[مهند صاحب الربيعي]

ماشي والرحله طويله ودربي ليل
جنت كاصد للشمس محتاج نور
التفت مشايه يمي بكل مكان
وشفت كل بغداد كدامي تزور
رحله والموعود ماشاهه الطريق
جنت احس بروحه كل موعد صلاه
سولفت وياه بالهامي شجون
وسمعت بأحساسه نفحات الاله
كتله صار سنين نحيي الاربعين
وانته تعرف انته صاحب كل زمان
مانلحك ندعي لارزاق الجياع
بينه رهبة موت نطلب بس امان
أبين كل خطوه لغم لكن نزور
نريد حل للناس تعبنه الوكت
انتخبنه شموع لاجل الكهرباء
ومالكينه انجاز لاشمعه شفت
موسم اللالات ولى ويه الخراب
لايتات الشحن اثوب للوطن
صار ثمن سنين مادكينه ساف
بس بنينه هواي من اجل الفتن
تعرس الشبان باسرع مايكون
حتى خاف يموت يتركله اسم
يجوز بالسابع يلاكيله انفجار
عاد اقلهه انكول حققله حلم
كمت اشوف الطف مواقف بالعراق
والشعب مسكين حاكمته الظروف
اذا يتعارك سياسي ويه الوراه
بسوك أو بمدرسه نشوف الطفوف
ياأمامي هذا حالي وجيت أزور
وياي كل بغداد موكب للجروح
مانهاب الموت بس عدنه عيال
وين من نموت مولانا تروح
هذا حالي وحال بغداد السلام
جينه نشكي نريدك تزيح الظلام

[ثورة الحسين]

تسلم اناملك على ماخطت من كلمات رائعه
تحياتي
اخوك الصغير
(عبدالله الشاعر)

[رياض الرسل]

السلام عليكم

حبيبنا الغالي
مهند

موفق كلى هذه الكلمات المعبره
دمت بكل خير

رياض الرسل