قصه وطن اسمه العراق
كان يا ما كان في قديم الزمان
كان اكو شيعة وسنه يعيشون بفد مكان
الشيعةجانوا ساكتين والسنه جانوا نايمين
والكل جان راضي بعيشته وفرحان
كان يا ما كان وكان الوكت خير وصحبة وأمان
وكان الصاحب الصاحبه ذخر والنخوة شيمة الخوان
وكا ن ياما كان كان يجمعهم مكان اسمه الوطن
وكان احله مابيه أهله وأحله مابيهم أخوتهم والامان
وبفد يوم من الايام مر بيهم طيف من الشيطان
والشيطان عالمؤمن لوتدرون ماله سلطان
بس طيف اللي مر بيهم الظاهر العن من الشيطان
شاف الناس ناس نايمه وناس ساكته وشاف الدنيا
ملعون هالشيطان ما صرفله الوضع وكال خل اكلبهه عليهم نيران
اجه عالشيعي وكله ساكت انت ياللبخ
شوف السني شلون ساكن قصر وانت كاعد عالحصران
واجه عالسني وكله ولك انت نايم ورجلك بالشمس
شوف الشيعي شلون متسلح الك وتره جارته ايران
وخبطت هاي الناس وكلمن شال سلاح وكام
الطالب والصانع واليفتهم والحشه السامع زمال
كله تكول وين الثار وين ايروح المطلوب من الديان
وشدوا سلاح ويه سلاح وتحزموا للذبح الف حزام
وكالوا الله.. احنه الزلم هاي الشجاعه تليق بالفرسان
وانفتحت عليهم بعد احزاب وعمايم ووجوه تشبه الغربان
كان ياما كان..وتجيكم السالفة..سالفة الفتنه شلون تحرك بنيران
وشبعت الناس من الذبح..صح شبعوا بس ماشبع الشيطان
كللهم اذبــــحوا واذبـــــــــحوا واذبحـــــــــــــــــــــوا للعصر
هاي هيه علامات النصر والشجاعه والفخـــــــــــر
وتره جدودكم ماصاروا أسياد عالعالم بالعلم والشهامة والقيم
جدودكم همه جانوا أهل الذبح
لعد أذحبوا ماطول خالكم طيب ..و استمرالذبح سنين وأعوام
الناس كالت يابه مو هايه صارت ماصخه وبليه ملح
كافي بعد وبس ليش كتلة الادمي صارت مثل كتلة الجلب
كلب الشيطان دفاتره ..باوع عالخطه الأمنيه زين كال لا هم بعد عوزهه ذبح
وأستمر الذبح ودريلات ومفخخات واغتيالات بفلس
وهجت هاي الناس بالاوطان ناس سكنت مصر
وناس سكنت سوريا وناس سكنت بعمان
وناس ماعدهة بخت طلعتلهه فيزا للسودان
وماظل بذاك الوطن اللا اللي جايز من روحه
لو بس اللي قرر يتلاوه ويه الشيطان
ضحك الخبيث وكللهم الربعة هيج الشغل لو لا
تعلمتوا صنعة الفتن لو ردتوا تحتلون الاوطان
بس هوه العتب مو عالشيطان العتب عله ذاك الشعب
شلون بساع ا تقشمر وانلعب
وشلون بساع تغيرت الاطباع
ليش همه مايدرون حظن الوطن لو ضاع
ماتلمهم بعده لا سما ولا كاع
ضل هذا الشعب ينزف سنين وأعوام
ياهو اللي يمد ايده ويسد هذا الجرح
وياهو اللي يصفي نيته ويه العراق
العراق اللي جان الهم غطه وخيمه وستر
ويامه هموم شال عنهم ويامه احمال
ويامه ويامه مضيفه جان عامر بالخير
ويامه شبعت من خيراته شعوب واوطان
هسه العراقي رخص وصارت تشتريه اوطان وتبيعه اوطان
وهاي هيه وتاليهه بس بعد ما خلصت سالفة العراق
يكولون بعد بيهه فصول تطول وتتغير بعد أوضاع
وخلي نجيب ليل ونشبع عتابه وخلي نجيب ويه عمرنه عمر
بلكي نشوف فد يوم تاليهه وبلكي نسمع فد يوم الخبر
ان الشيطان اخيرا عالعراقيين انقهر..
وقرر انه يتركهم يعيشون بهالوطن بأمان
العرض الشجري