[جعفر المندلاوي]

فگد الإعزاز
======
قصيدة في رثاء أخي ونور عيني المرحوم يونس ملا عبد المندلاوي أبو إيهاب الذي وافاه الأجل وإنتقل الى جوار ربه الرحمن الرحيم قبل أربعين يوما .
بقلمي: جعفر ملا عبد المندلاوي
15-1-2016م
گالوا دنيا حلوة وزاهيه الايام == ترسم بالأماني وتحبس اللسعه
تفرشلك ضحك وتكثّر الاحلام = وثناياها جمر عالغدر مرتضعه
لا تنغر يصاحب لو اجت دنياك = الجمها بعفافك وإقمع البدعه
تمر سنين عمرك چنها ساعات = وبلحظة تفارگ وتنتهي الجَمْعه
خرافة اسم الربيع وعطر الأزهار = ذبلان الورد ما بيه اثر ضوعه
ونسمات الهَوى امتّربة الذّرات = تشتم بس منايا وتحصد الزرعه
خريف يطول ايامه والاعوام= چن ورق الشجر بينه القطف طبعه
هدّ حِيلي الوكت من فگد الاعزاز = يفجعني و تجي بكل عام فجعه
رافگت العمر وي موت الأحباب == أدفن هـذا مرة ، وهذا أشيعه
خاطبت المنيّة وعندي يمها عتاب = تاكل بالغوالي وجوعها تشبعه
بعدني منذهل من ذاك الفراگ == وفگد اليوم زيّد للألم صدعه
شدهني وهّيج جروحي والآلام == رجعت بالضلوع توخّز اللوعه
أخويه ونبض گلبي ونور العيون = يفارگني بسفر هيهات بي رجعه
صدگ رايح أخويه بلايه توديع = صدگ هالروحة صارت ما أودعه
يمن صدرك حنون وخوّتَك خيمة = يا نهر الوفه من طيبتك نَبعه
چفينك بحر بخير يقطر دوم === عباده العمل يمك تشبه الرَكعه
يمر الليل شايل دمع الفراگ === ومن يبچـي عليك اشلون أقنعه
أحط رسمك حفر بضلوعي تذكار = من گربگ أحسگ منّي قطعه
أجيب منين شمعه تنور الليل == وأنت الچنت وسط الروح شمعه
وأشم منين نسمة تداوي الجروح= وغيابك يالعزيز إشكبر وجعه
علمـني الصــبر لو رايد تروح ===== أنا بلياك وجعه تصـير تسعه
يا مـوت الـيّ تاخذ بـس الإعـزاز === مـو كـافي ألم والمـرّ أجرعــه
ألمن أشتكي وأحچيله الهموم = ومن أشكي الهضم ياهو اليسمعه
حرت وين أنطي وجهي بيوم المصاب === ويا درب اليوديني وأتبعه
مذهول الفكر مندهش بالصار == وأروّض بالنفس يمكنها خدعه
وأگول الخبر ماچنّي سمعت شي = وافزّ من اسمع الهاتف وارفعه
رايد شوفتك وأحلم ابملگاك === يا نعم الأخـو وگـلبك شوسعه
عمرك بالصبر والتعب گضيت ==== تاليها رحت وحدك بسرعه
حنيت ورحت يم داحي الباب == ونمت باطيب تراب وخير بقعه
وچـنت وكت الزيارة تروح ملهوف == بگلبك تنظر وبالعين دمعه
حزينه الدنيا مكتئبة بليّاك = كل شي يصيح بسمك وآنه أسمعه
بمكانك وين رايح وين ما جيت = ألم عطر المحبة بروحي أجمعه
هدوء البيك يشبه طيب هالگاع = طويت سنين عمرك بيها تِسعه
انا بجاه الحسين الـزرتَه مشّاي === قبل ما ترحل بأيام سبعة
اريدن فاطمة تحضر لك هناك == وتشفع للمحب نعم المشفعه
وأنخي بحيدر الكرار مولاك === يجيك وبالحشر كل شي يطيعه
من كوثر محمد تشرب الكاس = تاخذ صك براءة وتفخر برفعه
وبفردوس لو بالجنة بشراك = وشفيعك لو علي لو فاطمة البضعه

ونسألكم الدعاء

[ابو محمد]

كل شي امسجل الكم ياشيعه ياطيبين -- كل آه والم كل حسره كل دمعه
باجر بالحشر نلكاها كلها اهناك --- والبسمه التنطبع تجبر الف فجعه

تحياتي لك اخ جعفر واعظم الله لك الاجر

[جعفر المندلاوي]

اقتباس : المشاركة الأصلية كتبت بواسطة ابو محمد [ مشاهدة المشاركة ]

كل شي امسجل الكم ياشيعه ياطيبين -- كل آه والم كل حسره كل دمعه باجر بالحشر نلكاها كلها اهناك --- والبسمه التنطبع تجبر الف فجعه تحياتي لك اخ جعفر واعظم الله لك الاجر

أخي ابو محمد يا رعاك الله ..
شكري لك غير مجذوذ .. على كلماتك الطيبة ..
ربي يحفظك ويسلمك ..
وسلامٌ لروحك النقية ..