[احمد العراقي]

رسالة حق
للامام الحسين عليه افضل الصلاة والسلام


يا فلك واخيوط شمسك بالوجود
من تمدها اتشگ ظلامه ابنورها

يا رسالة حق عن العالم تذود
ابكربله دمك كتب دستورها

يا بطولة انصاغ من عدها الخلود
حصّنَت وجه الديانة ابسورها

يا نصر تنصان بامجاده الحدود
الطاهرة المحد خدش مستورها

يا مفاخر حر عزف لحن الصمود
روّه نحرك للشهادة ابحورها

يا سفينة نور بالحسنى تگود
اتنجي مثلك يا سفن مگدورها

السلام ابحضرتك هامه ابسجود
ناخ باعتابك يريد يزورها

يا عذب كوثر محمد والورود
بيك .. للحبك رخيصه انحورها

ايزيد بالايام كل ساعه يعود
تصده وترد كربله ابعاشورها

الضماير بيك ثارت عالركود
الچتفاها وكسر شرّه اظهورها

حي جهادك ردها حره بلا قيود
والحقيقة انفتح قفل اصدورها

ماي زودك عالخلگ عزة يجود
والمذلة وياه هفت كل دورها

اشما تمر اسنين منهاجك يسود
والخديعة ايضيگ عالم زورها

ما نگص بينه يظل حبك يزود
وخل تزيد الظالمين ابجورها

ولايتك ميثاق ولزوم العهود
تحت امرها وما نخالف شورها

انصار الك .. الله وملائكته شهود
وبيعتك بالدم نوفّي انذورها

بيك يوم الدين يا محلى الوفود
ويا بختها النفخ باسمك صورها


احمد العتابي
العراقي