوف مسكينة تبي تتعلم بس هي شاطرة عندها رغبة للتعلم .مسكينة شافت قلم طايح بالحوش مال المدرسة مكسور وطلعت الرصاص اللي فيه وقامت تتعلم تكتب الحروف وتابع المعلمة حرف حرف
تعرف على شنو تكتب مسكينة تكسر الخاطر على فستانها اذا راحت البيت تاخذ قطعة كارتون وتقل كل اللي فهمته وتعلمته من اشكال وحروف وكلمات وارقام
بس في لحظة ابتسم الحظ لها عارف اشلون؟؟
في يوم من الايام وصلت دانة المدرسة وشافتها وحدة من المعلمات وظلت تراقبها قالت هذي من ليش ماتدش الصف ؟؟
لانها كانت لابسة ملابس المدرسة لان جارتهم اذا بتبدل ثيابها كل سنة تعطيها بدلتها تلبسهم في بيتهم وهي عشان محد يشك فيها تلبسهم وتروح المدرسة لانها ذكية تعرف تتصرف . زين ماعلينا شافتها المعلمة وراحت تتخفا وراها تراقبها ولاحظت عليها الحماس والاندماج مع الدرس وهي متخفية عند النافذة وراحت المعلمة للمديرة وقالت لها
المعلمة : انا شفت البنت اللي كلمتج عنها عند الصف الاول .
المديرة: وينها بروح معاج اشوفها
المعلمة: اوكي امشي معاي
وراحوا وشوي شوي مسكتها المديرة وهي خايفة مرعوبة قالت لها.
المديرة: اشفيج حبيبتي لاتخافين مابنسو لج شي بس انتي تعالي معانا الادارة .
دانة: والله العظيم ابغي اتعلم بس موقصدي ادخل المدرسة بهالطريقة غصبن عني رغبتي بالتعليم دفعتني.
المعلمة: مايخالف انتي قومي معانا لاتخافين .
دانة : بدمعتها البريئة انشاء الله بس لاتضربوني.!
المديرة: وهي تبتسم ولايهمج .
المعلمة: انا بروح عندي حصة.
المديرة اوكي روحي انا باخذها معاي الادراة.
ومشت دانة الحلوة مع المديرة وراسها منزل بالارض ودموعها على خدودها الوردية.
وصلوا الإدارة......
المديرة: تعالي قربي حبيبتي قعدي على الكرسي لاتخافين.
دانة : موخايفة بس اول مرة اقعد في مكان راقي وبارد وعلى كرسي بعد!!!
المديرة: اي قعدي انتي تستاهلين احلى من هالمكان عارفة ليش؟
دانة: بنبرة صوتها الناعم الحلو! ليش؟؟
المديرة: لانج شاطرة وذكية !! بس ماقلتي لي شسمج؟؟
دانة: اسمي دانة
المديرة: بنت من ؟؟
دانة: سكتت انا انا انا بنت فقيرة ويتيمة ماعندنا احد يصرف علينا بس اهل الخير يعطونا اكل وانا اريد اتعلم حالي حال البنات والاكل واللبس على الله مومهم .وهي تبكي بصوت مرتفع كل اللي بالادارة التفوا حولها .
المديرة : دمعت عينها لحال وقالت لههم خلونا بروحنا وطلعوا.
دانة: الله كريم مثل ماتقول امي صبري يمكن اذا كبرتين او يوم من الايام يتحسن حالنا وتتعلمين وتحققين اللي في بالج.
المديرة: زين حبيبتي دانة انا بروح معاج البيت اذا خلص دوام المدرسة اوكي ..بس امج تدري عنج الحين انتي في وين؟؟
دانة: ايه .بالاول منعتني بس الحين فوضت امرها الى الله وخلتني براحتي اتعلم من وراء الجدران.
طق جرس المدرسة وخلص الدوام وطلعت دانة مع المديرة وركبت سيارتها ....
وصلوا لبيت دانة !!!
دانة: تفضلي مديرة لحظة انادي امي بس البيت موعلى قد المقام!
المديرة: لاتقولين كده
دانة: امي اكو عندنا ضيفة.
