[زكي الياسري]

لسان حال العقيله الهاشميه حينما مرت على جسد العباس

(آ يخويه آ يخويه .. شلون اعوفك آيخويه)*
1
لكربله انته الجبتني ......... انته شديت المحامل
ناكَتي تشهد عليه ......... يا فخر زودك يبـاسل
ارجع ابلياك خويه ......... ما اصدِّكَـ يابوفاضل
شلون اصدك ياكفيلي ...... تطبر الهامه العواسل
آ يخويه آ يخويه .. شلون اعوفك آ يخويه
2
تدري يا عباس خويه .. علهزل من صعِدونه
بلا ستر يبــن الوفيه .. بالسلاسل كَيــدونه
تدري من بعدك ولونه .. تدري من بعدك سبونه
تدري راوونه العجايب .. يا بو فاضل ما رعونه
آ يخويه آ يخويه .. شلون اعوفك آ يخويه
3
جنت بوجودك يضيغم .. محد الشاهد خيالي
والحصل خويه بمغيبك .. ما شفت رسمه بخيالي
خويه اطفال وحراير .. بلايه حامي بلايه والي
بت علي واخت الصميده .. هذا اصبح خويه حالي
آ يخويه آ يخويه .. شلون اعوفك آ يخويه
4
بكربله بزود الهواشم .. محد اتكرب خيمنه
ومن كَضوا بيد المنيه .. كل فوارسنه و زلمنه
سَــلِبونه و فرهدونه .. رعبوا اطفال و حرمنه
واحنه اهل بيت الرساله .. علنهر طايح كَمرنه
آ يخويه آ يخويه .. شلون اعوفك آ يخويه
5
شاهد بعينك عبرتي .. لمن ارجَبت الحراير
ركبتهن وحده وحده .. علهزل وكليبي صابر
ومن بكيت الوحدي نزلت .. دمعتي ترس المحاجر
من يركبني يخويه .. لا معين ولا مناصر
آ يخويه آ يخويه .. شلون اعوفك آ يخويه
6
انه من سارت هزلنه .. يا بو فاضل بالمســـــيره
شفت اخويه حسين مرمي بحر الطفوف وهجيره
وشاهدت جفينك انته .. وصبت ادموعي الغزيره
يا غيور الهاشميـــــه .. اختك الصارت اسيره
آ يخويه آ يخويه ... شلون اعوفك آ يخويه

زكي الياسري النجفي

*(مقتبس من قصيدة مله محمد مكي حفظه الله)

</i>

[لبيك داعي الله]

اللهم صل على محمد وآل محمد

احسنت شاعرنا العزيز بارك الله فيك

قلم نازف اغرقنا بفيض الكلمات الولائيه

لاعدمناك شاعرنا المبدع