[قوافي الأيثار]

قضيتنه الرســـاليّه = شعائرنه الحسينيه
تحدينا العدا بيها = وفرض لحسين نحييها
شعائرنه الحسينيه
______
وحــڰ صبر الحسين ومنحره الدامي = وحــگ طفله الرضيع المنذبح ضامي
شعائرنه عقيده وخطها أسلامي = ما همنه الذي عنها يضل عامي
رغم كل طاغي حاربها = النصر للدوم واكبها
واجيال التأديها = وفرض لحسين نحييها
شعائرنه الحسينيه
______
شعائرنه حقيقه ولا تظن بدعه = واليشكل عليها المنطق يردعه
حُسيناً من نصيح ونسكب الدمعه = نواسي المرتضى والهادي والبضعه
ونعزي القائم المهدي = وحتى لو أظل وحدي
المآتم ربنه حاميها = وفرض لحسين نحييها
شعائرنه الحسينيه
______
عليمن كل وكت انته علي تشكل = وعنها اتواترت اخبار لو تسأل
المصادرها اطلع يا هذا واتأمل = سندها متصل عن النبي المرسل
هو الــگال واسوني = بحُسين وقرة عيوني
وهاي اخبار نرويها = وفرض لحسين نحييها
شعائرنه الحسينيه
______
أول ما نظر هادينه لحسينه = شافه ولانها فاضت بالدمع عينه
يـگل للزهره بالطف لو تشوفينه = صريع ومنذبح ويه اهله وابنينه
عليه بالمدمع اينوح = وفؤاد الزهره مجروح
واحنه الي نواسيها = وفرض لحسين نحييها
شعائرنه الحسينيه
______
عله حسين وخدمته لا تناقشني = نصيبك للفشل لمن تحاججني
عنه ما گدر چــم طاغي يمنعني = وانته شما صرت حاشى تغيرني
نضل خدام ما نخضع = لون اشلاء نتكطع
نموت وما نخليها = وفرض لحسين نحييها
شعائرنه الحسينيه
______
عن جعفر امامي اخبار ننقلها = بسندها المعتبر للشيعه گايلها
حسين زيارته للحج يعادلها = وللباري دعى لزواره يشملها
برحمته الواسعه وگال = عديد اخبار وافضال
ودموع العين يجريها = وفرض لحسين نحييها
شعائرنه الحسينيه
______
ندخل كربله ونــگصد شهيد الله = نطوف عله الضريح وبالدمع ننعاه
حسين اليوم نادى واحنه لبيناه = وابد والله ما ننسى حسيناه
نضل لحسين انصار = نواجه كل الاخطار
والدعوه نلبيها = وفرض لحسين نحييها
شعائرنه الحسينيه
______
اذا رايد ثقافه وبيها تتثقف = اخذ فن (التشابيه ) واله اتعرف
تجسد للمشاهد كلها يوم الطف = وتخلي الفكر باعماقه يتوقف
عله ادروس الشهاده = ويحصل للإفاده
توصله بعمق ماضيها = وفرض لحسين نحييها
شعائرنه الحسينيه
______
لطمنه عله الصدر لو تكتشف امره = عزف حزن الموالي وناره مستعره
ما ننسى الشمر اليوم الصعد صدره = صعد صدر النبي وبسيفه حز نحره
اللطم لحسين معناه = نواسي حجة الله
واله الارواح ننطيها = وفرض لحسين نحييها
شعائرنه الحسينيه

______
عمار جبار خضير
5/12/2012