قصيدة راية العباس

امير الاعسم · 09:56 PM

منهو گال اعله الأرض موضوعة ***** راية العباس هالمرفوعـة
فوگ گبة ذهب خفاگة وترف *****تحف بيهه وهيه بالگبة تحف
وماينكسهه القدر والهه يلف ***** يگدر الباطل وكل فروعــة
إلهه من ابعيد كل ناظر يشوف ***** شامخه ونيشان صارت للطفوف
وبالتحية تنوب عن ذيچ الچفوف ***** الغدت من زنودهن مگطوعة
من محمد للصميدة مقدمة ***** بيوم خيبر صنع بيهه الملحمة
وبيد ابو فاضل أمانة مسلمة ***** من ايد عوده وصانهه المودوعة
بآسم هاشم گمر صارتله وصفت ***** بزود راعيهه وعزم همته علت
طخت الرايات إلهه وهبطت ***** ومن عمدهه الكل غدت منزوعة
لايمن گايل اعله الگاع العلم ***** مانصف وجدانك بحگ وحكم
شلون تنقل خبر مكتوب بقلم ***** غدت من سمه الكتب ملسوعة
العلم فوگ الگاع ياحيدر تگول ***** من حديثك هذا مدهوشه العقول
تصول بالطف گوم شاهدهه وتجول***** ولا تضن عن النظر ممنوعة
للشرف عنوان يحملهه الشريف ***** ماهوت عالأرض من طاح الحليف
جروحه من شاهدت ماخذهه النزيف ***** بالحداد عليه حنت مفجوعـة
حايره ويم مصرعه تلف وتحوم ***** ياجرح يتضمد اوليهه يگوم
تشد هذا ذاك يتفجر دموم ***** چانفجار العذب من ينبوعه
نصر من الله حملت هالشعار ***** مرصعة بديباج واتشع بالخضار
ولونهه من دمه چالياقوتة صار ***** حمر بي متخضبة ومنگوعة
موسد اعله الغبرة تنظر للحبيب ***** مبتر الذرعان وبدمه خضيب
عدهه ماضل كل أمل يشفه ويطيب ***** وينهض وياهه ويتم مشروعه
عشگت العباس حگهه العاشگه ***** عنه ماتبتعد بي متعلگه
ويا بگت متلازمه ومتفارگه ***** فوگ جثته البالكبر مضجوعة
تعد بالساعات مو يوم وشهر ***** بلهفة تتنطر يعود المنتظر
ومن غيابه المهدي لورد وظهر ***** الهه يحمل لو علن بطلوعه
ملك للطلاب من وكته يحين ***** تصبح ابلا شك ولا ظن باليقين
وبيهه يعلن يالثارات الحسين ***** ودم رضيعه وچبدته وضلوعه

لخادم اهل البيت محمد الاعسم
وارجو انتعجبكم و انتظر ردودكم