الأم: حيا الله من جانا . بسم من هالضيفة ؟؟
دانة: مديرة المدرسة تبي تشوفج!
الأم: المديرة؟؟!!! وشدراها ببيتنا ؟؟؟ وانتي شنو مسوية ؟؟
دانة: والله ماسويت شي .بس انتي قومي تعالي نخليها واقفة عند الباب موعدل؟
الأم: حياج اتفضلي مسامحة بيتنا حالته حالة قديم يفشل.
المديرة: عادي اختي بيتكم صج قديم بس متواضع ونظيف وكل شي مرتب .
دانة: شنو تشريبين مديرة؟
المديرة": شكرا حبيبتي بس ماي
دانة: حاضر
وجلست الام والمديرة صامتين موعارفة اشلون تبتدي الكلام!!!!
المديرة: انا أبدأ الموضوع , شوفي يااختي انا شفت دانة بالمدرسة وعلمتها بالسالفة وقالت انا عجبتني شخصية دانة
وكلمت الوزارة عنها والمسؤلين عن مساعد الخدمات الاجتماعية للاسر المحتاجة بس انا عندي اقتراح هما راح يعيدوا بناء بيتكم بس المشكلة انكم وين تروحون .
الام: بس وين اروح انا وبنتي ؟؟
المديرة: لاتحاتين, انا باخذكم عندي بالملحق في بيتي لاني عايشة مع بنتي وولدي وزوجي انا بعد متوفي بس انا مديرة وعايشة بخير ماقاصرني شي يسعدني انج تعيشين معاي انتي ودانة وشرايج؟
الأم: لا مايصير موحلوة فشلة!!
دانة : اتفضلي مديرة الماي واسفة انا ااتخارت عليج في قلبها دانة: رحت اشتري لج ماي من الدكان لان مانشرب ماي حلو مانقدر نشتريه على طول!
المعلمة : شكرا حبيبتي دانة .قعدي سمعي انا حبيت تعيشوا معاي في بيتي لوقت مايخلصوا من بناء بيتكم ها اشقلتي؟
دانة: انا مابيدي شي.الكلمة الاولى والأخيرة لأمي اللي ربتني وتعب علي ماأقدر اتقدم بكلامي عليها.
الأم : وهي تبتسم عفية على بنتي انا موافقة بس بشرط!!
المديرة:
قولي باللي تامرين عليه؟؟
الأم:خليني اطبخ وانظف في بيتكم !
المديرة : لا عندي شغالة وطبخ انتي اهم شي راحتج .
الام: بس عيالج يرضون؟؟
المديرة: عيالي صغار وحدة اكبر من دانة بسنتين والكبير في ثاني اعدادي والصغيرة بالروضة انا راح ااخبرهم وراح يستانسوا بدانة
دانة: صج بنعيش عندكم في بيتكم لكبير وبنام على سرير وفراش جديد؟؟
الام: دانة عيب
المديرة: خليها تعبر عن شعورها . دانة من بكرة تجين مع امج المدرسة تسجلج وانا بكون بانتظاركم .
دانة : زين انشاء الله
وفي الليل من الفرحة ماغفت عيون دانة والأم تقول: نامي حبيبتي واخيرا الله ماينسه خلقه لقينا من يهتم فينا وراح تتعلمين يادانة ويتحقق حلمج.
وجهزت ام دانة اوراق بنتها وصورها وراحت للمدرسة واستقبلتهم المديرة باحسن استقبال واكملت اجراءات التسجيل معلي طولت عليكم ناموا بسرعة انا نمت وحمود مانام ههههههه
ماعلينا ومرت الايام ودانة في بيت المديرة وكبرت البنت والام صارت عجوز والمديرة تقاعدت وبعد مرت سنوات على دانة وصارت دكتورة وتحقق حلمها وعاشت مستقرة مع أمها في بيت كبير وتزوجت وجابت عيال هي تروح الشغل وعيالها عند امها والشغالة تزوجت دانة :d ولد المديرة ههههههه وعاشوا في ثبات ونبات وخلفوا صبيان وبنات بس اهم شي عرفتوا حق الام مثل ماتعبت عليها وربتها هي الحين تعطيهها حقها في تعبها ومعاناتها .
العرض المتطور
