[احمد العراقي]

ثورة ذات

اختلف رسم الوضع واحتارت الناس
وصفه كل شي غريب اسمه ثقافه

حچه لسان السكوت ابموت الحروف
وعلى ارمام العدل علّه انحرافه

الوفه قل اعتماده .. ابذات الارذال
لبس ثوب الخيانة وذب عفافه

انگلب شوف الضماير وانگلب بيه
وزن ميل الامور الحگه عافه

گبل نبع الكرامة اتوارده الناس
وهسه اتناسته وخيّم جفافه

گبل راهي الصواب وهسه مضمور
عزه ابچف الغلط صاير زفافه

چف الخير گصّر ما يفض صار
وعلى باب البخل صك باصطفافه

يبس بحر الاماني الشال الايتام
ابربيع احلامها الواسد ضفافه

وذبح حس الليالي اجفون الاحلام
التناطر من يجن يلفي ابترافه

يدگ وي الخطى ناقوس الاخطار
يريد الحق يفض ليل اعتكافه

يريد خيوط شمسه اتسدّي عالگاع
ومنّه المجتمع ياخذ كفافه

حال الناس مركب راعبه الموج
يعبره اشلون من دون الجدافه

گصّت حيلها البيها انتخه الحيل
ولف الشر گصصها اوي ائتلافه (*)

كلافه الخير صاير ماله شيّال
حگ الناس تگضي ابهـ الكلافه

لان مايل دربها وجدّت الشين
بيها يصير حادي ويا حسافه
__________________


(*) ائتلافه : لا تشير الى اي معنى او توجه سياسي


احمد العتابي
العراقي