[احمد العراقي]

تانيناك

گضينه العمر بالصبر نترجاك
مر بينه ابعسر وابقهر وانطرناك

ظلمه ايامنه وخيط الفجر مگطوع
حلت ساعتك وابهالوكت ردناك

لا انت بارض وندور ونلگاك
ولا انت ابسما وحتى احنه نتعناك
ضايع بالصدگ والحلم هم جافاك

ما ضگناك مره وحتى مليناك
ولا عدنه انت عادة وحتى بطلناك
طولت المغيب وتالي بله وياك

تانيناك .... اسنين اهواي مرت واحنه ما عشناك

شح بينه الوكت واهمومه جنهن سوط
يطبع بالمتون وتدري هنه اركاك
مغزل صاير النه واحنه بيه اخيوط
ننفل ساعة منه ونرجع وننحاك
لا نگدر نشكفه منين ما ظل حيل
ظلينه ابوضعنه ومنه ماكو افكاك

تانيناك

بشطوط الاماني اعلگنه ليك اشموع
عشنه اعله الامل و نگول ما ننساك
بلجنك تمرنه وتخطي بينه اخطاك

نصبر وانتحمل گلنه شده اتزول
ونلهي الارواح ابجلمه هسه اهناك
ها گرب علينه .... وها تراه ابعيد
ها باجر تجي .... ولليوم ما شفناك

ما ظلت اگلوب اتصيحلك حياك
ولا ظلت لسن تتسامر ابطرواك
ولا ظلت اجفوف اتصفگ ابملگاك
لا ظل اليكتبك .... لا بگه اليقراك
لحگ عالوشاله الحافظت ذكراك

جم دمعة طفل جم لوعة ام اتنوح
جم حسرة ابصدر مخنوگ تتمناك
بعيون الحياره الحيره ترجه اجواب
وي شمس النهار اشوكت يضوي اضواك

يا فرح العراق اخصمها حد يا يوم
باجدام الحزن يبقى الوطن ينراك ؟؟

تنحل لو تظل اعلينه بس معگود ؟؟
اصفه براي ... لو تابوت موتك ننصب وننعاك