[احمد العراقي]

شلون ارسمك

بالشعر يحسين وبيا صورة أوسمك

وانه اشوف اللوحة دم اتفيض
من انخط عليها حروف اسمك

ثاري دمك ..
من يشوفك ينتفض ويظل يسطر ما يألمك

ابيا وضع گلي انه اقدمك ..
وانه اشوف الطف تحولك سمه
ومن عنده تضوي انوار نجمك

يا نفس عمر الديانة العاشت ابهيات عزمك
ويا جرح سامي ابنزيفك عاليلچمك

يا فجر عهد الشهامة
ويا نبع روّه الكرامة
ويا خيال الكون حاير بيك ما گادر يلمك

انت بركان الاباء
انصهرت اسيوف الظلام
ابموقفك وابيوم حسمك

وانت مضمون الفداء وترجمانه
الصاغ من عندك كيانه
وما برح طول السنين يدور يمك

من ارسمك ..

ارسم الحاء ابحزن
وابلوعة امصاب العقيلة
المالگت راس وجسد ظلت تحشمك

واكمل اوي السين سيل من الدمع
يجري ويروّي جروح جسمك

ومن اخط الياء اسمع يا حسين
عروگ روحي اتصيح وابغصة الم
متوجرة بآلام همك

والنهاية النون .. نبراس الخلود
اليحچي بلسان الوجود
شلون تتعلّى الامم لمّن تعظمك

يا سماح امسدي فيّك عاليحبك واليظلمك

شلون ارسمك ..

وانه اشوفن كبريائك
هدّم اعروش الضلالة الـ بالوهم ظنت تهدمك

شلون ارسمك ..

غير احوي اسرار كنهك حتى ارسمك

وانت نور من القداسة
المستحيل انحد قياسة
ويا عقل مولاي بالعالم يعِلمَك

راح اكتبك بس " حسين "
لان شفت اشما اوصّف بالحقيقة وبالخيال
اوصافي تعجز ما تضمك