[احمد العراقي]

گاع الدم

من گد ما تروت بالدمه الگاع
تزوع الماي گامت ما تحفظه

ومن گد ما غدت تدفنها بس روس
مشه تعويد عدها ومن يفضه

ومن گد ما عليها اتسيد الموت
انمنع طاري الحيا وصارت ترفضه

ومن كثر الحروب وعيشة النار
الجفن بس عالحرب يغفه وتغمضه

شسولف عن ارض ما تعرف اتهيد
ولا طيف الفرح گدرت تكضه

شمر عنها الدرب و ايگول زعلان
زعل كلش ثگيل اشلون يرضه

بگت هاي المواقف بيها تندار
وعليها النار كل ساعة اتّلظه

عليها الدهر غاير ما يعن يوم
يمل كلش بعيدة ومن يريضه

ابمرار اتحملت اعوام واعوام
وتگول ابضحكه باجر كله اعوضه

وتگول امن الصبر يا ساعة الارتاح
وعلى اعتابي اشوكت همي ايتشظه

حچيها ابكل حرف متمازج ابضيم
وغير الضيم ماكو البيها يحظه

اجرعت علگم عسرها ابغصة الاه
تكابر من تبلعه وما تمضه

امر ما ظل بديها وهذا مكتوب
فرض للدهر تعمل ما يفرضه

قصايد لو حچت باحزانها اتضيع
چبيرة اشما تكون اتصير ومضه

نست طعم الاماني ورادت اتعيش
على اجروف الامان ابيوم لحظه

اسمها ارض العراق الدارها البين
ابگطب رحة عذابه الـ ماهي ريضه


احمد العتابي
العراقي