[احمد العراقي]

السلام عليكم
لسيدي ومولاي ابي الفضل العباس عليه افضل الصلاة والسلام كتبت هذه الابيات المتواضعة

سبع الكنطره

گصد ذيج الجموع وحدر اعله الماي
محد جان يگدر يوصل لحده

گالوا هذا حيدر رد علينه اليوم
نفسه وذو الفقاره اليلمع بيده

اگبل والشمس تنعكس عالبتار
وبروس الكفر سن صارمه وحده

جاهم يرهب ونار الغضب بالعين
ما يگدر جمعهم يوگف يصده

خلاها الوطيه انملت بس ارگاب
من اهل النفاق الصاروا بضده

طر جيش العدا واشطرهم لنصين
ونهر الفرات اتوجه يگصده

شاف بعينه جاري الماي لاجن حيف
يشرب والعطش لحسين طر جبده

ذب الماي من جفه وملاه للجود
ولسكنه يريد يوفي بعهده

لاجن ما رعاه البين جار اعليه
صاب حسين اخوه وليه ما رده

محني الظهر گام حسين من عباس
والدمعات سيل الصارن بخده

راح الجان ساند ظهر ابو الاحرار
جيش يشوفه جان بنفسه لو عده

راخص للعقيدة الروح وي العين
ناذرهن اجفوفه وهو ابمهده

رمز التضحيه وتاج الفخر عباس
بيه الخوه باعظم صوره متجسده

عنوان الفضل والنخوه والنوماس
شبل المرتضى المحد وصل مجده
__________________________

ونسالكم الدعاء
وعليكم السلام ورحمة الله وبركاته